ƝAAKWƐLƐI 52
Lə mɛni ɓa gu maayili pələ da gu kpɛtɛ pələ maamɛni wala-walai
Yii hwilɛn na gu maayili pələ ɓa da gu nwuɔ nwun kpɛtɛ pələ gu tɛi-tɛi kəlee gu liiɓa kaa ma. Kəlaa gwa lɛɛ Biblə ŋɔ liɛwooɠaa pulu gwa pɛli gu gu maayili pələ həɠə ɉu a nɛlɛɛ ə lɛɛ gu wɛli a too Zehova ɓa. Dɔn-wooɠaai vilɛnŋaa gu maayili pələ ɓa gu daɠaa kaa.
1. Biblə ŋɔ liɛwoo ləkɛɛɠaa ɓə da pɛli di gu tənəndɔɔ gu maayili mɛni hu ?
Maanɛɛ gu maayili pələ ə kɛ a “ bɛliɛ ɉu, a nɛlɛɛ, a gu maa hon pələ, ” ə lɛɛ gu maahəɠə pələ yɛ nɛ yɛ gu kaa a nuai da di wɔ “ lɛɛ nwoo mu laa lɛ Yálá ɓa ” (Timote dɔlɔɔ 2:9, 10). Dɔn-nwoo naan ŋɛi vɛlisɛɛɠaa ŋɛi hu gu di kaa : 1) Maanɛɛ gu maayili pələ ə kɛ a “ bɛliɛ ɉu. ” Yɛ́ pələi yaa gaa la ku wɔ ŋaakpɔnŋaa diɛ Zehova batoonua di maayili pələ ho ɉu tanɔn. Kəlaa di maayili pələ, di nwuɔ nwun gbɛtɛ pələ a nɛ yɛ ma Ɲálái ŋɛi da kɛ matooi da maawiɛ. 2) Da kɛ ma gu gu maayili “ a nɛlɛɛ ” yili mukulaa ɓaa maahonɛɛli gu ho gu maayili a pələ ta yii a nua ɲɛikulɔ gu pɔ a ɲɔnwɔɔ awala kɛtii yii a nua ɲɛi hee guɔ. 3) Da kɛ ma gu gu maayili “ a gu maa hon pələ ” maayili huwu lɔpee gəlee hwəi maanɛɛ gu gu yee hee mu. 4) Maanɛɛ gu maayili pələ yɛ gu wɔ “ lɛɛnwoomulaa lɛ Yálá ɓa a lowai lɔpee, ” yɛ nɛ nu takpɛliɠaa diɛ yɛ ma gu kaa a Yálá leelee ɓatoo nua (Korɛntə dɔlɔɔ 10:31).
2. Lə ɓə gu maayili pələ a pɛli ə gɛ gu nan nonnii diɛ ?
Gu tɛi-tɛi kəlee ɓə gwa gu maayili pələ həɠə ɉu, kəlaa gwa kɛi gu maayili, maanɛɛ gu gu kiliŋahiɛ yii gu maayili pələ a pɛli ə gɛ nu takpɛliɠaa diɛ. Gwa mɛni kəlee kɛ ə gɛ gu maayili pələ ho nwana nu takpɛliɠaa diɛ, yaamun gwa “ gu kiliŋahiɛ gu ɓəlaa di wɔ mɛni lɛlɛɛ ɓa ə gɛ, gu di tɛ tɔwɔ laanalaa pələ mɛi ” (Romə 15:1, 2 ɓo).
3. Gu maayili pələ a Zehova ɓatoo wɛli too ləi nu takpɛliɠaa diɛ ?
Gwa gɛ pələ kwɛli ma gu maayili pələ ə kɛ a bɛliɛ ɉu a lowai kəlee, ə lɛɛ gwa kɛi li gu wɔ ŋaakpɔnŋaa diɛ awalakɛtii guɔ li Yálá Lawoo laahəlii, gwa gu maayili pələ həɠə ɉu kpɔ nwɔnɔ a nɛlɛɛ. Maahonɛɛli gu maayili pələ ə gɛ nwɛlɛɛ woo maamɛni wala-wala ŋɛi gu kaa naahəlii nua diɛ ə di ɲɛi həɠə ma. Yaamun gu maayili pələ a pɛli ə gɛ Yálá Lawoo wɛli ə too nua diɛ, ə lɛɛ ə gɛ “ laa na laa pələi ŋɛi vilɛnŋaa gu Nwun maaɓo mun Yálá ɓa maa ə wiɛ ” (Titə 2:10, Ɉɛɓɛ yili ninɛ).
Ə́ WƆ MƐNIKƆLƆNŊAA TA PƐLƐ MA
Gaa yii maanɛɛ gu gɛ ə gɛ gu maayili pələ da gu kpɛtɛ pələ yɛ nɛ yɛ ma gu kaa a kilistalon.
4. Gu maayili pələ a nɛlɛɛ a nɛ yɛ ma gwa Zehova maawiɛ
Lə mɛni ɓə toloo a gɛ guɔ gu maayili a nɛlɛɛ ? Maatɛnɛ 47:3 ɓo [47:2, NWT] ə lɛɛ ka lono kɛ gɛɛmaalənŋaa ŋɛi mɛi :
-
Zehova laa kɛ mɛni guɔ a gɛ ləi guɔ pɛli gu maayili pələ həɠəi ɉu ?
