اَسی سارے اپنی پسند دے کپڑے پانا چاہنے آں تے چنگی طرحاں تیار شیار ہونا چاہنے آں۔ جے اَسی بائبل چ دِتے گئے کجھ اصولاں تے عمل کراں گے تے اَسی ایس معاملے چ اپنی پسند وی پوری کر سکاں گے تے یہوواہ نُوں وی خوش کر سکاں گے۔ آؤ فیر کجھ اصولاں تے غور کرئیے۔‏

1.‏ سانوں اپنے پہناوے تے حُلیے بارے کیہڑے اصولاں نُوں ذہن چ رکھنا چاہی دا اے؟‏

سانوں حیادار کپڑے پانے چاہی دے نیں تے اپنے آپ نُوں سمجھ‌داری نال سنوارنا چاہی دا اے۔‏ سانوں صاف ستھرے کپڑے پانے چاہی دے نیں تاکہ ایہہ پتہ چلے کہ اَسی یہوواہ خدا دی عبادت کرن والے آں۔ (‏1-‏تیمُتھیُس 2:‏9، 10‏)‏ ایس بارے ذرا ایہناں چار اصولاں تے غور کرو:‏ (‏1)‏ ساڈے کپڑے حیادار ہونے چاہی دے نیں۔ کپڑیاں تے والاں دے سٹائل بارے ساڈی اپنی اپنی پسند اے۔ پر تُسی ساڈیاں عبادتاں تے ویکھیا ہوئے گا کہ ساڈے کپڑیاں تے حُلیے توں ساڈے خدا یہوواہ دی وڈیائی ہوندی اے۔ (‏2)‏ سانوں ایہو جہے کپڑے نئیں پانے چاہی دے جنہاں توں دُوجیاں دے ذہن چ گندے خیال آن یاں فیر اوہناں دا دھیان ساڈے تے لگ جائے۔ (‏3)‏ سانوں سمجھ‌داری نال کم لینا چاہی دا اے تے ہر نویں فیشن تے سٹائل دی نقل کرن توں بچنا چاہی دا اے۔ (‏4)‏ ساڈے پہناوے تے حُلیے توں ہمیشاں ظاہر ہونا چاہی دا اے کہ اَسی یہوواہ خدا دی عبادت کرنے آں۔—‏1-‏کُرنتھیوں 10:‏31‏۔‏

2.‏ ساڈے پہناوے تے حُلیے دا ساڈے ہم‌ایماناں تے کیہہ اثر پیندا اے؟‏

ایہہ سچ اے کہ اَسی اپنی مرضی دے کپڑے پا سکنے آں۔ پر سانوں ایس گل دا خیال رکھنا چاہی دا اے کہ ساڈے پہناوے تے حُلیے دا دُوجیاں تے کیہہ اثر پے رہیا اے۔ سانوں پوری کوشش کرنی چاہی دی اے کہ ساڈی وجہ توں کسے نُوں ٹھوکر نہ لگے سگوں سانوں اپنے گوانڈھی دی خوشی تے بھلائی دا سوچنا چاہی دا اے تے اوہدا حوصلہ ودھانا چاہی دا اے۔‏‏—‏رومیوں 15:‏1، 2 نُوں پڑھو۔‏

3.‏ ساڈے پہناوے تے حُلیے دی وجہ توں لوک یہوواہ بارے سکھن لئی کیویں تیار ہو سکدے نیں؟‏

ساڈی کوشش ہوندی اے کہ اَسی ہر موقعے تے حیادار کپڑے پائیے۔ عبادتاں تے مُنادی لئی تیار ہوندے ویلے اَسی ایس گل دا ہور وی خیال رکھنے آں۔ اَسی نئیں چاہندے کہ ساڈے کپڑیاں یاں والاں دے سٹائل نُوں ویکھ کے لوکاں دا دھیان اوس خاص پیغام توں ہٹ جائے جیہڑا اَسی اوہناں نُوں دینا چاہنے آں۔ ایہدی بجائے اَسی چاہنے آں کہ ساڈے پہناوے تے حُلیے نُوں ویکھ کے لوکاں دے دل چ یہوواہ بارے سکھن دا شوق پیدا ہووے تے ساڈے نجات دین والے خدا دی تلیم دی خوب‌صورتی ظاہر ہووے۔—‏طِطُس 2:‏10‏۔‏

