Ni itire itire tö ja ngwäkitai ño aune ja ükaite ño ye ererebätä tä nuainne. Nikwe kukwe ja jie ngwankäre Bibliabätä mikai täte ngwane, ni tö ja ükaite ño ye erere nikwe nuaindi aune nikwe kä mikai juto Jehovabätä. Ani kukwe ja jie ngwankäre ruäre ye mike gare jai.

1. ¿Ja dätekäre kwin kukwe ja jie ngwankäre meden raba ni dimike?

Ni kristiano ñan rabadre ja ngwäkite blo, ñakare aune rabadre ja ükete kwin aune töbike kwin. Ne madakäre, rabadre ja ngwen mrebe tä Ngöbö mike täte bämikakäre (1 Timoteo 2:9, 10). Kukwe ja jie ngwankäre ketabokä raba kwen texto nekänti nie ye mike ñärärä. 1) Ni ñan rabadre ja ngwäkite blo. Juta Jehovakwe te ni ñan ja ükete ja erebe ye jutuabarera mäi gätä nuainta konkrekasionte yete, akwa ja ngwäkitata aune ja dokwä sökata ño yebiti Ngöbö ütiäte ni kräke nita bä mike. 2) Ja ükadrete kwin ye abokän ñaka dän dime o nginimo kitadre jabätä aune nita dän kite jabätä ye ñan nitre mada töi mikadre blo. 3) Ja ngwanta töbätä ye abokän nitre tä ja ngwäkite ye erere ni ñan ja ngwäkite (moda). 4) Nita Ngöbö mike täte ye käre ni rabadre bämike nita ja ükete ño yebiti, ñobätä ñan aune yebiti nita Ngöbö metre mike täte nikwe bämikai ni madai (1 Corintios 10:31).

2. ¿Nita ja ükete ye raba mate ño ni kristiano madabätä?

Nikwe ja dätedi ño ye tä gare ni itire itire ie. Akwa nikwe ja dätedi yekwe ni mada ngwain ngoto ritekä o ñakare yebätä töbikadre. Nita ja di ngwen ne kwe ja ñan rabadre ruin käme ni madai. Aisete nita kukwe ne mike täte: “Ni jökrä käkwe jändrän kuin nuendre ni mräkä tödekaka Jesubti mda mda kräke, niara moto mikakäre nuäre amne ja die mikakäre kwärikwäri” (mäkwe ñäkä Romanos 15:1, 2 yebätä).

3. ¿Nita ja ükete yebiti ño ni raba ni mada töi mike Jehová mike gare jai?

Nita dre nuainne ye ererebätä nita ja di ngwen ja ükete kwin. Akwa bärira jire ja di ngwanta ja ükatekäre kwin gätä konkrekasionte kräke aune kukwe drie ye kräke. Nita ja ükete ño ye köböite kukwe ütiäte drieta nikwe ye ñan rabadre ütiäte nitre kräke yei ni ñan tö, ñakare aune ni tö nitre mada dimikai kukwe metre mike gare jai aune kukwe “Ngöbö ni diantarikäbtä” ye rabadre tuen nuäre ietre (Tito 2:10).

 JA TÖTIKE BÄRI NGUSETA

4. Ja ükateta kwin yebiti Jehová mikata ütiäte jai

¿Kukwe meden bäri ütiätebätä ni rabadre ja ükete kwin? Ñäkädre Salmo 47:2 yebätä aune kukwe ne kädriedre jabe:

• ¿Nita Jehová kä ngwen jabätä ye rabadre ni töi mike ño ja ükate yebätä?

• Ja ngwä kitadre kwin nänkäre gätäbätä aune kukwe driekäre, ¿ye kwin raba ruin mäi? ¿Ñobätä mäta töbike kore?

 5. ¿Ño dän kwin känändre jakrä aune ja ükadre kwin?

VIDEO mikadre ñärärä.

Dän ütiä nuäi ye ñan ai ütiäte, ñakare aune tädre bätäninte kwin aune dre nuainta ye ererebätä dän kitadre jabätä yebrä ütiäte. Ñäkädre 1 Corintios 10:24; 1 Timoteo 2:9, 10 yebätä aune kukwe ne kädriedre jabe:

• ¿Ñobätä ñaka dän dobrore o käme kitadre jabätä?

• ¿Ñobätä ñaka dän dime, nginimo o ni mada töi mikakäre jabätä kitadre jabätä?

Ni kristiano ñan niena Lei Biani Moisés ie ye mike täte, akwa Jehová töita ño ye kukwe ne tä mike gare. Ñäkädre Deuteronomio 22:5 yebätä aune kukwe ne kädriedre jabe:

• Ni brare tä ja ükete bä tä nemen merire, ni merire tä ja ükete bä tä nemen brare, ¿ja ükadrete kore ye ñobätä ñaka kwin?

Ñäkädre 1 Corintios 10:32, 33; 1 Juan 2:15, 16 yebätä aune kukwe ne kädriedre jabe:

• Nita ja ükete ye ñan tuin kwin nitre ni bäre o ja mräkätre konkrekasionte ie, ¿ye rabadre ni ngwen töbike? ¿Ñobätä?

• ¿Mä käite nitre tä ja ükete ño?

• ¿Ja ükate kore ye ruäre ñan kwin ni kristiano kräke raba ruin mäi? ¿Ñobätä mäta töbike kore?

 ¿DRE NIBI GARE MÄI?

Nita ja ükete kwin ngwane, nita Jehová aune ni mada mike ütiäte jai nita bämike.

Ngwankäreta töröw

• ¿Nita ja ükete ño ye ñobätä ütiäte Jehová kräke?

• ¿Nita ja ükete yebätä kukwe ja jie ngwankäre meden raba ni dimike?

• ¿Nita ja ükete ño yebiti ni raba nitre töi kwite kukwe metre mikata täte nikwe yebätä?