Nos tudu nu gosta di skodje kuzê ki nu ta bisti i modi ki nu ta konpo. Si nu sigi alguns konsedju di Bíblia, nu pode ka sô bisti di manera ki nu gosta, má tanbê nu ta agrada Jeová. Nu ben odja alguns di kes konsedju.

1. Kuzê ki ta djuda-nu disidi modi ki nu ta bisti i konpo?

Nu debe skodje ‘uza ropa dretu, ku ruspetu i bon juís’. Tanbê nu debe sta sénpri linpu, asi otus algen ta odja ma nu ‘ta adora Deus.’ (1 Timóteo 2:9, 10) Nu ben odja kes kuatu konsedju li: (1) Nu debe uza ropa ‘dretu’. Talvês dja bu odja na runion ma povu di Jeová ta bisti diferenti di kunpanheru. Má, manera ki nu ta bisti i ki nu ta konpo kabélu sénpri ta mostra ruspetu pa Deus. (2) Bisti ‘ku ruspetu’ krê fla ma nu ka ta uza ropa ki ta poi otus algen ta ten pensamentus mariadu ô ki ta txoma txeu atenson. (3) Nu ta mostra ‘bon juís’ óras ki nu ka ta kóre tras di tudu kuza ki ben na móda. (4) Nos manera di bisti i di konpo debe sénpri mostra ma nu ta ‘adora Deus’, asi otus algen ta odja klaru ma nu ta sirbi kel Deus verdaderu. — 1 Coríntios 10:31.

2. Modi ki nos manera di bisti i di konpo pode afeta nos irmons?

É verdadi ki é nos ki ta disidi kuzê ki nu ta bisti. Má, nu debe pensa si manera ki nu ta bisti i ki nu ta konpo ta afeta otus algen. Nu ta faze nos midjór pa nu ka ofende ningen, má pa nu ‘agrada nos prósimu pa se ben, asi pa pode djuda-l.’ — Lé Romanos 15:1, 2.

3. Modi ki nos manera di bisti pode poi otus algen ta krê prende más sobri Jeová?

Sénpri nu ta sforsa pa nu bisti dretu. Má, nu ta toma más kuidadu inda, óras ki nu ta bai runion i nu ta sai na pregason. Nu ka krê pa nos manera di bisti distrai pesoas di kel mensaji inportanti ki nu ta leba. Má, nu krê pa nos manera di bisti poi pesoas ta krê prende más sobri Jeová i pa ‘ensinu di nos Salvador, bira bunitu.’ — Tito 2:10.

 SABE MÁS

4. Óras ki nu ta bisti i konpo dretu nu ta mostra ruspetu pa Jeová

Kal ki é motivu más inportanti ki nu ten pa nu preokupa ku nos manera di bisti i di konpo? Lé Salmo 47:2, i dipôs pâpia sobri kes pergunta li:

• Óras ki nu ta lenbra ma nos manera di bisti ta afeta kuzê ki pesoas ta pensa sobri Jeová, ki disizons nu debe toma?

• Bu ta atxa ma nu debe preokupa ku manera ki nu ta bisti óras ki nu ta bai runion i nu ta sai na pregason? Pamodi?

 5. Modi ki nu pode toma bons disizon na nos manera di bisti i di konpo

Odja VÍDIU.

Ka ta nporta si nos ropa é karu ô baratu, es debe sta linpu i di akordu ku lugar ki nu sta ta bai. Lé 1 Coríntios 10:24 i 1 Timóteo 2:9, 10. Dipôs, pâpia sobri pamodi ki nu debe ivita ropa ki é. . .

• dislexadu ô informal dimás.

• pertadu, ki ta mostra pártis di korpu ki ka debe ô ki ta poi otus algen ta ten pensamentus mariadu.

Nbóra nu ka meste sigi Lei di Muizés, el ta djuda-nu sabe kuzê ki Jeová ta pensa. Lé Deuteronómio 22:5, i dipôs pâpia sobri kel pergunta li:

• Pamodi ki nu ka debe bisti i konpo di un manera ki ta poi ómi ta parse ku mudjer ô mudjer ta parse ku ómi?

Lé 1 Coríntios 10:32, 33 i 1 João 2:15, 16, i dipôs pâpia sobri kes pergunta li:

• Pamodi ki nu debe toma kuidadu pa nos manera di bisti i di konpo ka ofende alguns algen na nos zóna ô na kongregason?

• Modi ki pesoas na bu zóna ta kustuma bisti i konpo?

• Bu ta atxa ma algun di kes manera ki es ta bisti ô konpo pode ser mariadu pa un kriston? Pamodi?

 REZUMU

Óras ki nu ta toma bons disizon na manera ki nu ta bisti i konpo, nu ta mostra ma nu ta ruspeta Jeová i otus algen tanbê.

Perguntas di rezumu

• Pamodi ki nos manera di bisti i di konpo é inportanti pa Jeová?

• Kuzê ki ta djuda-nu toma bons disizon sobri modi ki nu ta bisti i konpo?

• Modi ki nos manera di bisti i di konpo pode poi otus algen ta krê prende sobri Jeová?