Ziī ziī ii ɛrɛ kɛ̄ i gbī ekwaaloo sa yaanu doo. Lo i nyɔɔnɛ pio daakuu a waɛ edābeeloo a le bu Baibol, i biaɛfii lo eyaa nu a lee sa i doonage kɔ bu Jɛhova a ɛɛ. I naa ɛp pio lo daakuu.

1. Amunu daakuu Baibol na a bɔloo kɔ i nyɔɔnɛ sɔ̄ i gaa biaɛfii kɛ̄ i kwaaloo doo le nu i yaa a?

A bɔloo kɔ i sagɛ lo e “yaa bɛloo a i bɔloo, bu enwadɛɛ̄ le ekɛɛrɛ a mma,” sa ɛrɛ le ekɛɛrɛ beenyiɛ a “kɔ enwadɛɛ̄ Bari siā.” (1 Timɔti 2:9, 10) Kɛɛrɛbu nia daakuu ama: (1) Nu i yaa ɛrɛ elu lo a “bɔloo.” Dookɛ̄ o emɔna doo bie enɔānu bu bɔŋanaloo, pya nɛɛ Jɛhova ɛrɛ keekee nu a wa nia eyaa, mɛ nu i yaa le kɛ̄ i sere i zia doo tɔgɛ kɔ i nɛ enwadɛɛ̄ Bari i taāŋabah. (2) Yaanu “bu enwadɛɛ̄” kura kɔ i yaanu bu sīdee a naale edāna taɛ maniakɛ̄ bu pya dɔɔ̄na, ale bu sīdee ekue ekɛɛrɛ pya nɛɛ i kumaloo. (3) I tɔgɛ “ekɛɛrɛ a mma” sɔ̄ ii gba ale yaɛ ɛrɛgeba bee aā nu aa tɛɛ̄. (4) I yaanu le kwaaloo a tɔgɛ kɔ i lu pya a “kɔ enwadɛɛ̄ Bari siā,” lo edoo kɔ pya dɔɔ̄na a suā kɔ i yaa taāŋabah kaka Bari.—1 Pya Kɔrint 10:31.

2. Nu i yaa le kɛ̄ i kwaaloo doo dap ɛrɛ pah nyɔɔ pya i wuga bu yira doodoo wa?

Kere sɔ̄ i lu puɛ lo esagɛ nu i yaa a, i kɛɛrɛnage kɛ̄ e’ɛrɛ pah nyɔɔ pya dɔɔ̄na doo. I piiga kuma kɛ̄ i dap doo lokwa ii biirebu lɔgɔ nɛɛ, mɛ, i “doo nu a nia nɛɛ yɛrɛ le nyɔɔ ye le, lo ewu ye yira.”—Buū Pya Rom 15:1, 2.

3. Bu mɛ sīdee na nu i yaa dap doo kɔ pya dɔɔ̄na a nɔ nu akiiloo Jɛhova a?

Kere sɔ̄ a bɔloo kɔ i yaanu bu sīdee a lee dɛ̄dɛɛ̄ sɔ̄ a, elee i nɛ kaāna ekɛɛrɛ nu i yaa sɔ̄ i gaa kii enɔānu bu bɔŋanaloo le sɔ̄ i si uwe zue ue. Ii gbī edabara ekɛɛrɛ pya nɛɛ lɛɛloo yereue a kuī i gaa wa zue nɛ. Taāwo, kɛ̄ i yaanu sa kwaaloo doo dap doo kɔ pya dɔɔ̄na a gbī enɔ kaka ue sa yere ka loo “tɔgɛ nu Bari i Nɛɛ-kpɔā.”—Taitɔs 2:10.

 NƆ YERELOO

4. Sɔ̄ i yaanu leere tɔgɛ kɔ i nɛ enwadɛɛ̄ Jɛhova

Ena alu taɛ nu anua alu ebɛɛ̄ kɔ i yaanu sa kwaaloo leere a? Buū Le-yɔɔ 47:2, lɛɛ o agara pya ebip ama:

• Susuā kɔ i yaanu ɛrɛ pah nyɔɔ kɛ̄ pya nɛɛ ɛp taāŋabah Jɛhova doo edoo kɔ i yaanu doodoo wa?

• O kɛɛrɛge kɔ alu nu suānu le loo lo e’ɛp pya nu i yaa, le kɛ̄ i kwaaloo doo sɔ̄ i kii enɔānu le uwe zue ue ni? Ena anua o kɛɛrɛ doo wo a?

 5. Nu eyerebah i nɛ kɔ i doo kaāna biaɛfii kiiloo nu i yaa le kɛ̄ i kwaaloo doo

Bira lo VIDIO.

Kere nu i yaa sidu ale alu lo ye du kiikɛ̄, a bɔloo kɔ a le ɛɛ sa bɔloo ziī ziī kɛ̄ i le. Buū 1 Pya Kɔrint 10:24 le 1 Timɔti 2:9, 10. Lɛɛ o baatɛ̄ nu anua a bɔloo e’ɔbɛ yaanu . . .

• biaɛ le bu le nu a naa bɔloo.

• a i bii, tɔgɛ kɛ̄ i mɛā le doo, ale a dana taɛ maniakɛ̄ bu pya dɔɔ̄na.

Kere Pya Nɛɛ Kraist naa lena kɛɛ̄ Lok Mozis, ba dapnage nɔ kɛ̄ Jɛhova kɛɛrɛ nu doo. Buū Deuteronomi 22:5, lɛɛ o agara ebip ama:

• Ena anua ii le eyaanu sa kwaaloo bu sīdee edoo kɔ nɛɛwa a bee nɛɛdam, e nɛɛdam a bee nɛɛwa a?

Buū 1 Pya Kɔrint 10:32, 33 le 1 Jɔn 2:15, 16, lɛɛ o agara pya ebip ama:

• Ena anua alu ebɛɛ̄ kɔ i ɛp lo a le nu i yaa biirebu pya a le kɛ̄ i tɔɔ̄ ale pya a le bu bɔŋanaloo a?

• Pya a le kɛ̄ o tɔɔ̄ wee yaanu doodoo wa?

• O kɛɛrɛge kɔ pio sīdee yaanu ama bɔloo Pya Nɛɛ Kraist ni? Ena anua o kɛɛrɛ doo wo a?

 TƐƐ̄NYƆƆ̄

Sɔ̄ i biaɛfii leere nyɔɔ kɛ̄ eyaanu sa kwaaloo doo, i tɔgɛ kɔ i nwadɛɛ̄ Jɛhova sa nwanage dɛɛ̄ pya dɔɔ̄na.

Ebip Tɛ̄ma Nyɔɔ

• Ena anua kɛ̄ i yaanu sa kwaaloo doo kuī loo Jɛhova a?

• Pya amunu daakuu na ebaɛ i loo sɔ̄ i gaa biaɛfii kɛ̄ i yaanu sa kwaaloo doo a?

• Mɛ sīdee na kɛ̄ i yaanu sa kwaaloo doo ɛrɛ pah nyɔɔ kɛ̄ pya dɔɔ̄na ɛp kaka taāŋabah doo a?