LESENI 52
Iseda Dabua Bona Toana be Mai Anina Bada
Ita ibounai ita ura ita sibona ese eda dabua ita abia hidi bona iseda toana ita hanamoa. Bema Baibel ena hakaua herevadia haida ita badinaia, ita ura henia dabua ita hahedokilaia diba bona Iehova do ita hamoalea danu. Mani unai hakaua herevadia haida ita itaia.
1. Iseda toana bona dabua ita abia hidi neganai, edena hakaua herevadia ita badinaia be namo?
Namona be ita ese “mai hemataurai bona mai laloa maoromaoro ida dabua namona” ita abia hidi, bona iseda toana goevana ese do ia hahedinaraia ita be ‘Dirava ita tomadiho henia.’ (1 Timoteo 2:9, 10) Mani inai hakaua herevadia foa ita laloa: (1) “Dabua namona” do ita atoa. Kongrigeisen heboudia ai oi itaia hegeregerena, Iehova ena taunimanima be sitaelo idauidau dabua idia hahedokilaia. To, edia dabua bona huina edia sitaelo ese Dirava matauraia karana ia hahedinaraia. (2) “Mai hemataurai” ida dabua ita hahedokilaia be namo badina ita ura lasi iseda toana dainai, taunimanima be ita do idia raraia momo eiava lalohadai kereredia do idia abia. (3) Iseda tauanina ena toana o dabua ita ura abia hidi neganai, namona be ita “laloa maoromaoro,” bona tanobada ena sitaelo do ita badinaia lasi. (4) Namona be iseda toana amo haida do idia diba ita be ‘Dirava momokanina ita tomadiho henia.’—1 Korinto 10:31.
2. Dahaka dainai iseda dabua ita abia hidi neganai, iseda tadikaka taihu do ita laloa?
Momokani, ita be mai eda maoro ita ura henia dabua ita hahedokilaia totona. To do ita laloa, ‘Egu dabua ena sitaelo ese ma haida ia hahekwakwanaia diba, a?’ Namona be ita naria namonamo, ita ura lasi ma ta ita hahekwakwanaia. Gau badana be “iseda dekena tauna ita hamoalea bona kara namodia do ita karaia ia ita hagoadaia totona.”—Roma 15:1, 2 duahia.
3. Edena dala ai iseda dabua ese taunimanima edia lalona ia veria Iehova idia dibaia totona?
Ita ura hanaihanai dabua namodia ita hahedokilaia, to kongrigeisen heboudia bona haroro gaukara ai, namona be dabua maorona do ita atoa. Ita ura lasi iseda toana dainai, taunimanima be sivarai namona do idia dadaraia. To, ita ura iseda toana dainai taunimanima be hereva momokani do idia ura henia, bona “iseda Hamauria Tauna, ena hahediba herevadia do idia hahairaia.”—Tito 2:10.
DIBA MA HAIDA ABIA
Do ita itaia edena dala ai iseda dabua o toana amo ita hahedinaraia ita be Keristani taudia.
Iseda dabua bona toana ese do ia hahedinaraia ita be siahu taudia ita matauraia. Ena be Iehova ese iseda kudouna ai idia noho gaudia ia itaia, to iseda toana amo ita hahedinaraia ia ita matauraia danu
4. Iseda toana namona amo ita hahedinaraia Iehova ita matauraia
Iseda toana ita hanamoa ena badina badana be dahaka? Salamo 47:2 duahia, bena inai henanadai herevalaia:
-
Taunimanima idia diba ita be Iehova ena Witnes taudia dainai, edena bamona dabua ita abia hidi be namo?
-
Kongrigeisen heboudia bona haroro gaukara ai dabua namodia ita atoa be maoro, a? Dahaka dainai?
5. Dabua bona toana namona ita abia hidi dalana
Herevana iseda dabua be dava bada o dava maragi gauna, to namona be idia goeva bona ia hegeregere ita karaia gaukarana totona. Korinto Ginigunana 10:24 bona 1 Timoteo 2:9, 10 duahia. Bena ita ura lasi inai bamona dabua ita atoa ena badina herevalaia . . .
-
miro o toana ia namo lasi.
-
tauanina ai ia kamokau, ia severasevera, o haida dekenai lalohadai dikadia ia havaraia.
Ena be Keristani taudia be Mose ena Taravatu idia badinaia lasi, to ia amo Iehova ena lalohadai idia abia diba. Deuteronomi 22:5 duahia, bena inai henanadai herevalaia:
-
Dahaka dainai tatau ese hahine edia dabua idia hahedokilaia, o hahine ese tatau edia dabua idia hahedokilaia karana ita dadaraia be namo?
Korinto Ginigunana 10:32, 33 bona 1 Ioane 2:15, 16 duahia, bena inai henanadai herevalaia:
-
Dahaka dainai ita naria namonamo be namo, unai amo iseda toana dainai komiuniti o kongrigeisen taudia do idia badu lasi?
-
Emu komiuniti dekenai taunimanima be edena bamona dabua idia hahedokilaia bona toana idia hahedinaraia?
-
Oi laloa unai sitaelo haida be Keristani taudia ese do idia karaia lasi, a? Dahaka dainai?
Dabua ena sitaelo idauidau ita hahedokilaia diba bona Iehova ita hamoalea diba danu
HAIDA IDIA GWAU: “Lau be mai egu maoro lau ura henia dabua lau hahedokilaia totona.”
-
Unai oi abia dae, a? Dahaka dainai?
POINT BADANA
Iseda dabua bona toana ita abia hidi namonamo neganai, ita hahedinaraia Iehova bona ma haida ita matauraia.
Riviu
-
Dahaka dainai Iehova dekenai iseda dabua bona toana be mai anina bada?
-
Iseda dabua bona toana dekenai, edena hakaua herevadia ese ita idia biagua be namo?
-
Iseda toana dainai haida ese tomadiho momokanina be edena bamona idia laloa diba?
REFERENS ITAIA
Do ita itaia, iseda dabua ese ma haida dekenai dahaka hereva ia siaia noho.
Do ita itaia dahaka dainai tatu ita do karaia lasi neganai, ita laloa namonamo guna be aonega karana.
“Tatu Dekenai Baibel Ena Hereva be Dahaka?” (Websait atikol)
Abia hidi karaia totona ita do idia durua hakaua herevadia ma haida do ita itaia.
“Emu Dabua Toana ese Dirava Ia Hanamoa, A?” (Gima Kohorona, September 2016)
Iehova ia ura hamoalea hahinena ta ese edena dala ai ma haida edia dabua bona toana dekenai lalohadai maorona ia abia?
“Haida Edia Dabua Bona Toana ese Lau Ia Hamorua” (Noga!, December 22, 2003)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
