Kainxiná jejee nthaxruxianá dituxiana ko jijina. Si rurueená inchi thi ndua ke tjago Biblia nchao situxiana ínchi nthaxruxiana ko kai sunthuʼuna ke Jehová ruchee. Rutsjeʼená inchi de jiʼi.

1. Kekaa thi ndua tjago Biblia ruxraxauná are tsincheʼená kexrein situxiana

Ni cristiano chunda “ke situxiʼina kunixin luntho ndakua dikuni ko ke are rutsujina tsaiʼan ñauna ko ke sikuni ke xraxauna thi jian”. Kai, chunda ke thjua sinthena para ke tsjaguna ke “nchesayeʼena Ndo Dio” (1 Timoteo 2:​9, 10). Detsjeʼe nuo thi ndua ke tjaguaná texto jiʼi. 1) Lunthuana chunda ke “ndakua sikuni” o ndakua seʼe. Ngai rajnee Jehová anto jejee dituxinana -jaña ínchi begikun are bexrathe ngajiná-, aro lunthunana ko ínchi jijiná tjago ke ntharespetaana Dio ke nthasayaana. 2) “Ke tsaiʼan ñauná are rutsujiná” ruchro ke sunthengaʼana luntho ke dikunduxini, richi o ke anto jitsenituni, ko kai sunthuʼaná ke ni icha anto sinthaxruanana ixi kexrein dituxiana. 3) Tjaguná ke “xraxauná thi jian” o ke ndakua xraxauná are dunthengaʼana kexeʼo thi jidachrje de moda. 4) Lunthuana ko kexrein rujijiná chunda ke tsjago ngai ni icha ke jaʼana “nthusayeʼena Ndo Dio” (1 Corintios 10:​31).

2. Kexrein sikuʼen ni chuuná kexrein dituxiana

Jaan ndua ke kainxiná nchao tsincheʼená keʼe thi sunthengaana. Aro rugunda rutsjeʼená ke jiʼi sincheʼa ke ni icha tsunthengixina. Ko nthuʼana ke ni icha chrjuiʼan tsunuʼena. Nthuʼuna thi ndachro nthiʼi: “Ke nanaa de jaʼana sunthuʼuna thi icha jian para ni icha, ko ke jiʼi thi tsengijnana” (tsjeʼe Romanos 15:​1, 2).

3. Kexrein tsengijna icha chujni satsuana Jehová thi jaʼana ndakua dituxiana

Kainxiná thjeená ndakua situxiana. Aro icha are thjiná ngai Nchia Xrathexiná o are thjiuʼuná juajna jian. Rinauʼaná ke ndakuaʼa runichjana de juajna ke thjiuʼuná ixi ndakuaʼa digituxiana. Icha jian, rinauná ke jiʼi tsengijna ichana tsangina thi ndua ko sinchetsujina “thi tjaguaná Dio, thi kuengijnaná” (Tito 2:​10).

 TANGI ICHA

4. Are ndakua dituxiana tjaguná ke nthurespetaana Jehová

Unda ixi anto renthe ke ndakua situxiana. Tsjeʼera Salmo 47:2 ko tjaura de jiʼi:

• Ixi nuana ke jaʼana nthurepresentaana Jehová, kexrein tsengijnaná jiʼi para tsincheʼená kexrein situxiana.

• A dexraxaun ke jaan renthe rutsjeʼená jian kexrein dituxiana are thjiná ngai Nchia Xrathexiná o are thjiuʼuná juajna jian. Unda jaña dexraxaun.

 5. Kexrein tsincheʼená jian lunthuana ko kexrein rujijiná

Tsjeʼera VIDEO.

Thi icha renthe yaa jiʼa kieʼen bithe lunthuana. Icha jian ke thjua seʼe ko ndakua seʼe ínchi jikininxin. Tsjeʼera 1 Corintios 10:​24 ko 1 Timoteo 2:​9, 10. Kuthejan tjaura unda sunthengaʼana luntho ke...

• ... chrjuiʼan dikuni, ke chimeko o ke tadichje.

• ... dikunduxini, richi o ke anto jitsenituni.

Maski xro cristianoná i duthikauʼana thi Ley ke bayee Moisés, aro thi Ley jiʼi thengijnaná thinxiná keʼe thi xraxaun Jehová. Tsjeʼera Deuteronomio 22:5 ko tjaura de jiʼi:

• Unda ixi ndakuaʼa jii ke naa xii situxiʼin xraa naa nchrii o nchrii situxiʼin xraa naa xii.

Tsjeʼera 1 Corintios 10:​32, 33 ko 1 Juan 2:​15, 16, ko tjaura de jiʼi:

• Si ni de rajnaana o de congregación ndakuaʼa dikuʼena kexrein dituxiana, a tsaana juachjaun ixi jiʼi. Unda.

• Kexrein dituxiʼina ko jijina ngai rajnaantha.

• A dexraxaun ke naa de jiʼi ndakuaʼa jii para naa ni cristiano. Unda ixi jaña dexraxaun.

 THI KUANGINÁ

Are ndakua thincheʼená dituxiana ko jijiná, tjaguná ke nthurespetaana Jehová ko ni icha.

A xraxaun thi kuangi

• Unda ixi tsjeʼe Jehová kexrein dituxiana ko jijiná.

• Kexeʼe inchi thi ndua ke tjago Biblia tsengijnaná tsincheʼená kexrein situxiana.

• A nchao tsengijna icha chujni satsuana Jehová thi ndakua dituxiana. Kexrein.