Ɔsor kwan a obiara pɛ dɛ ɔfa do hyɛ n’atar na osiesie noho. Naaso, sɛ yɛdze afotusɛm a ɔwɔ Bible mu no yɛ edwuma a, yebotum ahyɛ ntar a yɛpɛ na ber kor no ara so, hɛn ahosiesie no ama Jehovah n’enyi aagye. Ma yensusu dɛm afotusɛm yi mu bi ho.

1. Ebɛnadze na ɔboa hɛn ma yetum hu ntar a ɔsɛ dɛ yɛhyɛ nye kwan a ɔsɛ dɛ yɛfa do siesie hɛnho?

Ɔsɛ dɛ yɛhyɛ ‘ntar a ɔfata, na yɛdze enyi a ɔfɛr adze nye enyidahɔ siesie hɛnho,’ na yedzi hɛnho nyi mbrɛ ɔbɛyɛ a afofor bohu dɛ ‘yɛsom Nyankopɔn.’ (1 Timothy 2:​9, 10) Ma yensusu afotusɛm anan yi ho: (1) Ɔsɛ dɛ yɛhyɛ ntar a ‘ɔfata.’ Dɛ mbrɛ ehu wɔ asafo nhyiamu ase no, ɔsor kwan a Jehovah n’asomfo no mu biara pɛ dɛ ɔhyɛ n’atar na osiesie noho. Naaso, ne nyina mu no, hɛn ntarhyɛ nye mbrɛ yesiesie hɛn tsinhwi ma ɔda edzi dɛ yebu Nyankopɔn a yɛrosom no no. (2) Ɔsɛ dɛ ntar a yɛhyɛ nye kwan a yɛfa do siesie hɛnho no da no edzi dɛ ‘yɛfɛr adze’. Iyi kyerɛ dɛ, ɔnnsɛ dɛ kwan a yɛfa do siesie hɛnho no ma nkorɔfo nya nda ho akɔndɔ, anaadɛ ɔma obiara hu dɛ, nyew, hɛn na yɛresen no. (3) Ɔwɔ dɛ yɛdze ‘enyidahɔ siesie hɛnho,’ kyerɛ dɛ, ɔnnsɛ dɛ ntar anaa ahosiesie fofor biara a yebohu dɛ wɔaba do no, nna yedzi ekyir. (4) Aber biara, ɔsɛ dɛ kwan a yɛfa do siesie hɛnho nye hɛn ntarhyɛ ma nkorɔfo hu dɛ yɛsom nokwar Nyankopɔn no.​—1 Corinthfo 10:31.

2. Sɛ yeriyi atar bi a yɛbɛhyɛ a, ebɛnadze ntsi na ɔsɛ dɛ yɛdwen hɛn nuanom Christianfo ho?

Ɔwɔ mu dɛ yɛwɔ ho kwan dɛ yɛhyɛ atar biara a yɛpɛ dze, naaso ɔsɛ dɛ yɛdwen mbrɛ hɛn ntarhyɛ botum ahaw afofor no so ho. Ɔsɛ dɛ yɛbɔ mbɔdzen biara na yaannyɛ biribi a ɔbɛhaw afofor. Mbom no, ɔsɛ dɛ yɛyɛ dza yebotum biara yɛ dza ‘ɔsɔ hɛn nyɛnko enyi ma ne yieyɛ, na ɔyɛ ntowdo.’​—Kenkan Romefo 15:​1, 2.

3. Kwan a yɛfa do siesie hɛnho no besi dɛn ama nkorɔfo enyi agye ho dɛ wobosua Jehovah ho adze?

Ɔwɔ mu dɛ beebiara a yɛbɔkɔ biara, yɛbɔ mbɔdzen hyɛ ntar a ɔfata dze, naaso sɛ yɛrokɔ asafo nhyiamu anaa asɛnka a, ɔwɔ dɛ yɛhwɛ hɛn ahosiesie yie paa. Yɛmmpɛ dɛ nkorɔfo yi hɔn adwen fi asɛmpa a yɛdze nam no do osian hɛn ahosiesie ntsi. Mbom, yɛpɛ dɛ hɛn ahosiesie ‘hyɛ hɛn Agyenkwa nkyerɛkyerɛ no enyimnyam.’​—Titus 2:​10.

