MUTU 52
Tikovwala na kuliwamililisha mwaulemu
Tonse tusankha vatufuna kuvwala komasoti mwatufunila kuliwamililisha. Koma tikokonkheja mfundo za m’Baibolo pa nkhani yamene iyi, tingovwala vovwala vatukonda koma vamene vingakumudwiselini Yehova. Tiyeni tiwone ziyakine mwa mfundo zamene izi.
1. Kansi ni mfundo zotyani zamene zingatiyavye kuti tikosankha kuvwala noliwamililisha luweme?
Tufunika kusankha “vovwala viweme, povwala mwaulemu komasoti mwanzelu” ndipo nthawe zonse tikowoneka luweme kuti ŵanthu ayakine akowona kuti nise ŵanthu amene “olemekeza Mulungu.” (1 Timoteyo 2:9, 10) Tiyeni tiwone mfundo 4 izi: (1) Vovwala vasu vikonkhala “viweme.” Payakine mwiwona kuti pamisonkhano yasu, tuvwala mosiyana-siyana, koma vatuvwala komasoti mwatugelela olo mwatuwamyila sisi yasu, vuwonesha kuti tulemekeza Mulungu wamene watulambila. (2) Kuvwala “mwaulemu” kutanthauza kupewa kuvwala vamene vingachitishe ŵanthu kuganizila vachiwelewele, komasoti kuti akoganizila za sewo mphela. (3) Tuwoneshasoti kuti tuvwala “mwanzelu” tikopewa kungotolela sitaelo iliyonse yanyowani yakavwalidwe na kuliwamililisha. (4) Tuyeja-yeja kuti nthawe zonse tikowoneka monga ŵanthu amene “olemekeza Mulungu” mwakuti ŵanthu ayakine angavutikelini kuzindikila kuti tulambila Mulungu wachendi.—1 Akorinto 10:31.
2. Ndaŵa yanji tufunika kuganizila abale na alongo ŵasu patusankha vatufuna kuvwala?
Ni chendi kuti tili na ufulu wosankha vatufuna kuvwala, koma vingankhale luweme kuganizila mwamene kavwalidwe kasu mwakangakhuzile ŵanthu ayakine. Tupewa kukhumudwisa ayakine, ndipo tuyeja-yeja “kuŵakondwelesha pa vinthu viweme vingaŵatang’ishe.”—Ŵelengani Aroma 15:1, 2.
3. Kansi kavwalidwe kasu kangayavye tyani ŵanthu ayakine kuti ayambe kuphunzila za Yehova?
Olo kuti nthawe zonse tuvwala luweme, koma tuyeja-yeja kuvwala luweme ngako patupezeka pamisonkhano yampingo komasoti tikolalikila uthenga uweme. Tufunalini kuti ŵanthu ayakine akangiwe kumvwishila uthenga uweme chifukwa cha mwatavwalila. M’malomwake, tufuna kuti kawonekedwe kasu kakoyavya ŵanthu ayakine kukopeka na uthenga uweme komasoti “kuti kakowamililisha chiphunziso cha Mpulumusi wasu.”—Tito 2:10.
VATI TIPHUNZILE
Tiphunzile vatingachite kuti ŵanthu ayakine osati akovutika kuzindikila kuti nise Akhilisitu akawona mwatuvwalila na mwatuliwamililishila.
Kawonekedwe kasu kangawoneshe kuti tulemekeza olamulila. Olo kuti Yehova owona vili nkati mwa mitima yasu, kawonekedwe kasu kofunika kakowonesha kuti tulemekeza Yehova
4. Tikowoneka luweme tulemekeza Yehova
Kansi ni chifukwa chikulu chotyani chufunika kutichitisha kuti tikosamala na mwatuwonekela? Ŵelengani Salimo 47:2, ndipo pavuli pake mukambilane makonsho aŵa:
-
Kansi kukumbukila kuti tupanamila Yehova kungatiyavye tyani patusankha vatufuna kuvwala?
