Kõj aolep eokkõtaktak wãween ad l̦õmn̦ak im kõn̦aan ko ad ñe ej itok ñan nuknuk im paotokid. El̦aññe jej l̦oore naanin kakapilõk ko rejejjet ilo Baibõl̦, jemaroñ kããlõt nuknuk ko rem̦m̦an ippãd, im ilo ejja iien eo wõt kabuñbũruon Jeova. Jen etale jet iaan naanin kakapilõk kein.

1. Ta naanin kakapilõk ko rej aikuj tõl kõj ñan kããlõt nuknuk ko jej kõn̦aki im paotokid?

Jej aikuj in kããlõt ‘nuknuk ko rekkar, ilo juon wãween ettã im ilo ad kõjerbal lol̦o̦kjen̦.’ Jekõn̦aan bar dãpij wõt an erreo paotokid im kaalikkar ad “tiljek ñan Anij.” (1 Timote 2:9, 10) Jouj im lale naanin kakapilõk kein emãn: (1) Wãween ad nuknuk ej aikuj in ‘ekkar.’ Ãinwõt ad loe ilo kweilo̦k ko an eklejia, eokkõtaktak wãween an armej ro an Jeova nuknuk, bõtab wãween ad nuknuk im wãween jitael̦ in bõrad ej kaalikkar bwe jej kwal̦o̦k kautiej ñan Anij eo jej kabuñ ñan e. (2) Ad nuknuk “ilo juon wãween ettã” ej mel̦el̦ein bwe jeban kõn̦aki nuknuk ko me renaaj kõm̦m̦an bwe armej ren bõk l̦õmn̦ak ko rettoon im rejekkar, im ejjab bar aikuj kõm̦m̦an bwe en l̦e jãn joñan an armej kalimjek kõj. (3) Jej kwal̦o̦k ad “lol̦o̦kjen̦” ñe jejjab l̦oore aolep jitael̦ in nuknuk ko me jej loi ak rebuñbuñ. (4) Aolep iien wãween ad nuknuk im paotokid ej aikuj kaalikkar “ad tiljek ñan Anij,” im kwal̦o̦k ñan ro jet bwe jej kabuñ ñan Anij eo em̦ool.​—1 Korint 10:31.

2. Ewi wãween an paotokid im wãween ad nuknuk jelõt rũttõmak ro m̦õttad?

Meñe ewõr ad anemkwõj in kããlõt ta ko jej kõn̦aki, ak jej aikuj l̦õmn̦ak kõn wãween an paotokid maroñ jelõt ro jet. Jej kate kõj joñan wõt ad maroñ bwe jen jab kal̦õkatip jabdewõt armej ak ñan ‘kõm̦m̦ani men ko rem̦m̦an ñan ro ri-turid, bwe jen kõkajoor er.’​—Riit Rom 15:1, 2.

3. Ewi wãween an paotokid im wãween ad nuknuk maroñ kõm̦m̦an bwe armej ro ren kõn̦aan kal̦apl̦o̦k aer jel̦ã kõn Jeova?

Enañin aolep iien jej kajjioñ nuknuk ilo juon wãween ekkar ñan men ko jej itõn kõm̦m̦ani, bõtab iien ko rel̦l̦aptata ad aikuj lukkuun lale paotokid im wãween ad nuknuk ej ilo iien kweilo̦k ko an eklejia im jerbalin kwal̦o̦k naan. Jejjab kõn̦aan bwe armej ro ren m̦ad jãn ennaan eo eaorõk jej kwal̦o̦ke kõn paotokid im wãween ad nuknuk. Ijello̦kun ad kõm̦ad armej kõn paotokid, jekõn̦aan bwe paotokid im wãween ad nuknuk en kõm̦m̦an bwe armej ro ren kõn̦aan kal̦apl̦o̦k aer jel̦ã kõn Anij eo jej karejar ñane, im “bõktok nõbar ilo jabdewõt wãween ñan katak ko an Anij, eo ej ad ri-Lo̦mo̦o̦r.”​—Taitõs 2:10.

 KAM̦WILAL̦L̦O̦K AM̦ MEL̦EL̦E

4. Ñe ej em̦m̦an paotokid, men in ej kwal̦o̦k ad kautieje Jeova

Ta un eo el̦aptata unin ad aikuj lale bwe en ekkar im jim̦we wãween ad nuknuk im paotokid? Riit Revelesõn 4:11, innem bwebwenato kake kajjitõk kein:

• Kõnke jej jutak kõn Jeova im ãt eo etan, ewi wãween an men in aikuj jelõt wãween ad nuknuk?

• Kwõl̦ak lale ejim̦we ke im ekkar ñan ad lukkuun l̦õmn̦ak kõn paotokid ñe jej pãd ilo kweilo̦k ko im ñe jej kwal̦o̦k naan? Etke kwõj ba men in?

 5. Wãween ad kõm̦m̦ani jokãlõt ko rem̦m̦an kõn wãween ad nuknuk im paotokid

Kõjo̦e PIJAIN ALWÕJ eo.

Meñe emaroñ l̦ap ak dik on̦ããn nuknuk ko ad, ak rej aikuj in erreo im ekkar ñan iien ko im wãween ko jej pãd ie. Riit 1 Korint 10:24 im 1 Timote 2:9, 10. Innem bwebwenato kõn etke jejjab kõn̦aan kõn̦ak nuknuk ko me . . .

• reppidtoto, rejabde ak rejekkar.

• rebab im mãni, rekõm̦m̦an an wal̦o̦k ãnbwinnid, ak rekõm̦m̦an an ettoon l̦õmn̦ak ko an armej.

Meñe Kũrjin ro rejjab pãd ium̦win Kien Moses, ak Kien Moses ej kwal̦o̦k kõn l̦õmn̦ak ko an Jeova. Riit Duteronomi 22:5, innem bwebwenato kake kajjitõk in:

• Etke jej aikuj kõjparok jãn wãween nuknuk ko im jitael̦ in bar ko me rekõm̦m̦an an em̦m̦aan ro ãinwõt paotokin kõrã ak kõrã ro ãinwõt paotokin em̦m̦aan ro?

Riit 1 Korint 10:32, 33 im 1 Jon 2:15, 16, innem bwebwenato kake kajjitõk kein:

• Etke ej aikuj aorõk ippãd el̦aññe paotokid enaaj kal̦õkatip ro jet ilo bukwõn eo ad ak ilo eklejia eo?

• Kain jitael̦ in nuknuk rot ko me ekkã an wal̦o̦k ijo kwõj jokwe ie?

• Kwõl̦ak lale jet iaan jitael̦ kein remaroñ ke jekkar ñan Kũrjin ro? Etke kwõj ba men in?

 TARLEP IN KATAK EO ILO TUKADU

El̦aññe jej kõm̦m̦ani jokãlõt ko rem̦m̦an kõn wãween ad nuknuk im paotokid, jej kaalikkar bwe jej kautiej Jeova im ro jet.

Ãlij

• Etke wãween ad nuknuk im paotokid eaorõk ippãn Jeova?

• Ta jet iaan naanin kakapilõk ko me rej aikuj tõl kõj ñan kõm̦m̦ani pepe ko rem̦m̦an kõn wãween ad nuknuk im paotokid?

• Ewi wãween an paotokid im wãween ad nuknuk maroñ jelõt wãween an ro jet l̦õmn̦ak kõn kabuñ eo em̦ool?