Hakenes mendar hi peskro style. Te rikrah mer men ap biblakre prinzipje, nai hidjrah mer ninna, hoi menge an mare jaka shukar hi. Dikas kanna ap sawe prinzipje, har maro ripaske i Jehowes nai sharella.

1. Ap hawe prinzipje hunte dikas, te djala pral maro ripaske?

Mer riwas men gar wi-ladjedes, un witar gar jaake, te dikell hakeno ap mende. Maro shukarpen hunte sikrell pes gar an kutch koowa — ap maro ripaske hunte sikrell pes, kai patsah mer ap o Debleste (1. Timoteo 2:9, 10). Kre tuke pral kola star prinzipje i shero: (1) I Jehoweskre menshe riwenn pen gar jaake, kai well wawarenge wi-ladjedo koowa an o shero. (2) An o Khetnepen i Jehoweskre Rakepangrendar nai dikell jek, kai ninna te hi hakenes i wawar style, phrala un phenja pen gar jaake riwenna, kai dikell hakeno ap mende. Maro ripaske un mare balla hunte wenn jaake, kai sikrell pes mari respekta glan o Debleste. (3) Mer te sikrah goswepen, te djala pral maro ripaske, hunte djas mer gar pal haki newi moda, hoi della. Mer hunte ginas menge witar gar halauter, hoi newo un kutch hi. (4) An kowa, hoi mer riwah un har mer wi dikah hunte sikrell pes, kai kamah mer, te well o Dewel sharedo (1. Korintarja 10:31).

2. Hoske dikas ninna pal kowa, har wawar ap o ripaske dikenna?

Ninna te nai riwell pes hakeno mendar jaake, har job kamella, hi kowa mishto, te dikas pal kowa, har wawar ap maro ripaske dikenna. Hoske? Mer kamah gar, kai ladjenn wawar, te dikenn le maro ripaske. “Hakeno mendar hunte djiwell jaake, te dikell o wawar latches ap leste un well sorleder an o patsepen” (Dik pal an Remarja 15:1, 2).

3. Har nai krell maro ripaske, kai kamenn wawar budeder pral i Jehoweste te djinell?

Ninna te kamah mer men an hako tsiro jaake te riwell, kai well o Jehowah sharedo, hi menge kowa an i Versammlunga un an mari Debleskri Budi budeder moldo. Mer kamah gar, kai tchorell maro ripaske o moldepen dran ko latcho lab, hoi mer i menshenge anah. Maro ripaske hunte sikrell “har mishto o Debleskro drom hi” — jaake sharah o Debles (Tito 2:10).

 RODAS DUREDER

4. Hoi mer riwah, nai sikrell mari respekta glan i Jehoweste

Hoske hi menge kowa jaake bud moldo, kai dikah mer shukar, djudjes un railes win? Dikenn pal an Gilja 47:2, 3, un rakrenn khetne pral:

• Te djinah, kai representierah i Jehowes: Har hunte riwas mer men an?

• Hunte well menge kowa tchatchepah jaake bud moldo, hoi mer riwah, te ham an o Khetnepen oder te ham an i Debleskri Budi? Hoske peneh tu kowa jaake?

 5. Har te sikras goswepen an kowa, hoi riwah, un har mer wi dikah

Dikenn o VIDEO.

Pash o ripaske djala gar pral kowa, kitse lowe mer plaissrah — djala pral kowa, kai hunte well maro ripaske an haki situationa djudjo un railo. Dikenn pal an 1. Korintarja 10:24, un 1. Timoteo 2:9, 10, un rakrenn khetne pral kowa, hoske mer tchi riwah, te hi kowa …

• gar djudjo, paash, oder zu leger.

• jaake sarno, oder jaake win tchindo, kai hi kowa wi-ladjedes.

Ninna te ham buder gar tel i Moseskre laba, sikrenn le menge, har o Jehowah ap kowa dikella. Dikenn pal an 5. Mose 22:5, un rakrenn khetne pral:

• Hoske te riwell pes i morsh gar jaake har i djuwel, un i djuwel gar jaake har i morsh?

Dikenn pal 1. Korintarja 10:32, 33, un 1. Johanni 2:15, 16, un rakrenn khetne pral:

• Hoske te kras mer menge i shero pral kowa, har wawar — dran i Versammlunga oder kote kai mer djiwah — ap kowa dikenna, hoi mer riwah?

• Hawo style hi kote kai tu djiweh kanna modern?

• Hoi penals tu: Dell kote i style, hoi i christeske tchi hi? Hoske peneh tu kowa jaake?

 HOI KATE PENLO WAS

Mer sikrah i Jehowes un ninna wawaren mari respekta, te riwah men railes un gar wi ladjedo.

Hoi penals tu?

• Hoske hi i Jehoweske kowa gar jek, har mer wi dikah?

• Ap hawe biblakre prinzipje hunte rikras mer men, te djala pral kowa, hoi mer riwah un har mer wi dikah?

• Hoske nai krell maro style, kai rakrenn wawar latches pral o tchatchepen?