Sarine isi amen različno vkus keda kerela pe lafi bašo urajbe hem bašo izgled. Dali šaj te zadržina amaro vkus bašo urajbe hem izgled, a ko isto vreme te kera bahtalo e Jehova? Oja šaj, ako ikeraja amen ko nekobor ednostavna bibliska načelija. Te dikha kola tane adala načelija.

1. Kola načelija šaj te vodinen amen keda valjani te odlučina so ka urava hem sar ka izgledina?

Amaro urajbe hem amaro izgled valjani te ovel pristojno, skromno hem razborito. Isto agjaar, valjani sekogaš te ova čista, soske adalea sikavaja e javerenge kaj služinaja e Devleske (1. Timotej 2:9, 10). Sar šaj te primenina akala štar načelija? 1) Pristojno: Sar so šaj sine te dikhe taro amare sostanokija, amen sar e Jehovaskere sluge isi amen različna vkusija, ama amaro urajbe hem amare frizure sekogaš sikavena kaj poštujnaja amare Devle. 2) Skromno: Valjani te pazina te na privlekujna previše vnimanie ki amende hem te na pottiknina e javeren ko nemoralna misle. 3) Razborito: Na valjani te sledina sekoja nevi moda ko sveto. 4) Služinaja e Devleske: Amaro urajbe hem amaro izgled sekogaš valjani te sikavel kaj služinaja e Devleske. O manuša okolu amende lokheste valjani te dikhen kaj amen obožavinaja e čačutne Devle (1. Korinkjanite 10:31).

2. Sar amaro urajbe hem amaro izgled vlijajnela upro amare phralja hem phenja?

Iako isi amen sloboda te birina so ka urava hem sar ka izgledina, sepak valjani te razmislina sar adava ka vlijajnel upro javera. Amen na mangaja te kera nekoj te osetinel pe nezgodno. Namesto adava, daja amendar sa te kera adava soj tano šukar amare pašutneske te šaj te izgradina le. (Čitin Rimjanite 15:1, 2.)

3. Sar šaj amaro urajbe hem amaro izgled te kerel o manuša te mangen te sikljoven poviše bašo Jehova?

Sekogaš trudinaja amen te urava amen hem te izgledina šukar. Ama, posebno pazinaja ko adava keda džaja ko sostanokija hem keda siem ki služba. Adava keraja le adaleske so na mangaja te cida e manušengoro vnimanie taro šukar haberi so propovedinaja le. Namesto adava, amen mangaja adalea sar uravaja amen hem sar izgledinaja te ukrasina o sikljojba taro amaro Spasiteli, o Devel. Adava šaj te kerel o manuša te mangen te sikljoven poviše baši leste (Tit 2:10).

 DOZNAJN POVIŠE

4. Amaro šukar urajbe hem izgled sikavela poštovanje e Jehovaske

Koja tani i najvažno pričina soske pazinaja ko amaro urajbe hem ko amaro izgled? Čitin Psalm 47:2, a palo adava keren lafi bašo akala pučiba:

• Sar adava so džanaja kaj amen pretstavinaja e Jehova valjani te vlijajnel upro adava sar uravaja amen hem sar izgledinaja?

• So mislinea, dali tano čače doborom važno te pazina ko amaro urajbe hem izgled keda džaja ko sostanokija hem keda siem ki služba? Soske mislinea agjaar?

 5. So ka pomožinel amenge te ana šukar odluke bašo amaro urajbe hem amaro izgled?

Dikh o VIDEOKLIPI.

Bizi razlika dali amare šeja tane skupa ili na, ola valjani te oven čista hem soodvetna baši situacija kote so arakhljovaja. Čitin 1. Korinkjanite 10:24 hem 1. Timotej 2:9, 10, a palo adava keren lafi bašo akala pučiba. Soske na valjani te urava šeja kola soj tane...

• neuredna ili preterano ležerna?

• previše tesna, previše phravde ili provokativna?

Iako amen na siem telo e Mojseeskoro zakoni, sepak ov sikavela amenge sar o Jehova razmislinela. Čitin 5. Mojseeva 22:5, a palo adava keren lafi bašo akava pučibe:

• Soske na valjani jekh murš te uravel pe hem te izgledinel sar jekh džuvli ili jekh džuvli te uravel pe hem te izgledinel sar murš?

Čitin 1. Korinkjanite 10:32, 33 hem 1. Jovanovo 2:15, 16, a palo adava keren lafi bašo akala pučiba:

• Soske na valjani te ovel amenge sa jekh sar o javera hem o phralja taro sobranie dikhena ko adava sar uravaja amen hem sar izgledinaja?

• Sar uravena pe hem sar izgledinena o manuša ko than kote so živinea?

• So mislinea, dali adava urajbe hem adava izgled tano soodvetno jekhe hristijaneske hem soske mislinea agjaar?

 SO SIKLILEM

Keda pazinaja sar uravaja amen hem sar izgledinaja, sikavaja poštovanje e Jehovaske hem e javerenge.

Sar ka odgovorine?

• Soske tano važno e Jehovaske sar uravaja amen hem sar izgledinaja?

• Kola načelija šaj te vodinen amen keda valjani te odlučina so ka urava hem sar ka izgledina?

• Sar amaro urajbe hem amaro izgled vlijajnela upro adava sar o javera dikhena ko Jehova?