De ɓɔgapɛ da deʋe wo e vile seɣei va da tɛ ma ta velei da ɓɔɔ zo da. Ani da ziɛna ga tɛnɛgitiɛ te Gala Kɔlɔi zu, diɛ deʋe vagɔ wo e vile nii va da tɛ ma towa Jehova yii-la. De yɛpɛ e vile tɛnɛgi nii taniga va.

1. Tɛnɛ sɛɓɛi ya ɓɔ de va de kwɛ̃ɛ seɣei da tɛ ma ta velei da ɓɔɔ zo da?

Gala Kɔlɔi de lɛnɛga ga de “maa ɣili nɔ é wooli su [diɛ] kɛ ga kele-ɣele pele [diɛ] maa ɣili ga seɣei niitiɛ ta zolowo su.” Manɛɛ diɛ ɓɔɔ zo ga pagɔ ga numaa te kwɛ̃ɛ ga de ‘Gala fai ziɣia ga gaama.’ (1 Temete 2:​9, 10) Wɛlɛ tɛnɛ naagɔi niitiɛ va: (1) Seɣei da tɛ ma manɛɛ “é wooli su.” Ani ya liina Jehova Na Seeleitiɛ ta ɣaalɛ-bai zu, ya wɛlɛ na va ga velei ta maa ɣili la ta velei ŋazaitiɛ ta ta wũgi ʋɛlɛ la kulovɛ ba leilaa. Nii ɣa dɛɛzu ga wũfe-ma ɣa ge ya Jehova ʋaa ma. (2) Seɣei da tɛ ma manɛɛ é “zolowo su.” Nii zu-wulo-zu ɣa ga de mɛlɛ maa ɣili ga ya kɛ numaa te ɣi-gaa-ziɛ ga ta ɓalaa e vile de va. (3) De maa ɣili ga “kele-ɣele pele.” Nii ɣa dɛɛzu ga maa ɣili velei ɓɔgapɛ taale manɛɛ de yee vilisu. (4) Velei da maa ɣili la manɛɛ e dɛ ga gaama Ɣalagi ɣa de felizu.​—1 Kɔlĩitiɛ 10:​31.

2. Velei da maa ɣili la towa faa vɛɛ de ɣaa yɔwɔ̃itiɛ va ɣɛ le?

Velei ɓalaa da zoo de deʋe ga seɣei da tɛ ma, kɛ manɛɛ de kwɛ̃ɛ velei towa faa vɛɛ la de ɣaa yɔwɔ̃itiɛ va. Manɛɛ de ɣaa-ɓaa ga de mɛlɛ faa vɛɛ de veaitiɛ ta ɣi-gaa-ziɛi va. Kɛ “de de zii yɔwɔ̃itiɛ yii la fai niitiɛ zu te vagɛi te maʋaa ma a diɛ ta ŋeteai maʋaa wũ bu ziɣi.”​—Loomɛitiɛ 15:​1, 2 lodo.

3. Velei da maa ɣili la towa ɓɔ numaa va ɣɛ le ga te va te Jehova ʋeli?

Da ɣaa-ɓaa de maa ɣili ga pagɔ ani da ɣɛna liizu ŋada nɛpɛ. Kɛ manɛɛ de kɛsɛ ga velei da maa ɣili la ani da ɣɛna liizu gaalɛ-baitiɛ zu ɔɔ da ɣɛna liizu Gala goo wosu. Da ɣaa-ɓaa ga velei da maa ɣili la e mɛlɛ kɛ numaa tɔ ɣi-gaa-ziɛ ga ta ɓalaa e vile Gala goi va da bo te ma. Kɛ velei da maa ɣili la manɛɛ e kɛ numaa te yee zei Gala goi wu da bo te ma na ɣa ɣɛɛna e “ɓaa la de valo nui na kala-bogi ma.”​—Taitɔ 2:​10.

