HAAPIIRAA 52
No te aha mea faufaa to tatou faaahuraa e to tatou huru rapaeau?
Mea au na tatou ia maiti eaha te ahu ta tatou e oomo e eaha to tatou huru ia hiˈohia mai. Ia pee tatou i te mau faaueraa tumu Bibilia ohie, eita tatou e maiti noa i ta tatou e au e faaoaoa atoa râ tatou ia Iehova. E hiˈo anaˈe te tahi o teie mau faaueraa tumu.
1. Eaha te mau faaueraa tumu e aratai ia tatou ia maiti i te huru faaahuraa?
E maiti tatou “i te ahu e tano, ma te tura e ma te manaˈo paari,” e ia vai mâ to tatou huru rapaeau o te faaite ra e te “haamori [ra tatou] i te Atua.” (Timoteo 1, 2:9, 10) A hiˈo i teie mau faaueraa tumu e maha: (1) Ia “tano” noa to tatou ahu. Ua ite paha oe i te mau putuputuraa a te mau Ite no Iehova, ua rau te huru faaahuraa, e faaite râ to tatou faaahuraa e faaneheneheraa i te rouru i te faatura i to tatou Atua. (2) Ia faaahu tatou “ma te tura” te auraa, eita tatou e pee i te eˈa o te turai ia vetahi ê ia faatupu i te manaˈo ino e ia huti rahi roa i te ara-maite-raa o vetahi ê i nia ia tatou. (3) E faaite tatou i te “manaˈo paari” ma te ore e pee i te peu no nia i te faaahuraa e auhia e te taata. (4) E faaite ohie noa to tatou huru rapaeau ia vetahi ê e te “haamori [ra tatou] i te Atua.”—Korinetia 1, 10:31.
2. Nafea to tatou huru rapaeau e ohipa ˈi i nia i to tatou mau taeae e tuahine?
Noa ˈtu e tiamâraa to tatou no te maiti i to tatou faaahuraa, a feruri eaha ta te reira e faatupu i nia ia vetahi ê. E tamata tatou i te rave i te mea maitai ia ore te hoê taata ia turori, ia imi râ tatou i “te maitai o to [tatou] taata tupu no te haapuai i to ˈna faaroo.”—A taio i te Roma 15:1, 2.
3. Nafea to tatou huru rapaeau e turai ai ia vetahi ê ia haapii i te parau mau?
Noa ˈtu e faaahuraa tano to tatou i roto e rave rahi tupuraa, ia haapao maitai râ tatou i to tatou faaahuraa i te mau putuputuraa a te amuiraa e i te pororaa. Eita tatou e hinaaro ia ore te taata e tâuˈa i te poroi faufaa ta tatou e faaite atura. Maoti râ to tatou huru rapaeau, e tauturu te reira ia vetahi ê ia farii “i te haapiiraa a to tatou Faaora.”—Tito 2:10.
A FAAHOHONU ATU Â
A hiˈo e nafea to tatou faaahuraa e huru rapaeau e haapapu ai e ua riro tatou ei Kerisetiano.
4. E faaite to tatou huru rapaeau au noa i te faatura no Iehova
Eaha te tumu faufaa roa no tatou o te haapapu e hiˈoraa maitai to tatou? A taio i te Salamo 47:2, e a aparau i teie mau uiraa:
-
Nafea to tatou faaahuraa e ohipa ˈi i nia ia tatou ei tia no Iehova?
-
No oe, mea tano anei ia haapeapea no nia i to tatou huru rapaeau ia apiti tatou i te mau putuputuraa e i roto i te pororaa? No te aha oia aore ra no te aha aita?
5. Nafea ia rave i te mau maitiraa maitai no nia i te faaahuraa?
Noa ˈtu e ahu moni rahi to tatou aore ra aita, mea maitai ia vai mâ noa e ia tano no te mau tupuraa taa ê ta tatou e apiti atu. A taio i te Korinetia 1, 10:24 e te Timoteo 1, 2:9, 10. E a aparau no te aha eita tatou e oomo i te ahu . . .
-
haapaoraa ore aore ra mea rarahi roa.
-
mea vî, mea piri i te tino aore ra e faatupu i te mau manaˈo ino.
Noa ˈtu aita te mau Kerisetiano i raro aˈe i te ture a Mose, e faaite ra te reira i te manaˈo o Iehova. A taio i te Deuteronomi 22:5, e a aparau i teie uiraa:
-
No te aha aita tatou e oomo i te ahu o te vahine no te tane aore ra te ahu o te tane no te vahine?
A taio i te Korinetia 1, 10:32, 33 e te Ioane 1, 2:15, 16, e a aparau i teie mau uiraa:
-
No te aha e haapao maitai tatou i to tatou huru rapaeau ia ore te reira e faahuru ê i te feia tapiri ia tatou e i roto i te amuiraa?
-
Eaha te huru faaahuraa o te mau taata i ǒ oe?
-
No oe, mea tano ore anei teie mau huru faaahuraa no te hoê Kerisetiano? No te aha oia aore ra no te aha aita?
TE MANAˈO O VETAHI: “E tiaraa to ˈu no te oomo i te ahu ta ˈu e hinaaro.”
-
E farii anei oe? No te aha oia aore ra no te aha aita?
HAAPOTORAA
Ia rave tatou i te mau maitiraa maitai no nia i to tatou huru rapaeau, e faaite tatou i te faatura no Iehova e no vetahi ê.
Haamanaˈoraa
-
No te aha mea faufaa to tatou faaahuraa no Iehova?
-
Eaha te tahi o te mau faaueraa tumu o te aratai i ta tatou mau faaotiraa no nia i to tatou huru rapaeau?
-
Nafea to tatou huru rapaeau e ohipa ˈi i nia i ta vetahi huru hiˈoraa i te haamoriraa mau?
HIˈOPOA
A hiˈo eaha ta to oe huru faaahuraa e faaite ra.
“Eaha ta to ˈu faaahuraa e faaite ra?” (Tumu parau natirara)
A haapii no te aha e haerea paari ia feruri i te mau faahopearaa hou a nanao ai ia oe.
“Eaha ta te Bibilia e parau ra no nia i te tatau?” (Tumu parau natirara)
A hiˈo hau atu â mau faaueraa tumu o te nehenehe e aratai i ta tatou mau faaotiraa.
“To oe huru faaahuraa, te faahanahana ra anei i te Atua?” (Te Pare Tiairaa Tetepa 2016)
Nafea te hoê vahine feruriraa tano i faatupu ai i te hoê hiˈoraa aifaito no nia i te mau faaotiraa a vetahi ê no nia i to ratou iho huru rapaeau?