 ہور سوچ‌وچار لئی

4.‏ ساڈے چنگے پہناوے تے حُلیے توں یہوواہ خدا دی وڈیائی ہوندی اے

اپنے پہناوے تے حُلیے دا خیال رکھن دی سب توں وڈی وجہ کیہڑی اے؟ زبور 47:‏2 نُوں پڑھو تے فیر ایہناں سوالاں تے گل بات کرو:‏

• ساڈے پہناوے تے حُلیے نُوں ویکھ کے لوک ساڈے خدا یہوواہ بارے چنگی یاں بھیڑی رائے قائم کر سکدے نیں۔ ایس گل نُوں ذہن چ رکھدے ہوئیاں اَسی کیہو جہے کپڑے پانواں گے تے کیہو جہے نئیں پانواں گے؟‏

• کیہہ تواڈے خیال چ ایہہ واقعی ضروری اے کہ اَسی عبادتاں تے جاندے ویلے تے مُنادی کردے ویلے اپنے کپڑیاں تے حُلیے دا خیال رکھئے؟ جے ہاں تے کیوں؟ جے نئیں تے کیوں نئیں؟‏

 5.‏ اَسی اپنے پہناوے تے حُلیے بارے چنگے فیصلے کیویں کر سکنے آں؟‏

ویڈیو چلاؤ‏۔‏

ساڈے کپڑے بھانویں مہنگے ہون یاں سستے، ایہناں نُوں موقعے دے لحاظ نال مناسب ہونا چاہی دا اے۔ 1-‏کُرنتھیوں 10:‏24 تے 1-‏تیمُتھیُس 2:‏9، 10 نُوں پڑھو۔‏ فیر گل بات کرو کہ سانوں ایہو جہے کپڑے کیوں نئیں پانے چاہی دے .‏ .‏ .‏

• جیہڑے بوہت زیادہ ڈھلے تے اُوٹ‌پٹانگ ہون۔‏

• جیہڑے بوہت تنگ ہون، جنہاں توں دُوجیاں دے ذہن چ گندے خیال آن یاں جنہاں چوں جسم نظر آئے۔‏

مسیحی موسیٰ دی شریعت دے پابند تے نئیں پر ایہدے توں اَسی یہوواہ دی سوچ بارے بوہت کجھ سکھ سکنے آں۔ اِستثنا 22:‏5 نُوں پڑھو تے فیر ایس سوال تے گل بات کرو:‏

• سانوں ایہو جیہا حُلیہ کیوں نئیں بنانا چاہی دا تے ایہو جہے کپڑے کیوں نئیں پانے چاہی دے جنہاں توں مرد عورتاں لگن تے عورتاں مرد لگن؟‏

1-‏کُرنتھیوں 10:‏32، 33 تے 1-‏یوحنا 2:‏15، 16 نُوں پڑھو تے فیر ایہناں سوالاں تے گل بات کرو:‏

• سانوں ایس گل دا دھیان کیوں رکھنا چاہی دا اے کہ ساڈے پہناوے تے حُلیے توں ساڈے گوانڈھیاں تے کلیسیا چ بھین بھراواں نُوں ٹھیس نہ پونچے؟‏

• تواڈے علاقے چ کیہو جہے کپڑیاں دا فیشن عام اے؟‏

• کیہہ تواڈے خیال چ ایہناں چوں کجھ فیشن مسیحیاں لئی نامناسب نیں؟ جے ہاں تے کیوں؟ جے نئیں تے کیوں نئیں؟‏

 خلاصہ

اَسی اپنے پہناوے تے حُلیے بارے چنگے فیصلے کر کے یہوواہ خدا تے دُوجیاں لئی عزت ظاہر کرنے آں۔‏

دہرائی

• یہوواہ خدا ساڈے پہناوے تے حُلیے نُوں ایناں اہم کیوں سمجھدا اے؟‏

• سانوں اپنے پہناوے تے حُلیے بارے فیصلے کردے ویلے کیہڑے اصولاں تے غور کرنا چاہی دا اے؟‏

• ساڈے پہناوے تے حُلیے دا یہوواہ خدا دی عبادت بارے لوکاں دی سوچ تے کیہہ اثر ہو سکدا اے؟‏