ˈCƖAANDHƐ- 52
Dhɛɛdɩ- -aaˈ -nɩnsʋn -e -aaˈ dhɛmʋnpaasʋn -kɔn dɩ -ɛ?
-Aaˈ klɛɛ ˈbhleɛ dhɛmʋnpaasʋn -ʋan- nʋn -aʋ ˈtʋn. -Bho -aa sa Biiblʋ aˈ ˈsrɩn ˈjhriɛ ˈˈdu ɛˈ, ˈmʋnpaadhɛ- -ɛɛ nʋan -aʋ ˈtʋn ɛn, -a ˈbhɛɛ -a ˈyeɛ ˈo -za ˈˈdhe -a ˈye ˈe Zoova ˈˈjhriɛ ˈdhei -nmɔn -ke. ˈSrɩn -ˈnɩn ɛnˈ, -a ˈtmʋn ɩanˈ -ˈnɩɩn anˈ dɩ.
1. ˈSrɩn -wɛ ˈyea -aʋ sʋn bho po ˈdhe -aaˈ ˈmʋnpaadhɩ aˈ dɩ ˈdhi -ɛ?
-A ˈye ‘ˈmʋnpaadhɛ- nmɔan ˈo dhi -za, ˈdhe ˈˈjɛjhajhaa- -e tɔˈ i zela- ˈmʋn,’ ˈˈdhe -a ˈye feɛn- jheejhee -wɛeˈ ɲʋn ˈyeɛ ˈˈkpei ˈjhe -ka -a ‘kpʋan ˈbho Ɲɔnsoa ˈˈbun in ɛn.’ (1 Timothée 2:9, 10) ˈSrɩn anˈ kpɛ ɲiɛn nɩan ˈe Biiblʋ aˈ ˈˈjhriɛ nɛn ˈdhi ɛ, -a ˈtmʋn ɩanˈ dɩ: (1) -Aaˈ ˈmʋnpaadhɩ- ˈye ˈo “dhi -nmɔn.” -Bho mun ˈdhe -aaˈ ˈˈdhruigbooɛ ˈmʋn kpɔ dhueˈ ɛˈ, -ka Zoova aˈ ˈcɛ ɛˈ dhɛmʋnpaasʋn sea dhɛ dhueˈ -nɩn ɛn, -man ˈjhe ɛˈ. -Bho ʋaˈ dhɛmʋnpaasʋn se dhɛ dhueˈ -nɩn -mɔnˈ -dhe ɛˈ, ʋaˈ ˈmʋnpaadhɩ -e ʋaˈ ˈˈmɩɩncɛnsʋn an toɛˈ -ka ʋa ˈjhea Zoova ŋwɔn. (2) “ˈˈJɛjhajhaa-” a nʋɛnˈ -aaˈ -paa dhɛ -ɛ ˈyea ɲʋn tɔˈ -saʋn -gwlɩˈˈ po -aeˈˈ -ɛ ˈyeɛ nʋn -wɛeˈ ɲʋn ˈyea -aaˈ ˈsʋ i ˈjhe ˈmʋn. (3) “Tɔˈ i zela” a nʋɛnˈ ˈmʋnpaadhɩ- -e dhɩjhrigbɔiposʋn -ɩan- ˈˈsia ˈzɔn jheejhee ɛ, -aaˈ ˈkpa ɩanˈ -kʋɔn. (4) -Bho -aa sa feɛn ɛnˈ, ɛɛ toɛˈ -ka -a “kpʋan ˈo Ɲɔnsoa ˈˈbun in.” ˈˈDhe ɛɛ muɛn -nʋn -ke ɲʋn ˈyɩ jhibho- -ka -aa ˈˈɲɩan Ɲɔnsoa ˈjɔɔn.—1 Corinthiens 10:31.
2. Dhɛwɛ- -aaˈ dhɛmʋnpaasʋn ˈbhɛɛ ʋn ˈye -aaˈ ˈdhoudhi -ˈˈwe ˈˈdhrui nʋn -ɛn?
Dhɛ -a ˈyea ˈo -za -a ˈyea ˈmʋn -paa a, -bho ɛɛˈ dɩ -nɩn ˈdhe -aaˈ ˈˈjɛ ˈkwa -mɔnˈ -dhe ɛˈ, dhɛ ɛ ˈbhɛɛa ɛ ˈyea -aaˈ ˈdhoudhi -ˈˈwe ˈˈdhrui nʋn ɛn, ɛ -kɔndɩ -a ˈyeɛ tɔˈ ˈˈkpei -naan. -Aa poɛ ˈe ˈkpɩ -wɛeˈ -aaˈ dhɛmʋnpaasʋn -saˈ ɲʋn tɔˈ -saʋn -gwlɩˈˈ po. Ɛmɛn- dɩ dhɛ ˈbhɛɛa -ɛ -ˈyea “-aaˈ -boɲiɔn ɔnˈ dhɛjɛɛn -nɩn -e -ɛ ˈyeɔ ˈkpɩ po ɛ,” -aa nʋɛn.—Zro Romains 15:1, 2.
