Vosi yetu tu kuete ovina tu sole viatiamẽla konjila ndomo tu wala kuenda kemolẽho lietu. Nda tu kuama olonumbi Viembimbiliya, ka tu nõla lika ovina tu sole, pole, tu ka sanjuisavo Yehova. Tu konomuisi vimue pokati kolonumbi viaco.

1. Olonumbi vipi vi tu kuatisa oku nõla uwalo kuenda emolẽho lietu?

Tu sukila oku nõla ‘uwalo wa sunguluka, haiwo u lekisa esumbilo, lolondunge’ kuenda oku amamako lemolẽho liwa li situlula ‘efendelo lia Suku.’ (1 Timoteo 2:9, 10) Kũlĩhĩsa olonumbi evi vikuãla: (1) Uwalo wetu u sukila oku “sunguluka.” Ndomo wa siata oku ci mola kolohongele viekongelo, afendeli va Yehova va sole ovina via litepa, pole, uwalo wetu kuenda oku posuisa kuetu esinga, vi lekisa okuti, tua sumbila Suku una tu fendela. (2) Oku wala “lesunguluko” ku lomboloka okuti, ka tu wala lonjila yi vetiya vakuetu oku kuata oloñeyi ale oku tiamisila calua utima kokuetu. (3) Tu lekisa okuti tu wala “lolondunge” nda ka tu kuama onjila ndomo omanu voluali va wala kuenda emolẽho liavo. (4) Emolẽho lietu otembo yosi li sukila oku situlula “esumbilo tu kuetele Suku,” oco tu situlule komanu okuti, tu fendela Suku yocili.—1 Va Korindo 10:31.

2. Momo lie tu sukilila oku sokolola ku vamanjetu poku nõla eci tu wala?

Ndaño okuti tu kuete elianjo lioku nõla uwalo wetu, tu sukila oku sokolola ovina emolẽho lietu li pondola oku kokela ku vakuetu. Etu, tu likolisilako oco ka tu ka sumuise omunu umue, pole, tu ‘linga eci ciwa ku una o lisungue [letu] oco tu u kolise.’—Tanga Va Roma 15:1, 2.

3. Emolẽho lietu li pondola oku vetiya ndati omanu oku lilongisa catiamẽla ku Yehova?

Osimbu tu likolisilako oku wala ciwa olonjanja viosi, tu kũlĩhĩsa lutate konjila ndomo tu wala poku enda kolohongele viekongelo kuenda kupange woku kunda. Etu ka tu yongola oku tateka omanu koku yevelela esapulo liolondaka viwa omo liemolẽho lietu. Omo liaco, tu yongola okuti onjila ndomo tu wala yi vetiya vakuetu oku lilongisa ovina vikuavo viatiamẽla ku Suku kuenda oku “posuisa elongiso Liupopeli wetu.”—Tito 2:10.

 LILONGISA ONDONGOSI

4. Emolẽho liwa li lekisa esumbilo ku Yehova

Esunga lipi lia velapo lieci tu sukilila oku li sakalaisa lemolẽho lietu? Tanga Olosamo 47:2, noke konomuisa apulilo a kuãimo:

• Omo okuti tulonumiwa via Yehova, tu vetiyiwa oku wala lonjila yipi?

• O sima okuti ca sunguluka oku li sakalaisa lemolẽho lietu poku enda kolohongele kuenda kupange woku kunda? Momo lie?

 5. Ndomo tu nõla onjila ya sunguluka yatiamẽla kuwalo wetu loku liposuisa

Tala OVIDEO.

Ci kaile okuti uwalo wetu wa tĩla ale sio, owo u sukila oku yela kuenda oku likuata lekalo lietu. Tanga 1 Va Korindo 10:24 kuenda 1 Timoteo 2:9, 10. Noke konomuisa esunga lieci tu sukilila oku yuvula uwalo . . .

• ka wa sungulukile haiwo wa liña.

• wa tõla, u situlula olonepa vietimba, ale u vetiya vakuetu oku kuata oloñeyi ka via sungulukile.

Ndaño okuti Akristão ka va kasi vali vemẽhi Liocihandeleko ca eciwile ku Mose, pole, va pondola oku lilongisa ovina vialua viatiamẽla kovisimĩlo via Yehova. Tanga Esinumuĩlo 22:5, noke konomuisa epulilo li kuãimo:

• Momo lie tu yuvuila ovowalo a lingisa alume oku molẽha ndakãi, ale akãi oku molẽha ndalume?

Tanga 1 Va Korindo 10:32, 33 kuenda 1 Yoano 2:15, 16, noke konomuisa apulilo a kuãimo:

• Momo lie tu sakalalela nda emolẽho lietu li sumuisa vakuetu posongo tu kasi ale vekongelo?

• Ovowalo api loku liposuisa kua siata posongo yove?

• O sima okuti ovowalo amue ka a sungulukile Kakristão? Momo lie?

 NYE WA LILONGISA?

Poku nõla onjila ya sunguluka yatiamẽla kemolẽho lietu tu lekisa okuti tua sumbila Yehova kuenda vakuetu.

Oku Pitulula

• Momo lie oku wala kuenda emolẽho lietu vi kuetele esilivilo ku Yehova?

• Vipi vimue pokati kolonumbi vi sukila oku tu songuila poku nõla olonjila viatiamẽla kemolẽho lietu?

• Emolẽho lietu li kuatisa ndati ale oku nyõla onjila ndomo omanu va tenda efendelo liocili?