Ahị wuu la abwọlẹ kọọ háahị nyọka kụrụ ang bala o-ju agidi. Kori kahị ba itiwe nya ehile ịla ịBayịbụụ jẹ, áhị ka jẹ́-ẹ kụrụ ang ịlẹ kị háahị kem ka, ma ahị ka họ ẹla kpụ iJihova ịpyọ ịnyịnyị. Ahị kụ ẹhị yẹ itiwe nya ehile ịhyẹ wẹẹ.

1. Ịyẹ à tị́ ka dahị ụbwọ cheje u-uhye nya ang ọkụrụ-kụrụ bala agidi ojuju?

Ahị ka “kpa ẹla ọjẹ́je ọlala kụrụ ịwụrụ ịlẹ kị pwoku la ụgbẹyị ọlẹ kọ la ihi,” bala ọ-ka la cheri-cheri ụka myị́ ụka lala “angịnyị nya Ohe Oluhye.” (1 iTimoti 2:9, 10) Kụ ẹhị yẹ ang ine ịlẹ kị ka dahị ụbwọ lẹẹ: (1) Ang ọkụrụ-kụrụ nyahị ka “pwoku.” Ọhẹka, à ka yẹ ọọjịra-jịra nyahị nyori angịnyị nya iJihova kaa kụrụ ang ụma ịdatị-datị, ma ang ọkụrụ-kụrụ bala inyi ọpwọpwọ lee ogugu nyahị kaa mẹjẹ nyori ahị ju ihi nya Ohe ọlẹ kahị kaa gbịgba ha. (2) Ọ-ka kụrụ ang “la ihi” ri, áhị ka kụrụ ang ụ-ụgbẹyị ọlẹ kọ ka du ká angịnyị ka juwa kụ irya ọtịpyọ lee ọ-kpa angịnyị irya wẹ ẹga nyahị lụmẹ ka. (3) Ahị kaa kpa “ẹla ọjẹ́jẹ” họ ụkụrwọ ụka kahị kụrụ ang ụma ọnyị myị́ ọnyị ọlẹ kọ kpehe onyeewe lee o-ju agidi jaabwọ ká ọng myị́ ọng kaa ju ka. (4) Ang ọkụrụ-kụrụ nyahị ụka myị́ ụka ka mẹjẹ nyori ahị ri “angịnyị nya Ohe Oluhye,” chajị ká angịkịla ka jẹ́-ẹ yẹ ahyaahị nyori ahị kaa gbịgba ha Ohe nyịlẹhị.—1 Ala ịKọrịntị 10:31.

2. Ịyẹ tị́ du kahị ka kpa aanahị i-irya ụka kahị ja cheje u-uhye nya ang ọkụrụ-kụrụ?

Nanana nyori ahị la iwe nyọka chụ ụma nya ang ọlẹ kahị ka kụrụ, ahị baba nyọka kụ irya u-uhye nya abwọlẹ kọ ka bwu gu angịkịla. Ahị kaa maga chajị kahị ka họ ẹla wụ́ ọngọngọhẹ ẹjẹ ka, ọkọkọ nya ọọwa, kahị ka họ ẹla ọlẹ kọ ka “kpụ [ọọnahị] ịpyọ, chajị nyọka hiigu há [ọọnahị] ọọwa . . . Chajị ká ọọwa ka kpa ọmyịmyị ọlala nyamwụ wule kịlahị-ịlahị ịnyịnyị.”—Wa Ala iRom 15:1, 2.

3. Ányị ang ọkụrụ-kụrụ nyahị à tị́ ka jẹ́-ẹ gbile angịkịla kaka jẹ́ iJihova?

Ahị kaa kụrụ ang o-pwoku ụka myị́ ụka, ma ahị kaa kpẹhị chịng gụgụụgụ ụka kahị juwa chụ ang ọlẹ kahị ka kụrụ ka ọjịra-jịra bala ẹrụ ọnyịịla ọ-kpa pyẹ. Áhị tịtọ ká ang ọkụrụ-kụrụ nyahị ka ji angịnyị irya da rụ hi oja nya ẹrụ ọnyịịla ọlẹ kahị kpa ka ẹga nyaa ka. Ọkọkọ nya ọọwa, ahị tịtọ ká ang ọkụrụ-kụrụ nyahị ka họ ká angịkịla ka tịtọ nyọka jẹ́ ẹlịlẹhị, bala ọ-chị “o-ya dodehe ọnyịịla nya ọmẹjẹ nya ẹrụ ọnyịịla nya . . . Ọngọchịda nyahị ehe.”—ỊTayịtọsị 2:10.