-
Ə́ wɔ kili ɓa mɛni wala-wala ɓaa gwa kɛi li ŋaakpɔn ɓa awala kɛtii Yálá Lawoo laahəlii gu gu maayili a nɛlɛɛ ? Lə mɛni ɓa ə́ kaa moi tii ?
5. Tɔn-nwooɠaai da kpɔnmaa tɛɛ gu pɔ gu gu maayili pələ həɠə ɉu a nɛlɛɛ
Gu maahəɠəɠaa hɔnwɔn ə kɛnɛ, ə tikpə, yii maamɛni wala-walaa yaa ɓaa ə kɛ a maa həɠɛɛ, ə lɛɛ ə kɛ a bɛliɛ ɉu yɛ hwilɛn na gu kɛ kóló ɓa. Korɛntə dɔlɔɔ 10:24 da Timote dɔlɔɔ 2:9, 10 ɓo. ə lɛɛ ka gaa lə mɛni ɓa maahonɛɛli gu həɠə ta too yii...
-
gbɔliɛ, awala kɛtii naataɠaa ɓəlaa, awala nwɔnɔ kɛtii yɛ ɓo huwuɲɛ-huwuɲɛ.
-
a kɛ a naŋanŋaa gu kɔlɔ ɓa kpɔ kɛnɛ, awala kɛtii gu həɠə ta too yii a wɛlimɛni maakiliŋahiɛ too nua diɛ.
Pələi ma kilistalea di ho la Moisə ŋɔ tɔn mun, dɔn-nwooɠaa tii da Zehova kiliŋahiɛ pələ lɛ. Dɔ́n ɉɛɓɛ 22:5 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Maayili huwuɠaa da nwun gbɛtɛ pələɠaa yii a pɛli ə hulɔnu kɛ yɛ a kɛ a nɛɛnu, awala kɛtii ə nɛɛnu kɛ yɛ a kɛ a hulɔnu, lə mɛni ɓa maanɛɛ gu di lɛɛ laa ?
Korɛntə dɔlɔɔ 10:32, 33 da Ɉaan dɔlɔɔ 2:15, 16 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə mɛni ɓa maanɛɛ gu gɛ a nɛlɛɛ ə gɛ gu maayili pələ ho kɛ nwanai gu heeyɔwɔɠaa diɛ awala kɛtii da gu nan nonnii diɛ galan kpɔn ɉu ?
-
Ɓɛi ə́ kaa laa maayili huwu ləkɛɛɠaa ɓə nua da gɛ laa ?
-
Ə́ wɔ kili ɓa maayili huwuɠaa tii taɠaa kaa laa yii maahonɛɛli kilistalon ho gɛ ? Lə mɛni ɓa ə́ kaa moi tii ?
NUTAƓAA DA KƐ KƐI MA : “ Pələi lɔpee ŋa kɛ bɔ ŋi maayili la bələ ɓə ŋa maayili la. ”
-
Bələ ɓə ya ə́ kiliŋahiɛ la ? Lə mɛni ɓa ə́ kaa moi tii ?
YII GU GALAN
Gwa gu maayili pələɠa həɠə ɉu a nɛlɛɛ gwa nɛ guɔ ma gwa Zehova maawiɛ, da nu takpɛliɠaa.
Nɛɛ ə́ kili pɔ
-
Lə mɛni ɓa gu maayili pələ kaa a mɛni wala-wala Zehova ɲɛi ɓa ?
-
Biblə ŋɔ tɔn-nwoo ləkɛɛɠaa ɓə da pɛli di gu tənəndɔɔ yɛ hwilɛn na gu maayili pələ ɓa ?
-
Gu maayili pələ a pɛli ə gɛ nua di Yálá batoo pələ kaa ləi ?
MƐNI TAKPƐLIƓAA
Gaa pələi nu takpɛliɠaa da pɛli di kiliŋahiɛ la yɛ hwilɛn na ə́ maayili pələ ɓa.
Lə mɛni ɓa maanɛɛ gu gu kiliŋahiɛ guɔ təɠa pa pɔɔ ta awala kɛtii maaninin da kɛi gu kɔlɔ ɓa ?
Biblə ŋɔ tɔn-nwoo takpɛliɠaa kaa diɛi da gu tənəndɔɔ guɔ pɛli mɛni lɛlɛɛɠaa həɠəi ɉu.
“ Ə́ maayili həɠəɠaa da Yálá maawiɛ ? ” (La Tour de Garde, septembre 2016)
Nɛɛnu ta yii kɛ bɔ ə Yálá liiɓa kɛ ə́ ɲaakaa yɛ ma maalaa kaa nu kəlee yəi diɛ pɛli di maayili pələ həɠəi ɉu ?
“ Ə kɛ gwə́i ho kɛ pɛli li ɉu nu yɛ maayili kpɔ a nɛlɛɛ ” (Réveillez-vous !, 22 décembre 2003)