XCHANOBIL 52
¿Mi tsots skʼoplal ti kʼu yelan ta jmeltsan jbatike?
Jelajtik ti kʼu yelan ta jkʼupin ta jlap jkʼuʼ jpokʼtike xchiʼuk ti kʼu yelan ta jmeltsan jbatike. Xuʼ onoʼox jtʼujtik ti kʼu yelan ta jkʼantike, jaʼ noʼoxe skʼan jtsaktik ta venta li beiltaseletik ta Vivlia sventa xmuyubaj kuʼuntik li Jeovae. Jkʼeltik batel li beiltaseletik taje.
1. ¿Kʼusi beiltaseletik ta Vivlia skʼan jtsaktik ta venta ti kʼu yelan ta jmeltsan jbatike?
Li yajtsʼaklomtak Kristoe ‹skʼan ti lekuk noʼox smeltsan sba ta skʼuʼ spokʼike, ti oyuk smelolik xchiʼuk ti xichʼ spʼijilike›. Skʼan xvinaj ti ‹yichʼojik ta mukʼ Dios› ti kʼu yelan tsmeltsan sbaike (1 Timoteo 2:9, 10). Jkʼeltik batel chanib beiltasel li ta teksto taje. 1) Skʼan ‹lekuk noʼox› ta kʼelel li jkʼuʼ jpokʼtike. Jech kʼuchaʼal aviloj li ta tsobobbaile jelajtik ti kʼu yelan ta jkʼupin ta jlap jkʼuʼtike, pe li jkʼuʼ jpokʼtike xchiʼuk ti kʼu yelan ta jtus joltike xvinaj ti kichʼojtik ta mukʼ Diose. 2) ‹Oyuk smelolal› ti kʼu yelan ta jmeltsan jbatike. Taje jaʼ skʼan xal ti mu toj pakʼaluk xa tajek ta jlap jkʼuʼ jpokʼtike o ti yalel xa chkakʼ ta ilel jbekʼtaltik o ti toj yan xa sba ta kʼelele. 3) ‹Skʼan xkichʼ jpʼijiltik›, taje te smakojbe skʼoplal ti mu naka slapeluk xa kuʼuntik skotol li kʼusitik achʼ chlaj lokʼanuk tale. 4) Ti kʼu yelan ta jmeltsan jbatike skʼan xvinaj ti ‹kichʼojtik ta mukʼ Diose›, yuʼun jaʼ jech chkakʼbetik yil yantik ti jaʼ chkichʼtik ta mukʼ li melel Diose (1 Korintios 10:31).
2. ¿Kʼu yuʼun skʼan jnopbetik skʼoplal kʼu yelan chil ermanoetik ti kʼu yelan ta jmeltsan jbatike?
Akʼo mi xuʼ onoʼox jtʼuj jtuktik ti kʼu yelan ta jlap jkʼuʼ jpokʼtike, pe skʼan onoʼox jnoptik mi mu chopoluk chilik li yantike. Chkakʼtik persa ti mu jsokbetik yoʼontonike o ti mu chopoluk kʼusi xlik snopik kuʼuntike, yuʼun ta jchʼuntik li tojobtasel liʼe: «Ta jujuntal jaʼ jpastik li kʼusi lek chaʼi yantike sventa slekilalik xchiʼuk sventa jtsatsubtasbetik yoʼontonik» (kʼelo Romanos 15:1, 2).
3. ¿Kʼuxi xuʼ x-ochik-o ta mantal yantik ti kʼu yelan ta jlap jkʼuʼ jpokʼtike?
Chkakʼtik persa ti lekuk xvinaj jkʼuʼ jpokʼtik ti buyuk noʼox chijbate. Pe mas to jech skʼan jpastik kʼalal chijbat ta tsobajeletike o kʼalal chijbat ta cholmantale. Mu jkʼantik ti sok skʼoplal kuʼuntik li cholmantal ta jpastike. Li kʼusi ta jkʼantike jaʼ ti xtijbat yoʼonton yantik yoʼ x-ochik ta mantale xchiʼuk ti masuk to ‹kʼupil sba xkʼot kuʼuntik li chanubtasel yuʼun Jkoltavanej kuʼuntike› (Tito 2:10).
JCHANTIK TO BATEL MAS
Jkʼeltik batel kʼuxi xuʼ jnaʼtik mi yajtsʼaklomutik Kristo xijvinaj ti kʼu yelan ta jlap jkʼuʼ jpokʼtike xchiʼuk ti kʼu yelan ta jmeltsan jbatike.
Ti kʼu yelan ta jlap jkʼuʼ jpokʼtike jaʼ te chvinaj mi kichʼojtik ta mukʼ li krixchanoetik ti yichʼoj yabtelike. Manchuk mi jaʼ tskʼel Jeova li kʼusi oy ta yut koʼontontike, pe tsots skʼoplal jkʼeltik ti kʼu yelan ta jlap jkʼuʼ jpokʼtike, yuʼun jaʼ jech chkakʼtik ta ilel ti kichʼojtik ta mukʼe.
