E bane ni kakaokoro arora ni kunnikainira ao ni katamaroaira. Ngkana ti kakairi ni booto n reirei tabeua n te Baibara, ti kona iai n rinea ae ti kani bwainna ao ni kakukureia naba Iehova. Ti na rinanoi tabeua mai buakoni booto n reirei akanne.

1. Baikara booto n reirei aika a na kairi ara motinnano ibukini kunnikaira ao katamaroaara?

Ti riai n rinei “kunnikai aika tau, n te aro ae riai ma te iangoraoi,” ao ni kateimatoa itiakin taraakira bwa a aonga n norira aomata bwa ti “karinea te Atua.” (1 Timoteo 2:​9, 10) Iangoi booto n reirei aika aua aikai: (1) Ti riai ni bwaini kunnikai “aika tau” ke n taraaraoi. Ko bae n tia n nonoria n taini bobotaki n te ekaretia bwa a kakaokoro aroia ana aomata te Atua ni kunnikainia. Ma ti karinea Atuara n ara kunnikai ao n tein irara. (2) Arora ni kunnikainira n “te aro ae riai” e nanonaki iai bwa ti na aki tei ni kabwakabwaka ke ni kan taraaki iai. (3) Ti kaotiota “te iangoraoi” ngkana ti aki irira teini ke aeka ni kunnikai aika tatangiraki. (4) E riai n oti n taai nako n aron taraakira bwa ti “karinea te Atua,” bwa a aonga n norira aomata bwa ti taromauria te Atua ae koaua.​—1 I-Korinto 10:31.

2. A na kangaa n rotaki raora n te onimaki n aron taraakira?

E ngae ngke iai inaomatara n rinei oneara ake ti bon taku, ma ti riai n iaiangoa rotakia tabemwaang n aron taraakira. Ti kataa ara kabanea n tamaroa bwa ti na aki kauna temanna ma ti “karaoa ae raoiroi nakoia raora n aomata, bwa a aonga ni kateimatoaaki iai.”​—Wareka I-Rom 15:​1, 2.

3. A na kangaa n anaaki nanoia aomata nakon te taromauri ae koaua n aron taraakira?

Ngkai ti kataia ni kunnikainira n ae taraaraoi n taai nako, ti taratara raoi riki ma kunnikaira ngkana ti kaei bobotaki n te ekaretia ao n uataboa te mwakuri ni minita. Ti aki tangiria bwa ti na katikaanako aia iango aomata man te rongorongo ae raoiroi are ti tibwaia nakoia, tii man taraakira. N oneani mwin anne, e kona aron taraakira n anaaki riki iai nanoia aomata nakon te koaua ao “ni karekea kamoamoaan ana reirei ara tia Kamaiu.”​—Tito 2:10.

 REIAKINA AE BATI RIKI

4. E karineaki Iehova n aron taraakira ae raoiroi

Tera bukina ae moan te kakawaki ae ti riai n tabeakina iai aron taraakira? Wareka Taian Areru 47:​2, ao maroroakin titiraki aikai:

• E na kangaa ataakin ae ti tei ibukin Iehova n rota arora ni kunnikainira?

• N am iango, e riai bwa ti na tabeakina aron taraakira ngkana ti kaei bobotaki ao n uataboa te mwakuri ni minita? Bukin tera?

 5. Arora ni karaoi motinnano aika raraoi ibukini kunnikaira ma katamaroaara

Kaota te TAAMNEI.

E ngae ngkana a bobuaka ara kunnikai ke a aki, ma a riai n itiaki ao n taraaraoi ibukini botaki ake ti iri. Wareka 1 I-Korinto 10:24 ao 1 Timoteo 2:​9, 10. Ao maroroakinna bwa e aera ngkai ti riai n rarawa ni bwaini kunnikai aika . . .

• a aki itiaki ke a aki taraaraoi.

• a koro tiki, a mmani, ke ni kabwakabwaka.

E ngae ngke a aikoa mena Kristian i aan te Tua Rinanoni Mote, ma a kona n reiakina ana iango Iehova mai iai. Wareka Te Tua-Kaua 22:​5, ao maroroakina te titiraki aei:

• E aera bwa ti riai n rarawa nakoni kunnikai ao katamaroa aika a riki n aine iai mwaane, ke a riki ni mwaane iai aine?

Wareka 1 I-Korinto 10:​32, 33 ao 1 Ioane 2:​15, 16, ao maroroakin titiraki aikai:

• E aera bwa ti riai n tabeakina aron taraakira ngkana a aki kukurei iai kaain rarikira ke kaain te ekaretia?

• Aekakira teini kunnikai ao katamaroa aika bwabwainaki n am tabo?

• Iai mai buakon teini kunnikai akanne aika e aki tau ibukin te Kristian? Bukin tera?

 KAKIMOTOTOANA

Ngkana ti karaoi motinnano aika raraoi ibukin aron taraakira, ti karinea iai Iehova ao tabemwaang.

Kauring

• E aera bwa e kakawaki kunnikaira ao katamaroaara iroun Iehova?

• Baikara booto n reirei tabeua aika a na kaira ara motinnano ibukin aron taraakira?

• E na kangaa aron taraakira n rota aia iango tabemwaang ibukin te taromauri ae koaua?