YACHANA PARTI 52
Imahuata alichirisha sumacta churarina anchi
Caran runaguna amu munashcata alichirisha llachapata churarinaun. Alita ricuringahua, ñucanchi gustashca llachapata churarinchi. Ñucanchi munashcata churarishahuas, Biblia mandashcagunata casusha, Jehovata cushiyachinata ushanchi. Chita imashinata pactachishun.
1. Ali ricuric llachapata churaringahua ima cunaigunatata catina anchi
Jesusta caticcunaga, “alilla ricuricta, ali tupullata churarina anaun, mana pinganayacta, alita yuyasha alichirina anaun”. Chasnallata, “Diosta sirvishcata ricuchingahua”, sumac tacsashca llachapata churarina anaun (1 Timoteo 2:9, 10, TNM). Cai textomanda chuscu cunaigunata ricui: 1) “Alilla ricuricta, ali tupullata churarina” anchi. Can tandarinaibi ricushca shina, Jehovata sirviccuna caran amu munashca llachapata churarinaun. Chasna ashahuas, ñucanchi alichirisha churarishca, ñaccharishca, Jehovata tucui uras balichishcata ricuchin. 2) “Mana pinganayacta” churarina chanchi. Sipicta llachapata churarisha, shuccunata mana alita yuyachinata ushashun. Huinguna ñucanchillata ricunauchun, mana munanayacta churarinchichu. 3) “Alita yuyasha” causangahua, cai munduibi runaguna caran mushuc llucshishca llachapata churarishca shina, mana churarina chanchi. 4) “Diosta sirvishcata ricuchingahua”, sumacta churarina anchi. Runaguna ñucanchi ali churarishcata ricusha, ñucanchi sirtu Diosta adorashcata yachangauna (1 Corintios 10:31).
2. Ñucanchi churarinata anllausha, imahuata ñucanchi huauquigunai panigunai yuyana anchi
Caran amu ima llachapata churarinata anllana anchi. Chasna acpihuas, ñucanchi churarishcahuan, shuccunata mana pandachinata munanchichu. Pinganayacta ricuric llachapata mana churarinchichu. Cai cunaita catinchi: “Ñucanchi caran shuc, chi shuc quiric huauquita alita rashcahuan yanapana manchi, paihuas sinzhi quiric tucungahua” (Romanos 15:1, 2ta leipai).
3. Ñucanchi churarishca, imashinata shuccuna Jehovamanda yachana munaita charingahua yanapan
Caran partima ringahua, ali llachapata churarinata munanchi. Chasnallata, tandarinama ringahua, predicangahua, mas ali gustu llachapata churarina anchi. Ñucanchi alichirisha churarishcahuan, runaguna Biblia yachachishcata balichinauchun nisha munanchi. Ñucanchi churarishcata ricusha, shuccuna Bibliamanda mas yachana munangauna. Chasnallata, “ñucanchita quishpichic Diospa Shimi ali man nishami rimangauna” (Tito 2:10).
CAIMANDA MASTA YACHAI
Diosta sirvic runaguna, ima tunu llachapata churarina ashcata, imashina alichirina ashcata ricushun.
4. Ñucanchi alichirina, alita churarina Jehovata balichishcata ricuchin
Imahuata alichirisha sumacta churarina anchi. Apocalipsis 4:11ta leichi, huasha cai tapuigunamanda cuintanacuichi:
-
Runaguna Jehovata alabanauchun nisha, imashinata churarina anchi.
-
Tandarinama ringahua, predicangahua, imahuata ali llachapata churarina anchi.
5. Ali llachapata anllasha churarisha alichirishunchi
Ñucanchi llachapa, ansalla o ashca balic ashahuas, sumac tacsashca, alita ricurina an. 1 Corintios 10:24 y 1 Timoteo 2:9, 10ta (TNM) leichi. a Huasha, cai tapuigunamanda cuintanacuichi:
-
Mana alita ricuric llachapata churarinalla chanchi. Imahuata casna yuyangui.
-
Sipicta, yapa ahuai ricuricta, pinganayacta ricuric llachapata churarina chanchi. Imahuata casna yuyangui.
Jesusta caticcuna, Moisesta cushca leyta mana casushahuas, cai ley mandashcaga, Jehova yuyashcata intindichitucunchi. Deuteronomio 22:5ta leichi, huasha cai tapuigunamanda cuintanacuichi:
-
Cari, huarmi shina churarinaga ali chan. Huarmi, cari shina churarinaga ali chan. Imahuata casna yuyangui.
1 Corintios 10:32, 33 y 1 Juan 2:15, 16ta leichi, huasha cai tapuigunamanda cuintanacuichi:
-
Ñucanchi causaushca pistuibi, congregacionbihuas, runaguna ñucanchi alichirisha churarinata mana alita ricucpi, imatata rana anchi.
-
Can causashca pistui runaguna, imashinata alichirisha churarinaun.
-
Chasna paiguna churarishca, Jehovata sirvic runagunaraicu ali chan. Imahuata chasna yuyangui.
MAICANGUNAGA CASNAMI NINAUN: “Ñuca ima munashca llachapata churarini”.
-
Canbas chasnallatachu yuyangui. Imahuata casna yuyangui.
IMATA YACHASHCANGUI
Ñucanchi gustuta alichirisha, ali llachapata churarishaga, Jehovata, shuccunatahuas respetanchi.
Yachashcata cuintai
-
Jehovaga imahuata ñucanchi ali llachapata churarinauchun munan.
-
Alita churarisha ricuringahua, Bibliaibi ima cunashcagunata yanapaitucushun.
-
Shuc runaguna Jehovata adorana munaita charinauchun nisha, imashinata churarina anchi. Caiga, imahuata balishca an.
CANLLATA MASTA YACHAI
Can churarishcata ricusha shuccuna imatata yuyanaun.
“Ñuca churarishcahuan ima tunu runa ashcata ricuchini” (jw.org internet pistuibi)
Tatuajeta rarina ali chan. Chita mana raushallata, caibi yuyai.
Alita rangahua, Biblia cunashcagunata yachai.
“Ñucanchi churarishca Jehovata atunyachinzhu” (La Atalaya, septiembre de 2016)
Shuc runaguna ima sami churarishcata respetangahua, ali shunguyuc huarmita imata yanapara.
“Shuc runaguna churarishca ñucaraicu mana ali chara” (¡Despertad!, 22 de diciembre de 2003)
a 1 Timoteo 2:9, 10 (TNM): “Chasnallata, huarmigunaga alilla ricuricta, ali tupullata churarina anaun, mana pinganayacta, alita yuyasha alichirina anaun. Ñaccharisha shimbarinahuan, curita o perlagunata o yapa balic llachapata mana churarina chanaun. Randi, cai huarmiguna Diosta sirvishcata ricuchingahua, sumacta churarisha, alita rasha causana anaun”.