-
Kansi muwona kuti ni nzelu kuganizila mwatuwonekela tikankhala pamisonkhano komasoti tikolalikila? Ndaŵa yanji mwayankha tetyo?
5. Vatingachite kuti tikovwala na kuliwamililisha luweme
Vovwala vasu vikonkhala vituŵa komasoti vowamilila malo ŵatili, keno vingankhale vodula olo votchipa. Ŵelengani 1 Akorinto 10:24 na 1 Timoteyo 2:9, 10. Ndipo pavuli pake, mukambilane chifukwa chake tufunika kupewa kuvwala vovwala . . .
-
vifipa olo vosalongosoka.
-
vothina, vuwonesha nkati komasoti vamene vingachitishe ŵanthu ayakine kuganizila vachiwelewele.
Olo kuti Akhilisitu masiku ŵano okonkhejalini chilamulo cha Mose, angaziŵe maganizo a Yehova pankhani ya kavwalidwe kufumila m’Chilamulo chamene ichi. Ŵelengani Deuteronomo 22:5, ndipo pavuli pake mukambilane konsho iyi:
-
Ndaŵa yanji tufunika kupewa kuvwala na kuliwamililisha munjila yamene yuchitisha kuti analume akowoneka ngati anakazi komasoti anakazi akowoneka ngati analume?
Ŵelengani 1 Akorinto 10:32, 33 na 1 Yohane 2:15, 16, ndipo pavuli pake mukambilane makonsho aŵa:
-
Ndaŵa yanji vingankhale luweme kuganizila kawonekedwe kasu mwakangakhuzile ŵanthu a mudela yasu komasoti a mumpingo wasu?
-
Kansi ni masitaelo otyani akavwalidwe na kuliwamililisha oziŵika ngako kwamunkhala?
-
Kansi muwona kuti ayakine mwa masitaelo amene awo angankhalelini aweme kwa Nkhilisitu? Ndaŵa yanji mwayankha tetyo?
Tingavwale noliwamya-wamya mu njila zosiyana-siyana uku tukondwelesha mphela Yehova
ŴANTHU AYAKINE ONENA KUTI: “Ni ufulu wangu kuvwala chilichonse chanufuna.”
-
Kansi mwewo namwe muwona tetyo? Ndaŵa yanji mwayankha tetyo?
MFUNDO ZACHIDULE
Tikosankha luweme vatufuna kuvwala komasoti mwatingaliwamililishile, tuwonesha kuti tulemekeza Yehova komasoti ŵanthu ayakine.
Makonsho oweleja
-
Ndaŵa yanji Yehova ofuna kuti tikovwala komasoti kuliwamililisha luweme?
-
Kansi ni mfundo zotyani zingatiyavye kuti tikosankha mwanzelu vatufuna kuvwala komasoti mwatingaliwamililishile?
-
Kansi mwatuvwalila na mwatuliwamililishila vingachitishe kuti ŵanthu ayakine akowona tyani kulambila kwasu?
PHUNZILANI VINYINJI
Ŵelengani nkhani yamene iyi kuti muziŵe vangaganize ayakine akawona vamuvwala.
“Kansi nukonda kuvwala vovwala votyani?” (Nkhani yapa webisaiti)
Onani chifukwa chake mufunikila kuyamba mwaganiza mukaliye lilemba-lemba m’muŵili.
“Kansi Baibolo yunena kuti tyani pa nkhani yolilemba-lemba m’muŵili?” (Nkhani yapa webisaiti)
Onani mfundo ziyakinesoti zamene zingatiyavye posankha vochita.
“Kansi mavwalidwe ŵanu olemekeza Mulungu?” (Nsanja ya Olonda, September 2016)
Kansi mwanakazi muyakine wowona ntima ekulisha tyani lingalilo iweme pa vosankha va ŵanthu ayakine ponena za mwenzewonekela yove yeka?
