Kitail koaros kin perenki pilada atail likou oh mehn ipwerek. Ma kitail doadoahngki ekei kaweid en Paipel sansal kan, kitail kak pilada dahme kitail men likawih oh ni ahnsowohte pil kaperenda kupwuren Siohwa. Kitail koasoiapene ekei kaweid en Paipel pwukat.

1. Kaweid en Paipel dah kan me pahn sewese kitail en pilada atail likou oh mehn ipwerek?

Kitail anahne pilada “likou me konehng me kin kasalehda wahu oh madamadau pwung,” oh kin ahnsou koaros mwomw mwakelekel me kin kasalehda atail kin “poadidiong Koht.” (1 Timoty 2:9, 10) Tehk kaweid en Paipel pahieu pwukat: (1) Atail likou kan anahne “konehng.” Mweinele ke kilangehr nan mihting kan me sapwellimen Siohwa aramas akan kin likouda ni soangsoangen mwohmw kan. Ahpw atail likou oh sidail en pitenmoang anahne kasalehda wahu ong atail Kohto ahnsou koaros. (2) Likouda ni “wahu” kin wehwehki en dehr likouda ni ahl me pahn kahrehiong meteikan en ahneki madamadau sapwung de ren nohn tetehk kitail. (3) Kitail kin kasalehda “madamadau pwung” ni atail sohte kin alasang sidail kapw koaros de likou koaros me aramas tohto kin perenki. (4) Ahnsou koaros mwomwatail anahne kin kasalehda me kitail kin “poadidiong Koht,” pwe meteikan en kak kilang me kitail kin kaudokiong Koht mehlelo.​—1 Korint 10:31.

2. Dahme riatail Kristian kan pahn medewehki duwen mwomwatail?

E mehlel me kitail kak pilada dahme kitail men likawih ahpw kitail anahne medewe dahme meteikan pahn medewehki atail pilipilo. Kitail kin wia uwen atail kak en dehr kansensuwedihada emen ahpw kitail en “wiahiong mehn [mpatail] dahme mwahu pwe en kakehlakahda ih.”​—Wadek Rom 15:1, 2.

3. Ia duwen mwomwen atail likou eh kak kamwakid aramas akan en men esehla duwen Siohwa?

Kitail kin nantihong likawih likou me konehng ahnsou koaros, ahpw kitail kin uhdahn kanahieng mwomwen atail likou ni atail towehda mihting kan oh iang kalohk. Kitail anahne kanahieng pwe aramas akan de sohla men rong rongamwahwo pwehki mwomwatail. Ahpw, kitail men mwomwatail en kamwakid aramas akan en men esehla Kohto me kitail kin papah oh “kalinganahda padahk en atail Sounkomour.”​—Taitus 2:10.

 KALAUDEHLA OMW ESE MET

4. Kitail kin wauneki Siohwa ma mwomwatail kin soandi mwahu

Ia kahrepe me keieu kesempwal kitail en nsenohki mwomwatail en soandi mwahu? Wadek Melkahka 47:2, oh mwuri koasoiapene peidek pwukat:

• Pilipil dah me kitail pahn wiahda me pid atail likou ni atail tamataman me met pahn kamwakid en meteikan ar kin kilengwohng Siohwa?

• Ke medewe e kesempwal kitail en kin nsenohki mwomwatail ni atail kin iang towehda mihting oh iang kalohk? Dahme kahrehda?

 5. Dahme kak sewese kitail en pilada atail likou oh mehn ipwerek?

Kilang KISIN KASDO.

Sohte lipilipil ma atail likou kan pweilaud de pweitikitik, e anahne mwakelekel oh konehng dahme kitail wiewia. Wadek 1 Korint 10:24 oh 1 Timoty 2:9, 10. Mwuri koasoiapene dahme kahrehda kitail en dehr likawih likou me . . .

• sohte soandi mwahu oh mwakelekel de kihou.

• kasal paliwar de likou me kin kahrehiong meteikan en ahneki madamadau sapwung, pwehki e nohn it.

Kristian kan sohte mi pahn Kosonned en Moseso, ahpw met kin kasalehda sapwellimen Siohwa madamadau. Wadek Deuderonomi 22:5, oh mwuri koasoiapene peidek wet:

• Dahme kahrehda kitail en dehr likawih likou me kin wiahiong ohl en mwomwen lih de lih mwomwen ohl?

Wadek 1 Korint 10:32, 33 oh 1 Sohn 2:15, 16, oh mwuri koasoiapene peidek pwukat:

• Dahme kahrehda kitail anahne nsenohki ma atail likou kin kalingeringerihada ekei nan atail wasahn kousoan de nan mwomwohdiso?

• Soangen sidail oh likou dah me aramas kalapw likawih nan omw wasa?

• Ke medewe me ekei soangen sidail pwukat sohte konehng Kristian kan? Dahme kahrehda?

 DAHME KE SUKUHLKIER

Ni atail kin wiahda pilipil mwahu duwen dahme kitail pahn likawih oh mwomwatail, kitail kin wauneki Siohwa oh meteikan.

Kousapahl

• Dahme kahrehda atail likou oh mehn ipwerek kin kesempwal ong Siohwa?

• Kaweid en Paipel dah kan me pahn sewese kitail en pilada ia pahn mwomwatail?

• Ia duwen atail likou oh mwomwatail eh kak kamwakid meteikan ar kin kilengwohng kaudok mehlel?