 JẸ́ GỤ ỌỌWA

4. Ụka ká ang ọkụrụ-kụrụ nyahị á hiigu, ahị wẹẹ mẹjẹ nyori ahị ju iJihova ihi

Ịyẹ gụgụụgụ à tị́ du kahị baba nyọka kụrụ ang hiigu? Wa Eje Ọnyịịla 47:2, kanụ ya ẹla u-uhye nya ịtọ ẹla ịlẹ:

• Ányị ahị ọ-kpịtịya nyori ahị ku ọmwakpa nya iJihova à tị́ ka jẹ́-ẹ gu abwọlẹ kahị kaa kụrụ ang bala ụma nya ang ọlẹ kahị kaa kụrụ?

• Á me irya nyori ọ baba nyọka kụ ẹhị yẹ ụma nya ang ọlẹ kahị kaa kụrụ ka ọjịra-jịra bala ẹrụ ọnyịịla ọ-kpa pyẹ? Ịyẹ tị́ du ká ya ịnyị?

 5. Abwọlẹ á ka bwu cheje ọnyịịla u-uhye nya ang ọkụrụ-kụrụ bala agidi ojuju

Yẹ IFIM ọwẹ.

Kori ká ang ịkụrụ-kụrụ nyahị á ri ịlẹ kị lịnya lee ịlẹ kị lịnya ka wẹwẹ, ị ka la cheri-cheri bala o-pwoku iwe-ahụrụ ọnyị myị́ ọnyị ọlẹ kahị yẹ ịlọhị. Wa 1 Ala ịKọrịntị 10:24 bala 1 iTimoti 2:9, 10, kanụ ya ẹla u-uhye nya ang odudu kahị ka cheji ba hi ọ-ka kụrụ ang ịlẹ . . .

• kị chịrị lee o-pwoku ẹhị-ka.

• kị kaa chị ọngịnyị chị lụmẹ, ya ịnyịrọ nya ọngịnyị dodehe, lee ọ-ka du ká angịnyị ka kụ irya ọtịpyọ.

Nanana nyori Angịnyị nya ịKịrayịsị á ji ekpeleji nya Ehile nya iMosisi ka, ị ka jẹ́-ẹ jẹ́ ang bwu ụwa u-uhye nya abwọlẹ ká iJihova kaa kụ irya. Wa Ehile Ọmada 22:5, kanụ ya ẹla u-uhye nya ịtọ ẹla ọlẹ:

• Ịyẹ à tị́ du kahị ka cheji ba hi ang ịkụrụ-kụrụ ịlẹ kị kaa du ká alẹng kaa me anyang lee anyang o-me alẹng?

Wa 1 Ala ịKọrịntị 10:32, 33 bala 1 ịJọn 2:15, 16, kanu ya ẹla u-uhye nya ịtọ ẹla ịlẹ:

• Ịyẹ tị́ du kọ ka rihi ẹla kori ká ang ọkụrụ-kụrụ nyahị á wụ́ angịnyị ịla oye nyahị lee alọjịra-jịra ẹjẹ?

• Ányị angịnyị lụmẹ-lụmẹ o-oye nyang à tị́ kaa kụrụ ang bala o-ju agidi?

• Á me irya nyori ịhyẹ nyaa á pwoku Angịnyị ịKịrayịsị ka? Ịyẹ tị́ du ká ya ịnyị?

 ẸLỊYẸ A TỊ́ JẸ́?

Ụka kahị cheje ọnyịịla u-uhye nya ụma nya ang ọlẹ kahị ka kụrụ bala abwọlẹ kahị ka ju agidi, ahị kaa mẹjẹ nyori ahị ju iJihova bala angịkịla ihi.

Ẹlịyẹ A Tị́ Yụbwọ Chị?

• Ịyẹ tị́ du ká ang ọkụrụ-ọkụrụ bala agidi ojuju nyahị baba ha iJihova?

• Itiwe nya ehile iyina à tị́ ka kpahị ụ-ụgbẹyị ụka kahị juwa ka cheje u-uhye nya ụma nya ang ịlẹ kahị ka kụrụ?

• Ányị ang ọkụrụ-kụrụ nyahị à tị́ ka jẹ́-ẹ gu abwọlẹ ká angịkịla kaa yẹ ịgba ọgbagba nyịlẹhị?