TAMACHTILIS 52
¿Keyej moneki tikitaskej keniuj timotakentiaj uan timochijchiuaj?
Tinochin tataman kemej tikuelitaj timotakentiskej uan timochijchiuaskej. Ika tamachtilismej tein kipia Biblia uelis tikixpejpenaskej tein tikuelitaj uan no tikyolpaktiskej Jiova. Maj tikitakan seki tamachtilismej tein kipia Biblia.
1. ¿Katiyejua tamachtilismej tein kipia Biblia techpaleuia maj tikixpejpenakan kemej timotakentiaj uan timochijchiuaj?
Akin kichiuaj kemej Cristo moneki “motakentiskej kemej kinamiki uan keman mochijchiuaskej maj kinextikan ke kuali taixejekouaj uan maj amo kitelpanoltikan”. Uan no, moneki yeskij chipaujkej kemej kinextiskej ke “nemij kemej Dios kineki” (1 Timoteo 2:9, 10, TNM). Xikonita nejin naui tamachtilismej tein kipia nejin texto. 1) Moneki timotakentiskej “kemej kinamiki”. Kemej xa tikonitania, itech inechikol Jiova tataman kemej motakentiaj, sayoj ke totasal oso totaken uan kemej timoxiluiaj kinextia ke tikpoujkaitaj Dios akin tikueyichiuaj. 2) Kemej timochijchiuaskej ‘maj kinexti ke kuali taixejekouaj’ kijtosneki amo timotaliliskej tein kichiuas maj oksekin kinemilikan tein amo kuali, uan amo tikchiuaskej maj sayoj tejuan techitakan. 3) Tiknextiaj ke amo ‘tiktelpanoltiaj’ keman amo timotaliliaj tein yeski tein yankuixtok kisak. 4) Kemej timoitaj moneki nochipa niman kinextis ke ‘tinemij kemej Dios kineki’, porin ijkon oksekin kiitaskej ke tikueyichiuaj Dios akin yekmelauj nemi (1 Corintios 10:31).
2. ¿Keyej moneki ininka titanemiliskej tokniuan keman tikixpejpenaj toni timotaliliskej?
Maski tejuan ueli tikixpejpenaj tein timotaliliskej moneki tiknemiliskej ox kinkuejmolos oksekin kemej timotakentiaj. Timochikauaj amo tikchiuaskej maj oksekin mopinaujmatikan. Tikchiuaj nejin tein tayolmajxitia Biblia: “Maj tisejsemej tiktemokan tikyolpaktiskej tokniuj uan maj tikchiuilikan tein kuali, para maj moyolchikaua” (xikonita Romanos 15:1, 2, TNM).
3. ¿Keniuj kemej timotakentiaj kichiuas maj oksekin kinekikan kiixmatiskej Jiova?
Nochipa timochikauaj kuali timotakentiskej, sayoj ke okachiok keman tiouij nechikolmej oso tiouij titanojnotsatij. Amo tiknekij maj kemej timoitaj kichiua maj amo kinekikan kikakiskej tein kijtoua Biblia. Ta tiknekij maj oksekin kinekikan momachtiskej, uan maj kikualnexti “in tanextililisme de Totajtsin Dios Totemakixtijkatsin” (Tito 2:10).
MAJ OKACHI TIMOMACHTIKAN
Maj tikitakan keniuj uelis timotakentiskej uan timochijchiuaskej kemej oksekin kiitaskej ke tikchiuaj kemej Cristo.
Kemej timoitaj uelis kinextis ox tikinpoujkaitaj akin kipiaj tanauatil. Maski Jiova kiita toyolo kemej timoitaj moneki kinextis ke tikpoujkaitaj.
4. Komo kuali timoitaj tiknextiaj ke tikpoujkaitaj Jiova
¿Keyej moneki tikitaskej maj kuali timoitakan? Xikitakan Salmo 47:2 uan ika xitajtokan nejin:
-
¿Keniuj tikixtaliskej timotakentiskej keman tikmatij ke uelis ika tajtoskej Jiova?
-
¿Yekmelauj moneki maj tikitakan keniuj timochijchiuaj keman timonechikouaj uan titanojnotsaj? ¿Keyej ijkon tikonnemilia?
5. Keniuj kuali tikixpejpenaskej tein timotaliliskej uan kemej timochijchiuaskej
Totasal yeski patiyoj oso amo, moneki maj chipauak uan kemej kinamikis tein tikchiujtoskej. Xikitakan 1 Corintios 10:24 uan 1 Timoteo 2:9, 10. Ompa xikijtokan keyej amo tikuiskiaj tasal...
-
... tein amo kuali moita oso amo chipauak.
-
... tein kichiuas maj oksekin kinemilikan tein amo kuali porin semi kopitstik uan semi kinextia oso moita tonakayo.
Maski akin tikchiuaj kemej Cristo amo moneki tiktakamatiskejok tanauatil tein Dios kimakak Moisés, sayoj ke techmachtia tein Dios kinemilia. Xikitakan Deuteronomio 22:5 uan ika xitajtokan nejin:
-
¿Keyej amo kuali yetok maj se siuat mochijchiua uan maj motakenti kemej moitas ke takat oso se takat kemej moitas ke siuat?
Xikitakan 1 Corintios 10:32, 33 uan 1 Juan 2:15, 16, uan ika xitajtokan nejin:
-
Komo kemej timotakentiaj kinkuejmoloua kampa tinemij oso itech nechikol, ¿moneki itech titanemiliskej? ¿Keyej?
-
¿Keniuj motakentiaj uan mochijchiuaj kampa tionnemi?
-
¿Tikonnemilia ke itech seki taman amo kinamiki ijkon mochijchiuas se tokniuj? ¿Keyej?
Uelis tataman kemej timotakentiskej uan timochijchiuaskej uan no tikyolpaktiskej Jiova.
TEIN SEKIN KIJTOUAJ: “Nejua uelis nimotalilis tein niknekis”.
-
¿No ijkon tiontanemilia? ¿Keyej?
TEIN TIKITAKEJ
Keman kuali tikixpejpenaj keniuj timotakentiaj uan keniuj timochijchiuaj, tiknextiaj ke tikpoujkaitaj Jiova uan oksekin.
Maj tikelnamikikan
-
¿Keyej Jiova kineki maj kuali timotakentikan uan maj timochijchiuakan?
-
¿Katiyejua tamachtilismej itech Biblia techpaleuis maj tikitakan keniuj timoitaj?
-
¿Keniuj kemej timoitaj ika tajtoskej tein tamachtia Biblia?
NO XIKONITA NEJIN
Xikonita toni kinemiliaj oksekin keman kiitaj kemej tionmotakentia.
Xikonita keyej moneki kuali se kinemilis achto ke se motalilis se tatuaje.
“¿Hay algo de malo en hacerse tatuajes?” (Artículo de jw.org)
Xikonita okseki tamachtilismej tein kipia Biblia tein mitsonpaleuis kuali xiontaixpejpena.
“¿Tikueyitaliaj Dios ika tilmaj tein timotaliliaj?” (Tanejmachtijkej, metsti septiembre xiuit 2016)
¿Toni kipaleuij se siuatsin akin kinekia kiyolpaktis Dios maj kiita ika taixejekolis kemej motakentiaj oksekin?
“El arreglo personal era mi piedra de tropiezo” (¡Despertad!, 22 de diciembre de 2003)
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
