Aha bikwatiraine n’emijwarire n’endeebeka, nitukunda ebitarikushushana. Twakuratira emisingye ya Baibuli, nitujwara ebi turikukunda, kandi nitushemeza Yehova. Ka tushwijume emwe aha misingye egi.

1. Twine kukuratira misingye ki omu mijwarire yaitu n’oku turikweboneza?

Twine kujwara ‘ebijwaro ebitushemereire, twine obucureezi n’okwerinda,’ kandi twine kuguma turi abeecumi kworeka ngu ‘nitutiina Ruhanga.’ (1 Timoseo 2:9, 10) Yetegyereze emisingye ena egi: (1) Twine kujwara ‘ebitushemereire.’ Nk’oku orikureeba omu nteerane z’ekibiina, Abajurizi ba Yehova nibajwara ebitarikushushana, kwonka emijwarire n’emishono yaitu y’eishokye neeyoreka ngu nituramya Yehova. (2) Okujwara ebirikworeka “obucureezi” nikimanyisa okwetantara kujwara ebirikworeka ebicweka by’enshoni, nari ebirikutureetera kwetaho munonga omutima. (3) Nitworeka ngu twine ‘okwerinda’ nari ngu tutebeekaine turikwetantara kujwara ebijwaro bya buri mushono gwona oguhangire. (4) Endeebeka yaitu butoosha eine kworeka ngu ‘nitutiina Ruhanga,’ reero kireetere abandi kumanya ngu nituramya Ruhanga ow’amazima.—1 Abakorinso 10:31.

2. Endeebeka yaitu neekwata eta aha Bakristaayo bagyenzi baitu?

N’obu turaabe twine obugabe bw’okutoorana ebijwaro ebi turikwenda, kwonka twine kuteekateeka aha ku endeebeka yaitu erikukwata aha bandi. Nituteeraho kutagwisa kubi omuntu weena, kureka ‘nitushemeza bataahi baitu,’ kandi nitubombeka.—Shoma Abarooma 15:1, 2.

3. Endeebeka yaitu neebaasa kureetera eta abandi kukunda okuramya okw’amazima?

N’obu turaabe nituteeraho kujwara gye ahari buri mukoro, okukira munonga nitufayo aha mijwarire yaitu twaba nituza omu nteerane z’ekibiina n’omu buheereza. Nituba tutarikwenda kuhuzya abantu, tukabaremesa kuta omutima aha butumwa bukuru obu turikuba tubatwariire. Beitu, endeebeka yaitu eshemereire kureetera abandi kukunda amazima “n’okusiimisa enyegyesa ya Ruhanga Omujuni waitu.”—Tito 2:10.

 SHWIJUMA GYE

4. Endeebeka nungi neeyoreka ngu nituha Yehova ekitiinisa

Ni nshonga ki nkuru eine kutureetera kufayo aha ndeebeka yaitu? Shoma Zaaburi 47:2, kubaasa kugarukamu ebibuuzo ebi:

• Ahabw’okugira ngu nitujwekyera Yehova, tushemereire kujwara tuta?

• Ahabw’enki twine kufayo aha ndeebeka yaitu twaba nituza omu nteerane nari omu buheereza?

 5. Okucwamu gye aha bikwatiraine n’emijwarire n’okweboneza

Zaana VIDIYO.

Yaaba emyenda yaitu n’ey’esente nyingi nari nkye, eine kuba ecumire gye, kandi erikuhikaana n’embeera ei turimu. Shoma 1 Abakorinso 10:24 na 1 Timoseo 2:9, 10, kubaasa kureeba ahabw’enki twine kwetantara kujwara . . .

• ebirikurebera nari ebijabiriire.

• ebirikukwatira aha mubiri, ebirikureeberwamu, nari ebirikworeka ebicweka by’enshoni.

N’obu Abakristaayo baraabe batakitegyekwa Ebiragiro bya Musa, kwonka nibyoreka emiteekateekyere ya Yehova. Shoma Eky’Ebiragiro 22:5, kubaasa kugarukamu ekibuuzo eki:

• Ahabw’enki twine kwetantara emijwarire n’okweboneza ebirikureetera abashaija kureebeka nk’abakazi nari abakazi kureebeka nk’abashaija?

Shoma 1 Abakorinso 10:32, 33 na 1 Yohaana 2:15, 16, kubaasa kugarukamu ebibuuzo ebi:

• Ahabw’enki twine kufayo yaaba endeebeka yaitu neegwisa kubi ab’omu kicweka kyaitu nari ab’omu kibiina?

• Ni mishono ki y’okujwara n’okweboneza ei orikukira kureeba ei orikutuura?

• Ahabw’enki nooteekateeka ngu emwe aha mishono egi neebaasa kuba etashemereire Abakristaayo?

 OMU BUGUFU

Twacwamu gye aha bikwatiraine n’endeebeka yaitu, nitworeka ngu nituha Yehova ekitiinisa n’abandi.

Okweijutsya

• Ahabw’enki Yehova naafayo aha mijwarire yaitu n’oku turikweboneza?

• Twine kukuratira misingye ki twaba nitucwamu aha bikwatiraine n’endeebeka yaitu?

• Abandi nibabaasa kureeba bata okuramya okw’amazima ahabw’endebeeka yaitu?