Dénè bẹ̀ì ólò sà íb kọ̀là ló eé nveà nè bé eé síá tóm ló naa. Be à gá náa vaá è tú gbò nòòkúu ea di mm̀ Kpá Káí siimá tóm, èé nveà gbò nú ea léémái vaá leemá nágé Jìhóvà. Naa èé ló bel boo sìgà nòòkúuí.

1. Mókà gbò nòòkúu ní ea bọ́ló kọ é siimá tóm tṍó e gé sa nú eé nveà nè bé eé síá tóm ló naa ẽ́?

À bọ́ló kọ é ‘nvèà kọ̀là ló ea é nveèi ka ló, bọ́i ló, vaá kyãa boo kúu,’ vaá olòó õoa ló kọbé gbò nen mon kọọ̀ è ‘síìà pọ̀ ló Bàrì.’ (1 Tímotì 2:9, 10) Bugi togó boo ténì kà nòòkúuí: (1) À bọ́ló kọọ̀ nú e nvèà á ‘nvèèi ka ló.’ Dì belí bé eo ni mon gbẹá nònù naa, gbò níí Jìhóvà ólò nvèà kele-kele íb kọ̀là ló, sõò nú e nveà nè bé e sẹẹà gyáa naa zógè kọọ̀ è nveè ka ló Bàrì e gé fã. (2) Ge nvèà nú ea ‘bọ́i ló’ tõó dọ̀ kọọ̀ née é nveà nú mm̀ sĩ́deè ea é náa kọọ̀ nen á ié tàn ge kunái àbèè kọọ̀ à bọọgẹ̀ kolí bùlà gbò nen mái. (3) È zógè kọọ̀ è nveà nú ea ‘kyãa boo kúu’ tṍó e née nveà kọ̀láá íb nú ea gé téní. (4) À bọ́ló kọọ̀ bé e nveà nu naa á naa kọ gbò nen á nyimá kọọ̀ è ‘síìà pọ̀ ló Bàrì.’—1 Kọ́rìnt 10:31.

2. Mósĩ́ deè ní e bẹẹ nvèà nu é láá tọá ló pá vígà ẹ?

Náa kal ló béè kọọ̀ è íè dì pọ́ì ge sààmà íb nú eé nveà, à bọ́ló kọ é bugi togó boo bé e nú e nveà é láá tọá ló dõòna gbò naa. Tãa vó e náà nú ea é kyẽ́ dõòna gbò, è ólò pììgà bé e bẹẹ kpóó sim tùlà naa gè “naa nu ea é léémá [bẹẹ] nen vaá leeé ló, nè ge sièe kpóó ló.”—Bugi Róm̀ 15:1, 2, NW.

3. Mósĩ́ deè ní e bẹẹ nvèà nu é láá naa kọọ̀ gbò nen á fã̀ Jìhóvà ẹ?

È ólò pììgà ge nvèà nú ea bọ́ló siimá kọ̀láá ketõ̀ò, sõò è ólò mòn kọọ̀ nú e nveà siimá nònù nè tṍó e gé kọ́ kpẹ̀a palàge bọ́ló. Née gbĩ́ì kọọ̀ bé e nveà nu naa á maaná bùlà gbò nen lọl ló lé kpẹ̀a e fáàlà domá. Tãa vó, è gbĩ́ì kọọ̀ bé e nveà nu naa á naa kọọ̀ gbò nen á gbĩ́ gè fã̀ Bàrì vaá nvèè “ka ló nòòmànù bẹẹ Neǹ Dùùà.”—Táítọ̀s 2:10, NW.

 KPÁÁ NÓ BỌ̀Ọ̀VẸ̀

4. Tṍó e nveà nú ea bọ́ló, è zógè kọọ̀ è nveè ka ló Jìhóvà

Éé ní ea náa kọ é palàge ẹ̀b nú ea kil ló bé e nveà nu naa ẽ́? Bugi Psalm 47:2, vaá ò gbóó aalai gbò bíbví:

• Mó íb nu ní eé sa gè nvèà tṍó e kẽeà boo kọọ̀ bé e nveà nu naa tọ́á ló bé e gbò nen ẹb Jìhóvà naa ẽ́?

• É kọ à dú nú e nyìmànù di m gè bugi togó boo íb nú eé nveà siimá nònù nè tṍó e gé kọ́ kpẹ̀a? Be ò náà ẽei àbèè ẽ́èe, ló éé?

 5. Éé ní ea é láá nvèè bá nèi kọ é sà lé nu gè nvèà ẽ?

Bìlà VÍDIÒÍ.

Kọbèè à gá náa vaá kọ̀là ló e nveà à sí kpègè àbèè kọ náa náa vó, à bọ́ló kọ á di õ̀òa vaá bọ́ló kiẽ́e e síì. Bugi 1 Kọ́rìnt 10:24 nè 1 Tímotì 2:9, 10, vaá ò gbóó loi sọ́l boo nú ea náa vaá née é nveà kọ̀là ló ea . . .

• dú dĩ́ àbèè kọ náa nveèi ka ló.

• bọọgẹ̀ biíi, ní e náa gṍi kpá ló, àbèè kọ à náa kọọ̀ gbò nen á ié tàn ge kunái.

Náa kal ló béè kọọ̀ gbò níí Kráìst á gé ná kèbá Log Mózìs, gbò logá é láá naa kọ bàá nyimá bé e Jìhóvà bugi togó naa. Bugi Dìtolónomì 22:5, vaá ò gbóó aalai nakà bíbví:

• Éé ní ea náa vaá náa bọ́ló kọ é nvèà nu àbèè ge sẹ̀ẹ̀à gyáa ea é náa kọọ̀ págbálà á belí pábia àbèè kọ pábia bélí págbálà ẹ?

Bugi 1 Kọ́rìnt 10:32, 33 nè 1 Jọ́ọ̀n 2:15, 16, vaá ò gbóó aalai gbò bíbví:

• Éé ní ea náa vaá à bọ́ló kọ é gbĩ́ gè nyimá kọbèè bé e nveà nu naa náa léémá gbò e bà di kiẽ́e e dì àbèè pá vígà e bà di mm̀ bõ̀ònatõ̀ò ẽ?

• Mókà nvèà nu àbèè ge sẹ̀ẹ̀à gyáa ní ea tọla kẽ kiẽ́e eo dì e?

• É kọ à bọ́ló kọọ̀ nen ea gé nyoone nvéè Kráìst á nvèà sìgà nuá? Be ò náà ẽei àbèè ẽ́èe, ló éé?

 NÚ E NI NÓ

Tṍó e nveà nú ea bọ́ló, è zógè kọọ̀ è nveenìè ka ló Jìhóvà nè dõòna gbò.

Ge Òòa Boo

• Éé ní ea náa vaá bé e nveà nu vaá siá tóm ló naa à bọọ ló Jìhóvà ẹ?

• Mókà gbò nòòkúu ní ea bọ́ló kọ é siimá tóm tṍó e gé síá tóm ló é?

• Mósĩ́ deè ní e bé e síà tóm ló naa é láá tọá ló bé e dõòna gbò ẹb kà kà fã̀ naa ẽ́?