Секоне йекхеске амендар харешинен различна шехя (дрехи) тай прическес. Ако керас десаве букя, колато пхенел и Библия, ащи хем те урявас со харешинел аменге, хем те анас радост е Йеховаске. Нека те дикхас десаве съвекя тари Библия.

1. Со ка помагинел аменге те решинас сар те урявас амен тай сар те лачшарас амен?

Аме мангас „те урявас амен сарто требе, те на сикавас амен амаре шехиенца тай те овас гогявер, кана избиринас со те урявас“. Дикхас винаги амаре шехя те овен шуже, за те сикавас, кай „уважинас е Девлес“. (1 Тимотей 2:9, 10) Дикх калка щар съвекя: 1) Те урявас амен „сарто требе“. Сарто дикхлян ко събрания, е Йеховаскоро народос урявен пес различно, ама амаре шехя тай амаре прическес сикавен, кай уважинас амаре Девлес. 2) „Те на сикавас амен амаре шехиенца“ означинел те на традас околен те дикхен аменде или те мислинен песке мръсна букя, кана дикхен амен. 3) Ка сикавас, кай синям „гогявер“, като на сигярас те кинас аменге всичко со ачшол модерно тай на керас аменге о най-модерна прическес. 4) Амаре шехя винаги требе те сикавен околенге, кай „уважинас е Девлес“ тай кай служинас леске. (1 Коринтяни 10:31)

2. Соске требе те мислинас амаре пхраленге тай пхениенге, кана решинас со те урявас?

Секо йекх амендар ащи коркоро те решинел со те урявел. Ама со ка мислинен или со ка пхенен окола, като дикхен сар синям урявде? На мангас никхаске те ачшол неудобно амендар. Аме керас со ащи, за те помагинас околенге те ачшон верна е Йеховаске. (Четине Римляни 15:1, 2.)

3. Соске о мануша ащи те манген те жанен по-бут е Йеховаске, като дикхен сар синям урявде?

Аме дикхас винаги те урявас амен, сарто требе, ама кана жас ко събрания тай кана проповединас, внимавинас още по-бут. Аме на мангас о мануша те дикхен амен, вместо те шунен со проповединас ленге. Мангас като дикхен сар синям урявде, о мануша те манген те жанен и истина тай о букя, колато сикавел о Дел „те дикхьон [ленге] още по-шукар“. (Тит 2:10)

 РОДЕ ПО-ХОРЕСТЕ

4. Кана внимавинас сар урявас амен, сикавас, кай уважинас е Йеховас

Со най-бут требе те традел амен те мислинас дали урявас амен сарто требе? Четинен Псалм 47:2 тай хоратинен калке въпросиенге:

• Сар требе те урявас амен, като жанас, кай като дикхен амен о мануша ка мислинен е Йеховаске?

• Мислинес ли, кай си важно сар урявас амен, кана жас ко събрания тай кана проповединас? Соске?

 5. Со ка помагинел аменге те решинас сар те урявас амен тай сар те лачшарас амен

Дикхен о КЛИПИ.

Нанай значение кизом си скъпа амаре шехя. Важно си те овен шуже тай те избиринас со те урявас, като мислинас кате ка жас тай со ка керас. Четинен 1 Коринтяни 10:24 тай 1 Тимотей 2:9, 10. После хоратинен соске на требе те урявас шехя, колато си...

• мелале, смачкиме или пхаравде

• бут танг, къса, прозрачна или авер шехя, колато ка траден околен те мислинен песке мръсна букя, кана дикхен амен.

Въпреки кай на спазвинас о Закони, ковато о Дел диняс е Моисейес, лестар ащи те ахальовас сар мислинел о Йехова. Четинен Второзаконие 22:5 тай хоратинен калке въпросиеске:

• Соске на требе те урявас шехя, колато керен е мрушен те дикхьон сар жувля, тай е жувлиен те дикхьон сар мруша?

Четинен 1 Коринтяни 10:32, 33 тай 1 Йоан 2:15, 16 тай хоратинен калке въпросиенге:

• Соске требе те мислинас дали ачшол неудобно околенге тари махала или таро сбори, кана дикхен сар синям урявде?

• Сар урявен пес тай саве прическес керен песке о мануша отхе, кате бешес?

• Мислинес ли, кай десаве калке букиендар нанай е християниенге? Соске?

 СО СИКЛИЛЯМ

Кана мислинас саве шехя те урявас тай сар те лачшарас амен, сикавас, кай уважинас е Йеховас тай околен-да.

О най-важна букя таро уроки

• Соске си важно е Йеховаске сар урявас амен?

• Саве букиенге требе те мислинас, кана решинас со те урявас или сави прическа те керас аменге?

• Со ащи те мислинен о мануша е Йеховаске, като дикхен сар синям урявде?