Na ala sama mu luku sowtu koosi aw wei anga fa aw modo. Ma efu we holi den leli fu Yehofa a pakisei, u naw wei koosi di u lobi namo. Ma wo wei koosi di Yehofa e fende bun tu. Meke u luku san Beibel e taki fu a fasi faw mu wei koosi anga a fasi faw mu modo.

1. Fa Beibel e yeepi u fu sabi faw mu wei koosi anga faw mu modo?

Beibel taki u mu wei ‘koosi di fiti’. U mu wei koosi a wan ‘lesipeki fasi’. Den koosi di we wei, mu soi taki ‘u de anga kiin fusutan’. Te sama luku den koosi di we wei, den mu man si taki ‘we dini Gadu’ (1 Timotiyesi 2:9, 10). A tekisi ya e taki fo sani: (1) U mu wei koosi di ‘fiti’. Te i go a komakandaa ye si taki den baala anga sisa nai wei aseefi koosi, tokuso den koosi di den e wei anga a fasi fa den e seeka den uwii e soi taki den e lesipeki Gadu. (2) U mu wei koosi a wan fasi di e soi taki we ‘lesipeki taawan’. A sani ya wani taki wa mu wei koosi di simpan tumisi efuso di o poti son pisi fu u sikin a doo. Wa mu wei koosi di o meke sama poti pakisei aw tumisi. (3) U mu soi taki u de anga ‘kiin fusutan’. Wan fasi faw sa soi taki u de anga kiin fusutan, a te u nai wei ala den nyun modo di e kon. (4) Ala yuu u mu e wei koosi di e soi taki we ‘dini Gadu’.​—1 Korentesama 10:31.

2. Saide u mu holi u baala anga sisa a pakisei te we luku sowtu koosi wo wei?

Na ala sama mu luku san aw wei, ma toku wa wani wei koosi di o meke taawan fii wan fasi. Neen meke u wani ‘meke moiti fu du sani di o meke taawan fii bun’.​—Leisi Romesama 15:1, 2.

3. San den sama di nai dini Yehofa sa du te den si a fasi fa we wei koosi?

U wani wei koosi di fiti ala yuu. Ma te we go a peleikiwooko efuso komakandaa u mu moo poti pakisei a den koosi di we wei. Wa wani a fasi fa we wei koosi tapu sama fu aliki u, neen meke u wani wei koosi di e ‘moin a leli fu Gadu’. Den koosi di we wei mu meke sama wani kon sabi a tuu.​—Titesi 2:10.

 LUKU A TOLI YA MOO FINI

4. Te we wei koosi di fiti, we soi taki we lesipeki Yehofa

Saide u mu e wei koosi di fiti? Leisi Psalm 47:2, da i luku efii poi piki den akisi ya:

• Fa den koosi di we wei sa meke sama si Yehofa?

• I si enke u mu luku bun san we wei te we go a den komakandaa efuso a peleikiwooko? Saide i taki so?

 5. San o yeepi u fu sabi sowtu koosi u mu wei anga faw mu modo?

Pee a FELON.

Den koosi di we wei mu de kiinkiin ala yuu, winsi den dii efuso den á dii. Winsi pe u de u mu wei koosi di fiti. Leisi 1 Korentesama 10:24 anga 1 Timotiyesi 2:9, 10, baka dati dai luku saide Kelesten á mu wei koosi di . . .

• piitipiiti.

• e poti son pisi fu den sikin a doo efuso koosi di simpan tumisi.

Winsi fa Kelesten naabi fu wooko anga a weiti fu Mosesi moo, toku a weiti ya e yeepi u fu si fa Yehofa e denki. Leisi Deitolonomi 22:5, da i luku efii poi piki den akisi ya:

• Saide wan umanpikin á mu modo a wan fasi di o meke a gei mannengee? Saide wan mannengee a mu modo a wan fasi di o meke a gei wan umanpikin?

Leisi 1 Korentesama 10:32, 33 anga 1 Yohanisi 2:15, 16, da i luku efii poi piki den akisi ya:

• Saide u mu luku bun fu u nai modo efuso wei koosi a wan fasi di e meke den sama na a pisi pe we tan fii wan fasi?

• Sowtu koosi sama lobi wei na a pisi pe ye tan?

• I si enke ala den modo ya fiti gi wan Kelesten? Saide i taki so?

 SAI LELI?

Te we wei koosi di fiti, da we soi taki we lesipeki Yehofa anga taawan.

Sai be o piki?

• Saide Yehofa wani u luku bun sowtu koosi we wei, anga fa we modo?

• San a wantu Beibel tekisi di sa yeepi i fu sabi sowtu koosi i mu wei, anga fai mu modo?

• San sama sa taki fu a Gadu fu u te den luku a fasi we wei koosi?