 PƐNSAPƐNSA MU KƆ EKYIR

4. Sɛ yesiesie hɛnho yie a, ɔkyerɛ dɛ yebu Jehovah

Ebɛnadze paa ntsi na ɔwɔ dɛ yɛhwɛ hɛn ahosiesie yie? Ma yɛnkenkan Ndwom 47:​2, na yensusu nsɛmbisa yi ho:

• Osiandɛ yɛyɛ Jehovah n’asomfo ntsi, ɔsɛ dɛ yesiesie hɛnho dɛn?

• Ehwɛ a, ebɛnadze ntsi na ɔsɛ dɛ yɛma kwan a yɛfa do siesie hɛnho kɔ asafo nhyiamu na asɛnka no ho hia hɛn? Ebɛnadze ntsi na ereka dɛm?

 5. Dza ɔbɔboa hɛn ma yeehu ntar a ɔfata dɛ yɛhyɛ nye kwan a ɔsɛ dɛ yɛfa do siesie hɛnho

Ma yɛnhwɛ VIDEO yi.

Sɛ ntar a yɛhyɛ no bo yɛ dzen o, no bo nnyɛ dzen o, ɔsɛ dɛ n’enyi tsew. Afei so ɔsɛ dɛ yɛhwɛ hu dɛ atar a yɛhyɛ no fata beebi a yɛrokɔ no. Ma yɛnkenkan 1 Corinthfo 10:​24 na 1 Timothy 2:​9, 10. Yewie a, yɛbɔhwɛ siantsir a ɔnnsɛ dɛ yɛhyɛ ntar a . . .

• wɔayɛ fi anaa ɔmmfata.

• ɔkyekyer hɛn pampee, ɔma hɛnho gu hɔ, anaa okenyan nda ho akɔndɔ.

Ɔwɔ mu dɛ Christianfo nnhyɛ Moses Mbra no ase dze, naaso yebotum ehu mbrɛ Jehovah tse nka wɔ ndzɛmba bi ho wɔ dɛm mbra no mu. Ma yɛnkenkan Deuteronomy 22:​5, na yensusu asɛmbisa yi ho:

• Ebɛnadze ntsi na ɔnnyɛ papa dɛ yɛma hɛn ntarhyɛ na hɛn ahosiesie ma sɛ yɛyɛ banyin a, yɛsɛ ɔbaa, anaa sɛ yɛyɛ ɔbaa so a, yɛsɛ banyin?

Ma yɛnkenkan 1 Corinthfo 10:​32, 33, na 1 John 2:​15, 16, na yensusu nsɛmbisa yi ho:

• Ebɛnadze ntsi na ɔsɛ dɛ yɛhwɛ yie na hɛn ntarhyɛ na hɛn ahosiesie aannto hɔn a wɔwɔ hɛn mpotamu anaa hɔn a wɔwɔ asafo no mu no fintsidua?

• Ebɛn ntarhyɛ anaa ahosiesie na etaa hu wɔ beebi a etse no?

• Ehwɛ a, dɛm ntar a wɔhyɛ nye kwan a wɔfa do siesie hɔnho no bi wɔ hɔ a ɔmmfata Christiannyi? Ebɛnadze ntsi na ereka dɛm?

 DZA ESUA

Sɛ yɛhyɛ ntar a ɔfata na yesiesie hɛnho yie a, ɔkyerɛ dɛ yebu Jehovah nye nyimpa afofor.

Mbobɔdo

• Ebɛnadze ntsi na hɛn ntarhyɛ nye hɛn ahosiesie ho hia Jehovah?

• Bible mu afotusɛm a ɔboa hɛn ma yehu afadze a ɔfata anaa kwan pa a ɔwɔ dɛ yɛfa do siesie hɛnho no, bi nye dɛn?

• Ebɛn kwan do na hɛn afadze botum ama nkorɔfo enyi aagye nokwar som ho anaa wɔato hɔn fintsidua?