 FAA LAMAA MAA WOLI

4. Da ɣɛna maa ɣilizu ɓɔɔ ga pagɔ towa dɛ ga wũfe-ma ɣa de ya Jehova ʋaa ma

Zɛɓɛi e kɛɛ e ɓɔɔ ga faa ɓi ga de maa ɣili ga pagɔ? A Psalm 47:2 lodo, wo gaa-zaɣa-kɛɛ niitiɛ ɣaa wote:

• Ani da kwɛ̃ɛna ga velei da maa ɣili la towa faa vɛɛ numaitiɛ ta ɣi-gaa-ziɛi va e vile Jehova va towa ɓɔ de va ɣɛ le?

• E ɣisu tɔ ga faa ɓi ga velei da maa ɣili la da ɣɛna liizu gaalɛ-baitiɛ zu ɔɔ da ɣɛna liizu Gala goo wosu? Zɛɓɛi e kɛɛ yiɛ na wo?

 5. Ya leve ɣɛ le e deʋe vagɔ wo e vile maa ɣili ʋaa va?

ƲILIOGI nii lɛ ga.

Seɣei e de ma ani ɓalaa sɔwɔ̃i lɛ ɓaani manɛɛ de so ɓɔɔ ga pagɔ na ɣa ɣɛɛna e zolowo vɛ nɛpɛgi de na. A 1 Kɔlĩitiɛ 10:​24 ɓɔga 1 Temete 2:​9, 10 lodo. Wa wolona wo yɛpɛ e vile nii va e kɛɛ ɛ lɛ vani ga dɔ seɣei niitiɛ tɛ ma . . .

• te nɔwɔ̃i na ɣa ɣɛɛna tiɛ dɛ ga wũfe-ma lɛ de ya.

• ta kɛ numaa tiɛ ɣi-gaa-ziɛ ga ta ɓalaa ɓɔvɛlaale tɛ lɛ zolowoni.

Velei ɓalaa Kolai Maa Veaitiɛ tɛ lɛ sa tɔgi nii wu Jehova feeni Mooze ya, kɛ e yɛpɛvɛ e vile velei va Jehova ɣa ɣi-gaa-ziɛ la. A Deuteronomy 22:5 lodo, wo gaa-zaɣa-kɛɛ nii ɣaa wote:

• Zɛɓɛi e kɛɛ maa lɛ nɛɛni dɔ seɣei niitiɛ tɛ ma ya kɛ zunu maʋaa wulo e ɣɛ ŋaza nu ɔɔ ŋaza nu maʋaa wulo e ɣɛ zunu?

A 1 Kɔlĩitiɛ 10:​32, 33 ɓɔga 1 Jɔ̃ 2:​15, 16 lodo, wo gaa-zaɣa-kɛɛ niitiɛ ɣaa wote:

• Taitiɛ te vɛ de na ɔɔ te kuuwui zu zɛɓɛi e kɛɛ manɛɛ de kwɛ̃ɛ velei ta ɣi-gaa-ziɛ la e vile de maa ɣili velei va?

• Vɛ e na maa ɣili zɛɓɛi ɓɔɔ numaa te wõini la?

• Velei numaa ta maa ɣili la vɛ e na e ɣisu te pɛ ka solowogɛi Kolai Maa Veaitiɛ faa ma? Zɛɓɛi e kɛɛ yiɛ na wo?

 NII SA È MAA WOLIA

Ani da deʋe vagɔ wona e vile velei va da maa ɣili la towa dɛ ga wũfe-ma ɣa de ya Jehova ʋaa ma e vɛɛ de vanigaitiɛ va.

Ma-ɓigitiɛ

• Velei da maa ɣili la ta velei da ɓɔɔ zo da zɛɓɛi e kɛɛ e ga faa ɓi Jehova ɣaazu?

• Tɛnɛ sɛɓɛi ya ɓɔ de va de deʋe vagɔ wo e vile velei va da maa ɣili la?

• Velei da maa ɣili la towa faa vɛɛ numaa ta ɣi-gaa-ziɛi va ɣɛ le e vile da Ɣala feli velei va?