3. -Kawɛ -aaˈ -nɩnsʋn ˈbhɛɛ ʋn ˈyeɛ nʋn ɲʋn ˈye Zoova aˈ ˈˈɲɩan in ˈbɔn -ɔn?
-Aa paa dhɛ ˈmʋn -kajɔɔnka jheejhee. ˈKlaa ˈnɔn -jɔn -aa paa dhɛ ˈmʋn -kajɔɔnka gblein ɛn, ɛ ˈdhe ˈˈdhruigbooɛ- ˈmʋn -e ˈdhe -babhlaaˈ. -Bho -a -nɩn ˈe -bobhlaa aˈ, -aaˈ dhɛmʋnpaasʋn anˈ nʋɛnˈ -dhe ɲʋn an tɛɛn -bo -aa bhla bho ˈdhe-. Dhɛ -aa ˈbɔan -mɛn -nɩn, -aaˈ dhɛmʋnpaasʋn ˈye ‘Ɲɔnsoa aˈ ghwlu aˈ ˈˈjhriinmɔɛn- ˈˈkpe po’ ˈˈdhe ʋn ˈyeɛ nʋn ɲʋn ˈyeɔ ˈˈɲɩn.—Tite 2:10.
KPA DHƐ I ˈŊWƆƐN ƝAN
-Ka -a ˈyea nʋn -wɛeˈ -aaˈ ˈmʋnpaadhɛ- -e -aaˈ -nɩnsʋn ˈyeɛ -to -ka -a nɩan kletiɛn ɛn, ɛmɛn- -aa mun ˈcɩan-.
-Aaˈ dhɛmʋnpaasʋn ˈyeɛ -to -ka -aa ˈjhea ˈbhlʋɩbhleʋn- ŋwɔn. -Bho Zoova a sa ˈe ɲɔn ɔnˈ -pɛɛ bho i ˈjhe -mɔnˈ -dhe ɛˈ, -aaˈ dhɛmʋnpaasʋn ˈyeɛ -to -ka -aa ˈjheɔ ŋwɔn.
4. -Aaˈ -nɩnsʋn an ˈbhɛɛ Zoova ˈˈɩ
Dhɛɛdɩ- -a ˈye -aaˈ -nɩnsʋn anˈ dɩ ˈˈdu gblein -ɛn? Zro Psaume 47:2, -ˈmɛn aʋ ˈtmʋn ideedɩ- nɩn anˈ dɩ:
-
Dhɛ -aa ˈˈɲɩan Zoova a, dhɛɛdɩ- -a ˈye -aaˈ ˈmʋnpaadhɩ aˈ dɩ ˈˈdu ɛɛˈ dɩ -ɛ?
-
ˈBhoo- -gwlɩˈˈ ˈdhee, ɛ -kɔndɩ -a ˈye -aaˈ -nɩnsʋn anˈ dɩ ˈˈdu ˈdhe dhruigbooɛ ˈmʋn -e ˈdhe -bobhlaaˈ? Dhɛɛdɩ- -ɛ?
5. ˈSrɩn -a ˈyea ˈˈjhriɛ ˈˈdu ˈdhe -aaˈ -nɩnsʋn -e ˈmʋnpaadhɩ aˈ dɩ ˈdhi
-Ka -aaˈ ˈmʋnpaadhɩ aˈ sɔɔnˈ ˈjhe ɩn -dɩ -mɔnˈ -dhe ɛˈ, ɛ se ɛmɛn- -ɛ -kɔndɩ -nɩn. Ɩn ˈye feɛn- ˈˈdhe ɩn -nɩn dhɛ -aa nʋan ˈye ˈˈjhrii gʋʋɔ-. Zro 1 Corinthiens 10:24 -e 1 Timothée 2:9, 10. -ˈMɛn dhɛ nɩan ˈo -wɛeˈ -aaˈ paa ˈmʋnpaadhɛ-...
-
nɩan -vlankaan- -aeˈˈ -ɛ ˈˈklia i ˈmʋn ɛn, aʋ ˈtmʋn ɛnˈ dɩ.
-
ˈˈjhriɛ ɛɛ cɩan ˈmʋn, -ɛɛ ˈnɛan ˈbho ɲʋn ˈˈbun -aeˈˈ -ɛɛ poa ɲʋn ˈbɔɛn ɛnˈ ˈtʋn -gwlɩˈˈ ˈmʋn ɛn, aʋ tmʋn ɛnˈ dɩ.
