EKIRAJAAYA 52
Anainjatü sukuwaʼipa waʼanaaya
Naatayaa müsü sukuwaʼipa washeʼinpala jee sukuwaʼipa waʼanaaya. Eesü süpüla waʼatüin wanain tü kuluulu kamalainkat wamüin, jülüjainjatpejeʼe waaʼin tü sümakat tü Bibliakat süpüla talatüin naaʼin Jehová watuma. Wekirajaa süchiki tia.
1. ¿Jeʼtsü tü pütchi jülüjainjatkat waaʼin süpüla anain waʼanaaya?
Anainjatü sukuwaʼipa nüsheʼin wanee anoujashi, anainjatü naʼanaaya otta laülaainjatü naaʼin. Anainjatü naʼanaaya süpüla shiyaawatünüin aaʼu nuʼwaajüin Maleiwa (1 Timoteo 2:9, 10, TNM). Anuu pienchisü pütchi wayaawataka sünainjee tia wetsiikulokot. (1) Anainjatü sukuwaʼipa washeʼin. Naatayaa müsü sukuwaʼipa nasheʼinpala na suluʼukana nupueulose Jehová maʼaka piʼrüin shia sünain tü outkajawaakat. Jaʼyainjatpejeʼe waaʼu kojutuin wamüin chi Maleiwa waʼwaajakai sükajee anain sukuwaʼipa washeʼin otta anain shipeinajaaya waʼwala. (2) Anainjatü sukuwaʼipa waʼanaaya. Nnojotsü ichechoinjatüin washeʼin wanain suulia sünanajüin waya wayuu. (3) Laülaainjatü waaʼin. Laülaasü waaʼin wanaa sümaa nnojoluin waʼatamaatüin wanain wanee kuluulu eekai jeketüin ojuʼitüin. (4) Jaʼyainjatü saaʼu waʼanaaya waʼwaajüin chi Maleiwakai. Müle shia watuma, nayaawateerü aaʼu na wayuukana waʼwaajüin chi Maleiwa shiimainshikai (1 Corinto 10:31).
2. ¿Jameerü nanüiki na wawalayuukana sünainjee waʼanaaya?
Mayaainjeʼe wayain aneeküin tü kuluulu waʼatüinjatkat wanain, jülüjainjatü waaʼin waʼanaaya suulia mojujain shia namüin na waneinnua. Müsüjeseʼe wachajaainjatüin sukuwaʼipa süpüla nnojoluinjatüin mojuin namüin na waneinnua tü waʼanaayakat. Woonoo sümaa pütchikat tüü: «Shia anaka aluʼu müleka wakaaliijale na wawalayuukana sümaa wachecherüinjatüin naaʼin süpüla katsüinjatüin tü nanoulakat» (paashajeʼera Roma 15:1, 2).
3. ¿Jamüshii nekirajaajeenaka na wayuukana nüchiki Jehová anale waʼanaaya?
Woʼunajaapa jalapünaa yaa, washaitapa jee waaʼinrapa waneirua kasa, waʼatüinjatü wanain tü kuluulu anakat süpüla waʼatüin soʼu tia. Jülüjainjatpejeʼe waaʼin jeʼtsüinjatüin tü kuluulu waʼatüinjatkat wanain woʼunapa sünain tü outkajawaakat otta sünain aküjaa pütchi. Mojule washeʼinpala sünain aküjaa pütchi, nnojoleerü jaralüin aapajeein wanüiki, ¿aashin nnojoluin wacheküin tia? Shia keeʼireeka waaʼin nekirajaain na wayuukana sünain tü shiimainkat nüchiki Maleiwa otta kapülain naaʼin «tü pütchi wekirajakat anain, tü nüchikikat chi Maleiwa Oʼtteʼerüikai waya» (Tito 2:10).
WEKIRAJAA SOOʼOMÜIN
Wekirajaa sünain jamüinjatüin sukuwaʼipa washeʼin jee waʼanaaya süpüla nayaawatüin saaʼu na wayuukana wanoujain nünain Maleiwa.
Anale waʼanaaya süpüla yootuin waya nümaa wanee aluwataai, weeʼiyatüin nujutu wamüin. Mayaainjeʼe shiain jülüjain naaʼin Jehová tü suluʼukat waaʼin, jaʼyainjatü waaʼu kojutuin nia wamüin sükajee waʼanaaya.
4. Kojutushi wamüin Jehová anale wayolojo waʼanaapa
¿Jamüsü jülüjainjatka waaʼin anainjatüin waʼanaaya? Jaashajeʼera Salmo 47:2 otta yooto jia süchiki tüü:
-
¿Jamüinjatü sukuwaʼipa waʼanaaya süka sütüjaain aaʼu wayuu waʼwaajüin Jehová?
-
¿Choʼujaasüche anainjatüin sukuwaʼipa waʼanaaya woʼunapa sünain tü outkajawaakat otta sünain aküjaa pütchi? ¿Jamüsü choʼujaaka shia?