4. Chichʼ-o ichʼel ta mukʼ Jeova ti kʼu yelan ta jmeltsan jbatike
¿Kʼu yuʼun toj tsots skʼoplal ti skʼan lekuk jmeltsan jbatike? Kʼelik Salmo 47:2 xchiʼuk albeik skʼoplal li sjakʼobiltak liʼe:
-
¿Kʼu yelan ta jlap jkʼuʼ jpokʼtik mi te ta joltik ti jaʼutik yajtunel Jeovae?
-
¿Mi tsots skʼoplal ti skʼan jmeltsan jbatik lek kʼalal chijbat ta tsobajeletike xchiʼuk kʼalal chijbat ta cholmantale? ¿Kʼu yuʼun ti jech chavale?
5. ¿Kʼuxi xuʼ xijtojob stʼujel li jkʼuʼ jpokʼtike xchiʼuk ti kʼu yelan ta jmeltsan jbatike?
Mu ventauk mi toyol o mi yalel stojol li jkʼuʼtik ta jlaptike, yuʼun li kʼusi mas tsots skʼoplale jaʼ ti chukʼbiluke xchiʼuk ti lekuk xvinaje. Kʼelik 1 Korintios 10:24 xchiʼuk 1 Timoteo 2:9, 10. Mi laje, albeik skʼoplal ti kʼu yuʼun muʼyuk ta jlaptik kʼuʼiletik...
-
... ti muʼyuk smelolale.
-
... ti toj pitsʼajtike, ti xvinaj xa yuʼun jbekʼtaltike o ti chopol xa kʼusi tsnop kuʼuntik yantike.
Manchuk mi muʼyuk xa ta jchʼuntik li Smantal Moisese, chakʼ onoʼox kiltik li kʼusi tsnop Jeova ti kʼu yelan skʼan jlap jkʼuʼ jpokʼtike. Kʼelik Deuteronomio 22:5 xchiʼuk albeik skʼoplal li sjakʼobil liʼe:
-
¿Kʼu yuʼun muʼyuk lek ti xkoʼolaj xa ta jun vinik ti kʼu yelan tsmeltsan sba li jun antse xchiʼuk ti xkoʼolaj xa ta jun ants ti kʼu yelan tsmeltsan sba li jun vinike?
Kʼelik 1 Korintios 10:32, 33 xchiʼuk 1 Juan 2:15, 16 xchiʼuk albeik skʼoplal li sjakʼobiltak liʼe:
-
¿Mi skʼan van jeltik ti kʼu yelan ta jlap jkʼuʼ jpokʼtik mi tsokbe-o yoʼonton li yantike o ti chopol xa kʼusi tsnopike? ¿Kʼu yuʼun?
-
¿Kʼu yelan skʼuʼ spokʼik xchiʼuk kʼu yelan tsmeltsan sbaik ti bu nakalote?
-
¿Mi oy van butik muʼyuk lek ti slap li jun yajtsʼaklom Kristoe? ¿Kʼu yuʼun ti jech chavale?
Xuʼ jelajtik kʼu yelan ta jlap jkʼuʼ jpokʼtik ti lek chil xtok li Jeovae.
JUNANTIKE XI CHALIKE: «Mu ventauk kʼusi jlap, yuʼun ta jkʼupin».
-
¿Mi lek chavaʼi ti kʼu yelan chalike? ¿Kʼu yuʼun?
¿KʼUSI LA ACHAN?
Mi ta jtʼujtik lek li jkʼuʼ jpokʼtike xchiʼuk mi lek ti kʼu yelan ta jmeltsan jbatike, jaʼ jech chkakʼtik ta ilel ti kichʼojtik ta mukʼ Jeova xchiʼuk li yantike.
Svulesobil ta joltik
-
¿Mi tsots skʼoplal chil Jeova ti kʼu yelan ta jmeltsan jbatike?
-
¿Kʼusi beiltaseletik ta Vivlia tskoltautik ta sventa ti kʼu yelan ta jmeltsan jbatike?
-
¿Kʼusi tsnopik ta stojolal steklumal Jeova ti kʼu yelan ta jmeltsan jbatike?
XUʼ TO XAKʼEL LIʼE
Kʼelavil kʼusi chalik ta atojolal ti kʼu yelan chalap akʼuʼ apokʼe.
«¿Kʼusi chalik ta jtojolal ti kʼu yelan ta jlap jkʼuʼ jpokʼe?» (Xuʼ te xata ta jw.org)
Kʼelavil kʼu yuʼun skʼan xanop lek baʼyuk mi chavakʼ atatuajee.
Kʼelavil yan beiltaseletik ta Vivlia ti jaʼ tskoltaot ti kʼu yelan skʼan xameltsan abae.
Kʼelavil kʼusi koltaat jun ants yoʼ stsak ta venta ti kʼu yelan tslap skʼuʼ spokʼ li yantike.
Xuʼ van chakʼupin skʼelel xtok liʼe
LI KʼUSITIK TSJAKʼILANIKE
¿Kʼu yelan li chanubtasel ta Vivlia chakʼik li stestigotak Jeovae?
Li ta matanal chanubtasel chakʼik li stestigotak Jeovae xuʼ xatunes li Vivlia oy avuʼune, xuʼ xavalbe ti xchiʼinot li avutsʼ avalale xchiʼuk avamigotak.