-Bho kletiɛn -ˈˈwe se ˈbho Moizɩ ɔˈ ˈtee ˈzɔn -nɩn -mɔnˈ -dhe ɛˈ, ɛɛ pʋbʋ sʋn bho ʋa yea Zoova aˈ dhɩjhesʋn i ˈŋwɔn. Zro Deutéronome 22:5, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- ˈˈmɩɩncɛnsʋn -e ˈmʋnpaadhɩ -ɩan- nʋɛn ˈˈdhe ɲmau ɔɔ gɔa ˈɲnʋnkpaoˈ -aeˈˈ ˈɲnʋnkpaoˈ a gɔa ɲmau ɛ, -a ˈsɩ ˈmʋn -paa dhi -ɛ?
Zro 1 Corinthiens 10:32, 33 -e 1 Jean 2:15, 16, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- -a ˈye -ˈgwlɩi ˈsroo- -wɛeˈ -aaˈ -nɩnsʋn ˈse ɲʋn -nɩn -a ˈˈkʋʋan in -e -aaˈ ˈdhoudhi -ˈˈwe -nɩn -a nɩan ɲɔnsoagbu dhueˈ ˈdhi ˈˈcɛ -gwlɩˈˈ ˈˈdui -ɛ?
-
Ɲʋn nɩan ˈbho aʋaˈ kpɔ ˈdhi ɛ, ka ʋaˈ -da -duuˈˈ aˈ -nɩnsʋn -e ˈmʋnpaadhɩ -nɩn -ɛn?
-
ˈDhe ɩn ˈˈklun ɛ, -ˈnɩɩn -nɩn ˈe kletiɛn ˈse ˈmʋn -paa i? Dhɛɛdɩ- -ɛ?
Dhɛmʋnpaasʋn -ɩan- nʋan Zoova ˈtʋn ɛn, ɩan kpɛ -diɛˈˈ.
ƝƲN -ˈNƲƲN ˈNAAN: “Dhɛ ˈman ˈbɔan -mɛn ˈman paa ˈmʋn.”
-
Ka -man ˈjheɛ-? Dhɛɛdɩ- -ɛ?
DHƐWƐ- ˈCƖAN-?
-Bho -aaˈ dhɛmʋnpaasʋn nmɔn ˈo dhi ˈˈdhe -aa sa feɛn ɛnˈ, -aa toɛˈ -ka -aa ˈjhea Zoova -e ɲʋn jhiia -aʋ ˈdhei ŋwɔn.
Dhɛwɛ- -ˈŋwɔn in -ɛn?
-
Dhɛɛdɩ- -aaˈ ˈmʋnpaadhɛ- -e -aaˈ -nɩnsʋn -kɔndɩ ˈdhe Zoova ˈˈjhriɛ ˈdhe -ɛ?
-
ˈSrɩn -wɛ ˈye -aʋ jie bho po ˈdhe -aaˈ -nɩnsʋn anˈ dɩ ˈdhi -ɛ?
-
-Bho ɲʋn ˈjhe -aaˈ dhɛmʋnpaasʋn ɛnˈ, dhɛwɛ- ʋʋ ˈbhɛɛ ʋʋ ˈye ˈtmʋn ˈdhe -aaˈ ˈˈɲɩnsʋn anˈ dɩ ˈdhi -ɛ?
ˈBƆN DHƖ -ˈNƖƖN ANˈ I ˈŊWƆAN IN
ˈˈKunanˈˈ -wɛ -aaˈ ˈmʋnpaadhɩ a po -ɛ?
“Que révèle ma façon de m’habiller?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Bho -man sa ˈbɔn -ˈye tatuazɩ -po ɛˈ, dhɛwɛ- -ˈye -manˈ ˈˈjɛ i dee- tɛnˈˈ -ɛn?
“Tatouages: qu’en dit la Bible?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
ˈSrɩn -ˈnɩɩn -ɩn ˈye -aʋ sʋn bho po ˈˈdhe -aaˈ dhɛmʋnpaasʋn anˈ dɩ ˈdhi ɛ, ɩanˈ dɩ -mɩn ˈsɛɛ nɛn ɛn ˈtmʋn.
“Ton habillement honore-t-il Dieu?” (La Tour de Garde, septembre 2016)
ˈƝnʋnkpaoˈ dhueˈ ɛɛ ˈbhɔa ˈbho -ʋn ˈŋwɔɔan ɲʋn -ˈnʋʋn anˈ dhɛmʋnpaasʋn ɛn, ʋanˈ -bo.
“Je croyais que la coquetterie était condamnable” (Réveillez-vous!, 22 décembre 2003)