5. Waaʼinrajatka süpüla anain sukuwaʼipa washeʼin otta sukuwaʼipa waʼanaaya
Nnojotsü shiainjatüin jülüjain waaʼin jeʼrain sülia washeʼin, shia jülüjainjatka waaʼin wuleinjatüin shia otta jeʼtsüin tü anakat süpüla waʼatüin wanain woʼunajaapa jalapünaa yaa, washaitajaapa jee waaʼinrapa waneirua kasa. Jaashajeʼera 1 Corinto 10:24 otta 1 Timoteo 2:9, 10. Süchikijee, yooto jia süchiki jamüin nnojoluinjatka...
-
... yarüttüin washeʼin sümaa jotoolin shia.
-
... arülachoin washeʼin sümaa waʼatüin wanain kuluulu eekai nnojoluin suunjulüin watapaʼa.
Mayaainjeʼe nnojoluin waaʼinrüin tü sümakat tü Pütchi Aapünakat nümüin Moisés, wayaawata aaʼu tü keeʼireekat naaʼin Jehová wapüleerua. Jaashajeʼera Deuteronomio 22:5 otta yooto jia süchiki tüü:
-
¿Jamüsü mojuka müle naʼanaaya wanee toolo maʼaka saaʼin saʼanaaya wanee jierü? ¿Jamüsü mojuka müle saʼanaaya wanee jierü maʼaka saaʼin naʼanaaya wanee toolo?
Jaashajeʼera 1 Corinto 10:32, 33 otta 1 Juan 2:15, 16 otta yooto jia süchiki tüü:
-
¿Jamüsü jülüjainjatka waaʼin sukuwaʼipa waʼanaaya suulia mojuin shia namüin na wawalayuukana otta namüin na wayuu kepiakana pejepünaa wanain?
-
¿Jamüsü sukuwaʼipa nasheʼinpala otta naʼanaaya na wayuu kepiakana pejepünaa pünain?
-
¿Jamüsü nnojotka anain müle washeʼin maʼaka saaʼin nasheʼinpala?
Naatayaa müsü sukuwaʼipa washeʼinpala jee sukuwaʼipa waʼanaaya. Jülüjainjatpejeʼe waaʼin anale shia noʼuluʼu Jehová.
EESHII WAYUU EEKAI NAMÜIN: «Jaʼitairü mojuin taʼanaaya, suluwataainche joo taya wayuu».
-
¿Jamüsüjaʼa pünüiki süchiki tia?
WATÜJAAITPAKA AAʼU
Anale sukuwaʼipa washeʼin otta anale waʼanaaya, weeʼiyatüin nujutu Jehová wamüin otta nojutu na waneinnua.
Pusouta shiʼipajee
-
¿Jamüsü anainjatka sukuwaʼipa waʼanaaya?
-
¿Jeʼtsü waneirua pütchi jülüjainjatka waaʼin süpüla anain sukuwaʼipa waʼanaaya?
-
¿Jameetche nanüiki na waneinnua nüchiki Jehová mojule sukuwaʼipa waʼanaaya? ¿Jama anale sukuwaʼipa waʼanaaya?
PÜNAʼLA SOOʼOMÜIN
¿Jameetche sünüiki wayuu wachiki mojule washeʼinpala? Paashajeʼera süchiki tia.
«¿Jamüsüche sünüiki wayuu süchiki sukuwaʼipa taʼanaaya?» (Pütchi suluʼuka jw.org)
Anuu süchiki tü eekat süpüla sülatüin wamüin sünainjee weʼiteʼerüin tatuaje watouta.
«¿Anasüche weʼiteʼerüle tatuaje watouta?» (Pütchi suluʼuka jw.org)
Pikirajaa süchiki waneirua pütchi piyaawateetka anainjee anale jee mojule noʼuluʼu Jehová paʼanaaya.
«¿Kojutushiche Maleiwa sutuma sukuwaʼipa waʼanaaya?» (Aapiria Wayuu, settienpüroʼu 2016)
Anuu süchiki tü saaʼinrakat wanee wayuu mojuka amüin paala naʼanaaya na waneinnua.
«Mojupuʼusü tamüin sukuwaʼipa naʼanaaya na waneinnua» (¡Eeja Waaʼin!, tisienpüroʼu 22, 2003)
Eesüjaʼa kamalainjeerüle pümüin aashajeʼeraa tüü
SÜSAKIRAWAIKA ANAIN WAYUU
¿Jamüsü sukuwaʼipa shikirajia wayuu sünain tü Bibliakat natuma na Aküjaliikana pütchi?
Pikirajaale sünain tü Bibliakat namaa na aküjaliikana pütchi nüchiki Jehová, eesü süpüla pikirajaain süka tü Biblia eekat pümaʼana otta puunejaain püpüshi jee paʼaleewainyuu.
