Umwe nga umwe wedu ano manera ake okusimira no kujinasirira. Asi kuno ndhungamiriro jo Bhaibheri jingatibesera kuti tisimire zvatinoda nokuita kuti Jehovha adakare. Ngatende tivone ndhungamiriro iji.

1. Ngo zvapi zvingatibesera kuti tisane manera okusimira no kuva vakarongeka?

Tiri vashandiri va Jehovha. Ngo kudaro, tinodikana kuva no mavonekero akacena no ‘kusimira nguvo jakareremera, kujinemesa ngo kujibata no murangariro wakanaka.’ Ngo kudaro, zviito zvedu zvinodikana kutatija kuti ‘tinonamata Mwari.’ (1 Timoti 2:9, 10) Vonanyi ndhungamiriro iji murongomuna: (1) Nguvo jedu jinodikana kuva “jakareremera.” Kangaije imwimwi makambovona kuti pa musongano jo Zvapupu zva Jehovha ivona vanosimira nguvo jakasiyana-siyana, asi nguvo jedu no manera akaita vhuji redu anotatija kuti tinoreremeja Mwari wedu, Jehovha. (2) Masimiriro edu anodikana kuva o “kujibata” zvinoreva kutama kusimira nguvo jinomusa cido co ruvatano kana kuti jinoita kuti vandhu vagare vakatisotesesa. (3) Tinokhombija kuti tino “murangariro wakanaka” kudari tikatama kuteveja nyika ticingazvirangariri. (4) Mavonekero edu nguva jese anodikana kukhombija kuti ‘tinonamata Mwari,’ nokusiya kuti vamweni vavone kuti tinonamatadi Mwari wokadi.—1 Vakorinte 10:31.

2. Masimirire edu angapsasisa kudini hama jedu?

Ngo zvokadi kuti tinodikana kusana nguvo jatinoda kusimira, asi tinodikana kurangarira kuti nguvo jedu jingapsasisa kudini vamweni. Tinoita zvese zvatinokwanisa kuti titame kukhugunya vamweni. Kusiyapo izvo, tinodikana ‘kudakajisa mudoni [wedu] pa zviro zvakanaka kuti timuvangise.’—Verenganyi Varoma 15:1, 2.

3. Masimiriro edu angaitisa kudini kuti vamweni vade kujija ngo pamusoro pa Jehovha?

Tinodikana kuva vakarongeka mukuvo wese, maningi-ningi patinoda kwenda kumusongano no kocumaera. Atidi kuti nguvo jedu jipe ucapupu wakashata nokuita kuti vandhu vatame kupurukira masoko atinonga tecicumaera. Kusiyapo izvo, tinoda kusimira ngo njira inoita kuti “jijiso ya Mwari Muponesi wedu ikujwe,” nokuita kuti vandhu vajije zvizinji ngo pamusoro pa Jehovha—Tito 2:10.

 NASANYI KUPSAKISISA

4. Kuva no mavonekero aushoni kunotatija nderemejo kuna Jehovha

Ngorapi thangwe rinosisira maningi rinotiita kuti tineseke ngo pamusoro po mavonekero edu? Verenganyi Nduyo 47:3, perapo bhuisananyi ngo muvhunjo jinotevera:

• Zvecivoneka kuti tinoimirira Jehovha, izvo zvinodikana kupsasisa kudini masimiriro edu?

• Munorangarira kuti tinodikanadi kuneseka ngo mavonekero edu patinonga tiri kumusongano no kocumaera? Ngenyi muri kunanga kudaro?

 5. Zvatingaita kuti titeme zvivaringo zva ushoni ngo pamusoro po masimirire no mavonekero

Rijanyi VHIDHIYO.

Nguvo jedu ajidikani kuva jo kudhura maningi, asi jinodikana kuva jakacena no kuzwirana no kwatinongaro tiri. Verenganyi 1 Vakorinte 10:24 na 1 Timoti 2:9, 10. Perapo bhuisananyi ngo thangwe rokutama kusimira nguvo . . .

• ngo maitiro okujiregejera.

• jakapsinya, jakafupika maningi, jinovonekera kana jinomusa cido co ruvatano.

Makristu nyamasi uno aadikani kuzwira mutemo wa Mosi. Asi iwona unotijijisa zvizinji ngo pamusoro po zvinorangarira Jehovha. Verenganyi Deuteronòmio 22:5, perapo bhuisananyi ngo muvhunjo unotevera:

• Ngenyi tinodikana kubhasopa no macekehwe o vhuji anoita kuti mwanarume aite inga mwanakaji, mwanakaji woita inga mwanarume?

Verenganyi 1 Vakorinte 10:32, 33 na 1 Johani 2:15, 16, perapo bhuisananyi ngo muvhunjo jinotevera:

• Ngenyi zvakanaka kujivhunjisa kudari: Kureva kuti mavonekero angu angakhugunya ari wese mu ungano kana kwandinogara?

• Vandhu vanosimira ngo manera api no kuva vakarongeka kwamunogararo?

• Munorangarira kuti zvaushoni kuti Mukristu asimire no kuva wakarongeka ngo njira yakadaro? Ngenyi?

 ZVOTAJIJA

Kudari tikatema zvivaringo zvaushoni ngo pamusoro po kusimira no kuva vakarongeka, tinokhombija nderemejo kuna Jehovha no vamweni.

Kuhwirijira

• Ngenyi manera edu okusimira no kuva vakarongeka anosisira kuna Jehovha?

• Ngojapi ndhungamiriro jo Bhaibheri jingatibesera kusana ushoni zvokusimira no kuva vakarongeka?

• Mavonekero edu angapekejesa kudini ucapupu hwakanaka kana hwakashata ngo pamusoro pa Jehovha?