AISISIAET NA 52
Kanuinyo Eraar Enapewok ka Epone Loitakania Oni Kotunga Ibore Yenepol?
Ijaatar oni kere keda aseuneta nuikamunitos enape keda epone loikotor oni atakan kotunga. Arai itup oni aicoreta nuka Ebaibuli, ipedori oni aseun enape loikoto oni konye korai loisiyalamikinit Yawe. Erereosi ber oni aicoreta ngun.
1. Anu bo aicoreta nuingarakinete oni aseun anapito keda epone loikotor oni atakan otunga?
Ipedori oni aseun “anapito nuibusak, kaitasono ka acoit,” kasalakinito kaomisio nuelaete nuitodunitos ‘ayongit Edeke.’ (1 Timoteo 2:9, 10) Kaanyutu aicoreta nu aongon: (1) Ekoto igoenewok koraasi ‘luibusak.’ Kwape idaunitor ijo aanyun kotoma airiamununeta nuatukot, aseuneta nuka itunga luka Yawe eraas nuegelegela, konye anapito keda epone loitemonokinia oni itim, itodunit ayongit Edeke loimai oni. (2) Aseun anapito “kaitasono” erai akepolou ebe ainap igoen lumam isidikete ipudesia luka aelo, karaida ainakinit luce aomoom erono nuikamunitos enapewok. (3) Ipedori oni aitodun “acoit” kopone loamamut atupakinit kangolipone kere loka igoen lualomunak. (4) Ekoto epone loijaar oni kitodunite ‘ayongit Edeke,’ tetere luce ejenunete ebe imai oni Edeke lokabeit.—1 Ikorinton 10:31.
2. Kanuinyo ibusakinitor oni apodokinit iinacanawok naiseunia oni igoen luinapi?
Karaida ejai oni ailajaara aseun igoen luinapi, ibusakinit oni aomoom nuikamunitos epone loetiroria anapitowok luce. Iswamai oni nuipedori kere mam aituguikin idiotunganan kotoma onapewok konye “kesiyalamikisi oni nginitunganan ikeidunyet kodum ajokis kodukoi da.”—Kosiom Iromayon 15:1, 2.
3. Epone ani epedoria enapewok aisupun itunga toma aima nakabeit?
Karaida inapi oni ejok kapakio kere, ibusakinit oni apodokinit noi epone loinapia oni ilosi airiamununeta keda alimonokin. Mam oni ikoto enapewok ainakin itunga apalun akiro nuajokak nuilimonokini oni. Konye ekoto anapitowok korai naisupuni itunga toma abeit ido naitubusikinit “aisisianakin naka Eketajaraniwok.”—Tito 2:10.
KISISIAU NUIPU
Kisisiau epone loipedoria oni aanyun ebe anapitowok ka epone loitakania oni kotunga, iriamara keda aimawok kwape Ikristayon.
4. Anapitowok ka atakan ejok kotunga itodunit ebe iyongit oni Yawe
Inyo ibore yenepol kakere yeneinakinit oni apodokinit epone loitakania oni kotunga? Kosiom Isabulin 47:2, kosodete aimor aingiseta nuta:
-
Aijen ebe ibwoikinit oni Yawe, epone ani ingarakiniata ngun oni aiswamaun aseuneta nuejok nuikamunitos enape?
-
Iwomit ijo erai ibore yenepol oni apodokinit anapitowok ka epone loitakania oni ilosi airiamununeta ka alimonokin? Kanuinyo, arai bo kanuinyo mam?
5. Epone lopedoret aitolomun aseuneta nuejok nuikamunitos anapito ka epone loitakania oni kotunga?
Arai eraasi igoenewok luepol ebeei arai mam, ibusakinit koraasi luelaete ido kiriamara keda ediojautene. Kosiom 1 Ikorinton 10:24 keda 1 Timoteo 2:9, 10. Kosodete aimor kanuinyo ibusakinitor oni aisac anapit igoen . . .
-
lubwoluk arai bo lumam ibusakinito.
-
lueridakinitos, luecaete, arai bo luisidikete ipudesia luka aelo.
Karaida mam Ikisila Luka Musa imoriaritos Ikristayon, itejenunitos epone loewomooma Yawe. Kosiom Ikisila 22:5, kosodete aimor aingiset nata:
-
Kanuinyo ibusakinitor oni aisac anapito keda aitala itim kopone loitusubit ikiliok bala angor ido angor da bala ikiliok?
Kosiom 1 Ikorinton 10:32, 33 keda 1 Yokana 2:15, 16, kosodete aimor aingiseta nuta:
-
Kanuinyo ibusakinitor oni aisac aitakadikin itunga luka atutubetewok arai bo iinacanawok kopone loinapitor arai bo loitakania oni?
-
Ani bo epone loka enape ka aitubusiar akuan loetapit katutubetekus?
-
Iwomit ijo iponesio ngul kere luka enape ka aitubusiar akuan eraasi luibusakinitos Ikristayon? Kanuinyo, arai bo kanuinyo mam?
EBAKASI ICETUNGA EBE: “Ejai eong apedor ainap ediogoe kere loakoto.”
-
Icamunit kereka jo ngun? Kanuinyo, arai bo kanuinyo mam?
NUIDAU AISISIAUN
Naitolomununa oni aseuneta nuajokak nuikamunitos epone loitakania oni kotunga, itoduni oni ebe iyongit oni Yawe kaluce da.
Ainyogoor
-
Kanuinyo eraar enapewok ka epone loitubusiaritor oni akuan ibore yenepol kaneejai Yawe?
-
Anu bo aicoreta nuingarakinete oni aseun anapito naejok ka epone loitakania oni kotunga?
-
Epone ani einakinia anapitowok ka epone loitakania oni kotunga, luce asesen aima nakabeit?
ISISIAU BOBO NUTA
Isisiau nuepedorete itunga aomoom kanuikamunitos ikonigoen.
Kisisiau ibore yenibusakinitor ijo aomoom jokan eroko eseuna aiwadik arai bo ainomakin aputosia akuan.
“Inyo Ebala Ebaibuli Kanuikamunitos Aiwadik Arai Ainomakin Aputosia Akuan?” (Aisisiaet naka olago)
Kisisiau aicoreta ace nuingarakinete oni kotoma aitolomun aseuneta.
“Isiyalamikinit Kereka Anapitokon Edeke?” (Watchtower, Elap Loikanyetaongon 2016)
Epone ani abu adiopeberu kopedoria asesen luce ejok kanu ekecenape ka epone loitubusiaritotor kesi awatekec?