Mme owo ẹma n̄kpọ nsio nsio; ukem oro ke onyụn̄ edi ye nte mme owo ẹsisịnede n̄kpọ ẹnyụn̄ ẹkamade idem. Item Bible ekemede ndin̄wam nnyịn isisịne se idinemde nnyịn ye Jehovah. Yak ineme iban̄a ndusụk item oro.

1. Ewe item Bible ke ikpesida ibiere nte isịnede n̄kpọ inyụn̄ ikamade idem?

Ọfọn isisịne “ọfọn̄ eke etịmde odot, owụtde iso o-bụt ye eti ibuot,” isinyụn̄ ikama idem ke usụn̄ emi owụtde ke “ikpono Abasi.” (1 Timothy 2:9, 10) Ti item Bible inan̄ emi: (1)  Sisịne ọfọn̄ emi “etịmde odot.” Nnyịn isisịneke utọ ọfọn̄ kiet ke mboho ikọ Abasi nnyịn, edi kpa ye oro, se isisịnede ye utọ idet isinamde esinam mme owo ẹnọ Jehovah ubọn̄. (2) Sisịne ọfọn̄ emi “owụtde iso o-bụt.” Ọwọrọ nnyịn idisịneke ọfọn̄ emi edide owo ama okụt nnyịn idiọk ekikere odụk enye esịt, m̀mê ọfọn̄ emi edinamde nnyịn idi n̄kpọ ndise. (3) Siwụt “eti ibuot.” Emi idiyakke nnyịn itiene isịne se ẹsosio ẹdi, m̀mê ikama idem nte ererimbot. (4) Siwụt ke “ikpono Abasi.” Ọwọrọ ana nte isikama idem owụt ke idi ata ikọt Abasi.​—1 Corinth 10:31.

2. Ntak ọfọnde isikere iban̄a nditọete nnyịn ima iyom ndimek se idisịnede?

Imọdiọn̄ọ ke imekeme ndisịne se imade-ma, edi ọfọn isikere m̀mê se iyomde ndisịne editie mbon en̄wen didie. Ọfọn inam se ikekeme man ikûsịne se idifịnade mme owo. Utu ke oro, “yak owo nnyịn kiet kiet enem mbọhọidụn̄ esie esịt ke ndida se ifọnde mbọp enye nnam ọkọri.”​—Kot Rome 15:1, 2.

3. Didie ke nte isịnede n̄kpọ ekeme ndinam owo etiene edikpono ata Abasi?

Imesidomo ndisịne n̄kpọ ọfọn kpukpru ini, akpan akpan ke ini ikade mbono esop ye ukwọrọikọ. Ikpanaha isịne se idinamde owo ọkpọn̄ ndikop se ikwọrọde, edise se isịnede. Utu ke oro, yak isịne se idinamde mme owo ẹma ndikop se ikwọrọde, ye se idinamde “ukpepn̄kpọ Abasi, Andinyan̄a nnyịn, enyene uku.”​—Titus 2:10.

 SỊN IDEM KPEP

4. Ikpesịne n̄kpọ inyụn̄ ikama idem ọfọn, iyọnọ Jehovah ubọn̄

Nso ikpedi ata akpan ntak emi ikpesisịnede n̄kpọ inyụn̄ ikamade idem ọfọn? Kot Psalm 47:2, ekem ẹbọrọ mbụme emi ẹnyụn̄ ẹneme ẹban̄a mmọ:

• Ndidiọn̄ọ ke nte isịnede n̄kpọ ayanam mme owo ẹtịn̄ ikọ ẹban̄a Jehovah, akpanam isisịne n̄kpọ didie?

• Ndi emekere ke ọfọn ikpeme nte isikamade idem ye nte isisịnede n̄kpọ ika mbono esop ye ukwọrọikọ? Nso inam ọdọhọ ntre?

 5. Se idin̄wamde nnyịn isikama idem inyụn̄ isịne n̄kpọ ọfọn

Se VIDIO emi.

M̀mê ọfọn̄ nnyịn ọsọn̄ urua m̀mê isọn̄ke, akpana enye asana onyụn odot ye se nnyịn isịnede enye ika. Kot 1 Corinth 10:24 ye 1 Timothy 2:9, 10. Ekem ẹneme ntak emi mîkpanaha isịne ọfọn̄ emi . . .

• mîsanake m̀mê ọfọn̄ emi etiede nsuahade nsuahade.

• ọbọpde-bọp owo, an̄wan̄ade-n̄wan̄a, m̀mê emi ekemede ndinam idiọkn̄kpọ ọdọn̄ owo.

Kpa ye oro mme Christian mîsitieneke ibet Moses, ibet oro an̄wam nnyịn idiọn̄ọ nte Jehovah esikerede n̄kpọ. Kot Deuteronomy 22:5, ekem ẹbọrọ mbụme emi ẹnyụn̄ ẹneme ẹban̄a enye:

• Ntak emi n̄wan mîkpesịneke n̄kpọ emi anamde enye ebiet erenowo, erenowo mîkponyụn̄ isịneke n̄kpọ emi anamde enye ebiet n̄wan?

Kot 1 Corinth 10:32, 33 ye 1 John 2:15, 16, ekem ẹbọrọ mbụme emi ẹnyụn̄ ẹneme ẹban̄a mmọ:

• Ntak emi mîfọnke isisịne n̄kpọ inyụn̄ ikama idem ke usụn̄ emi edifịnade mbon en̄wen m̀mê nditọete ke esop Abasi?

• Ke obio emi afo odude, mme owo ẹsisịne n̄kpọ ẹnyụn̄ ẹkama idem didie?

• Ndi emekere ke ikpanaha Christian etiene ekpebe ndusụk se afo esikụtde oro? Nso inam ọdọhọ ntre?

 SE IKPEPDE

Edieke isisịnede n̄kpọ inyụn̄ ikamade idem ọfọn, oro owụt ke imokpono Jehovah ye mbon en̄wen.

Se M̀mê Emeti

• Nso inam nte isisịnede n̄kpọ ye nte isikamade idem ebehe Jehovah?

• Nso ye nso ke ikpekere ima iyom ndimek se idisịnede?

• Nte isisịnede n̄kpọ ye nte isikamade idem ekeme ndinam mme owo ẹda esop Abasi didie?