Nda-yo siin siin saʼma taʼa̱n ini-yo kuʼun-yo ji na̱sa saʼa vii-yo maa-yo. Nú saʼa-yo tanu kachi sava nda principio kuu saʼa-yo ja kusii ini Jeová. Ná kundeʼe-yo sava nda principio yaʼa.

1. ¿Na principio ku̱ú chindeé nu̱u̱-yo tágua ka̱ji vaʼa-yo na saʼma kuʼun-yo?

Tanu kuu ja ɨn ñaʼan “ná cási̱ va̱ʼa ña maá ña tá cúu nu̱u̱ cánuú, tácua ma̱ co̱ó tu̱ʼun canoo̱”. Ji suni, “tá cúu nu̱u̱ cánuú sa̱ʼá ñaʼan ndoo áno̱ ja̱ sáʼá ña tiñu Ya̱a̱ Dios” (1 Timoteo 2:9, 10). Kundeʼe-ní nu̱u̱ nda kumi principio yaʼa. 1) Saʼma-yo jiniñuʼun ja koo “vii”. Tanu ja̱ ja ni jini-ní nu̱u̱ nda reunión—ñuu Jeová siin siin saʼma taʼa̱n ini-ji kuʼun-ji—, de saʼma-yo ji na̱sa saʼa vii-yo maa-yo steʼen ja chiñuʼun-yo Yandios. 2) “Ja kuʼun-yo saʼma vii” kúni kaʼan ja ma saʼa-yo ja kani kuéʼé xini inka ñayí, ji tágua ma kundeʼe ñunkúú-ji yoʼo. 3) Steʼen-yo “ja jani vaʼa xini-yo” ta nduu ñúʼun-yo saʼma jáá ja nduu kaa vii. 4) Saʼma ñúʼun-yo ji na̱sa saʼa vii-yo maa-yo jiniñuʼun steʼen ja “chiñuʼun-yo Yandios”, chi sukua ndeʼe nda ñayí ja chiñuʼun-yo Yandios nda̱a̱ (1 Corintios 10:31).

2. ¿Naguá kani xini sava nda cristiano sɨkɨ saʼma ja ñúʼun-yo?

Ja nda̱a̱ kuu ja maa-yo kuu ka̱ji-yo na saʼma kuʼun-yo. De jiniñuʼun ja ma saʼa-yo ja kinunkava sava nda ñayí. Chuʼun tuni ini-yo tágua ma kani kuéʼé xini nda ñayí. De kandija-yo tuʼun yaʼa: “Chi tá iin iin ó ná sáʼá ó ja̱ cusii̱ ini̱ táʼán ó, tácua quendo̱o va̱ʼa ji de cuja ji jíín tu̱ʼun cándíja ji” (kaʼvi-ní Romanos 15:1, 2).

3. ¿Na̱sa kuu chíndeé nu̱u̱ sava nda ñayí ja kuni-ji Jeová nú saʼa vii-yo maa-yo?

Niini chuʼun ini-yo kuʼun-yo saʼma vii. De viʼi ka ta jaʼan-yo nu̱u̱ nda reunión ji ta kaʼan-yo Tuʼun Yandios. Chi nduu kúni-yo ja sɨkɨ na̱sa náʼán-yo de nda ñayí ma kunini-ji Tuʼun-Ya. Chi sa ja, kúni-yo kuu ja sava ka ñayí kutuʼva-ji tuʼun nda̱a̱ “tácua jíín nda̱cá tiñu ja̱ sáʼá ji, de cuni̱ nda̱cá nchivi̱ ja̱ vii̱ ndasí cúu tu̱ʼun ja̱ stéʼe̱n si̱qui̱ Ya̱a̱ Dios, Ya̱a̱ ja̱ scácu yóʼó” (Tito 2:10).

 NÁ KUTUʼVA KA-YO SƗKƗ TUʼUN YAʼA

4. Ja saʼa vii-yo maa-yo steʼen-yo ja iyo yɨñuʼún-yo nu̱u̱ Jeová

¿Na sɨkɨ kuu ja kánuu tuni ja kundɨʼvɨ ini-yo ja saʼa vii-yo maa-yo? Ka kaʼvi-ní Salmo 47:2, TNM de ka ndatuʼun-ní sɨkɨ nda tuʼun yaʼa:

• ¿Na̱sa jiniñuʼun ja saʼa vii-yo maa-yo mita ja jíni̱-yo ja satiñu-yo nu̱u̱ Jeová?

• ¿A káʼán-ní ja kánuu kundeʼe-yo na̱sa saʼa vii-yo maa-yo ta kiʼin-yo nu̱u̱ nda reunión ji ja kaʼan-yo Tuʼun Yandios? ¿Nakú jani ini-ní sukua?

 5. Na̱sa ka̱ji vaʼa-yo saʼma-yo ji ja saʼa vii-yo maa-yo

Ka kundeʼe-ní VIDEO.

Vaʼani̱ nú saʼma yiya̱ʼvi kuu axi nduu. Chi ja kánuu ka kuu ja koo ndoo ji koo vii. Ka kaʼvi-ní 1 Corintios 10:24 ji 1 Timoteo 2:9, 10. Ñukua de ka ndatuʼun-ní nakú ma kuʼun-yo saʼma ja...

• ... nduu iyo ndoo ji ja nduu kaa vii.

• ... nduu kindoo-yo, axi ja saʼa ja kani kuéʼé xini sava nda ñayí.

Vese nda-yo cristiano nduu jiniñuʼun ja kandija ka-yo Ley ja ni jeʼe nu̱u̱ Moisés, ley yaʼa steʼen naguá jani ini Jeová. Ka kaʼvi-ní Deuteronomio 22:5, TNM de ka ndatuʼun-ní sɨkɨ nda tuʼun yaʼa:

• ¿Nakú nduu iyo vaʼa ja ɨn teé kunáʼán-de tanu ɨn ñaʼan de ɨn ñaʼan kunáʼán-ña tanu ɨn teé?

Ka kaʼvi-ní 1 Corintios 10:32, 33 ji 1 Juan 2:15, 16, de ka ndatuʼun-ní sɨkɨ nda tuʼun yaʼa:

• Nú nduu ndeʼe vaʼa nda ñayí ñati nu̱u̱ ndee-yo ji ini congregación ja sɨkɨ saʼma ñúʼun-yo, ¿a jiniñuʼun ja kundɨʼvɨ ini-yo? ¿Nakú?

• ¿Na̱sa saʼa vii ji na saʼma ñúʼun nda ñayí nu̱u̱ ndee-ní?

• ¿A káʼán-ní ja saʼma ñukua nduu iyo vaʼa ja kuʼun ɨn cristiano? ¿Nakú jani ini-ní sukua?

 JA NI KUTUʼVA-YO

Ta ka̱ji vaʼa-yo na saʼma kuʼun-yo ji na̱sa saʼa vii-yo maa-yo, steʼen-yo ja iyo yɨñuʼún-yo nu̱u̱ Jeová ji nu̱u̱ sava ka ñayí.

Tuʼun núku̱ʼun ini

• ¿Nakú ndɨʼvɨ ini Jeová na̱sa saʼa vii-yo maa-yo?

• ¿Nde kuu sava nda principio ja chíndeé nu̱u̱-yo tágua saʼa vii-yo maa-yo?

• ¿Na̱sa ka jani ini sava nda ñayí sɨkɨ Yandios ta saʼa vii-yo maa-yo ji saʼma ja ñúʼun-yo?