YOOSOMA 52
Mwaha wa heeni oraaya wootthuneya othanlela ikuwo sahu nave wiirattela wahu?
Ootheene hiyo, sookhala ikuwo sinanisivela owara ni moota woowara mene sookhala miruku siri mBiblyani sineera sinikhavihere othanla ikuwo naari mawarelo ahu yaawo eneera emuhakalalihe Yehova. Vaanaano va, ninkela woona miruku mimoha-mimoha sa seiyo.
1. Heeni enkela onikhavihera moota woothanla ikuwo sahu ni mawarelo ahu?
Hiyo nri Anamoona a Yehova onnatthuneya weera mawarelo ahu ni ikuwo sahu sikhaleke sooreera nave niwareke “ikuwo sophwanelela, sohùliha muru ni sowiyeviha.” Napaka eyo, ninkela woonihera weera ‘nimmukokhorela Muluku.’ (1 Timotheyo 2:9, 10) Moone miruku mixexe (4) seiyo sineera sinikhavihere. (1) Ikuwo sahu sikhaleke ‘soophwanelela’. Araaya mwannanto woona moota anwaraaya Anamoona a Yehova yakhala mmuthukumanoni. Ti vawonto maihi ahu ni moota woowara ninnoonihera weera ninnamuttittimiha Muluku ahu, Yehova. (2) Ikuwo sahu sikhaleke ‘soohuliha muru’, naari neere sihikhaleke soowooneela naari sootira. (3) Ikuwo ‘sowiyeviha’ ninnoonihera weera ninnawara nnene, wakhala weera hiyo khanintthara moota atthu amulaponi anwaraaya. (4) Wiirattela wahu woonihereke weera ‘nimmukokhorela Yehova Muluku ootteela’, nave-tho niwoonihereke atthu akina moota nimmukokhorelaahu Muluku ekhaikhai.—1 Akorinto 10:31.
2. Mawarelo ahu ankela waavoleela hayi asinna?
Ekhaikhai weera hiyo pooti othanla ikuwo sinanisivela mene nto ontthuneya weera nuupuwelele moota sineeraaya saavoleele atthu akina ikuwo ninthanlaahu. Hiyo ninniilipihera weera nihaakwattulihe atthu akina. Opwaha mwa yeeyo, nintthuna weera ‘mutthu ti mutthu ahiyo amusivelihe mukwaawe amweerelaka sooreera ni amukhomaalihaka.’—Mmusome Aroma 15:1, 2.
3. Mawarelo ahu moota heeni yaakelaaya ohelela onamoona wooreera wa Yehova?
Nintthuna weera mawarelo ahu ekhaleke ooreerela itempu sootheene, otepaxawene naarowaka omithukumanoni ni muteko woolaleera. Hiyo khanintthuna weera ikuwo sahu sihelele onamoona woonanara iweerihaka atthu nnaalaleeraahu ohipwatthela mitthenka ninlaleyaahu. Opwaha mwa yeeyo, nintthuna weera mawarelo ahu, epakihe “wera mothemwene nihusiho na Muluku, Nvulux’ahu, nittittimihiwe,” yaapakihaka atthu waakhulela mitthenka sooreera sa Yehova seiyo ninlaleyaahu.—Tito 2:10.
WEERA MUXUTTERE SINTXIPALE
Moone moota ikuwo sahu ni owara wahu sinaakhaviheraaya atthu woona weera hiyo makristu ekhaikhai.
Mawarelo ahu pooti woonihera waari weera ninaattittimiha anamalamulela kapena hooye. Emoha-moharu, mawarelo ahu tho pooti woonihera waari weera ninamuttittimiha Yehova nnaamweera owo asuwenleene etthu eri va murimani vahu
4. Wiirattela wahu onoonihera nttittimiho wa Yehova
Mwa wa heeni oraaya wootthunaya opwatthela wiirattela wahu? Musome Nsalmu 47:3 [47:2, Tradução do Novo Mundo], avinyaka mutthekule ni ipontu sinttharelana:
-
Hiyo nimmukhalela onamoona Yehova. Vano eyo enkela ovoleela hayi moota ninwaraahu?
-
Neereke munnaakhulela weera onnitthuneya ophwatthela mawarelo ahu vaavo hiyo ninkelaahu omithukumanoni naari muteko woolaleera? Mwaha wa heeni?
5. Ninkela opaka hayi soothanla sooreera voohima sa owara wahu?
Ikuwo sahu khasintthuneya weera sikhale soorikaxa mene onnatthuneya weera nratteleke nave sikhaleke soophwanelela owara. Mmusome 1 Akorinto 10:24 ni 1 Timotheyo 2:9, 10. Avinyaka mutthekulane voohima sa mwaha wa heeni ikuwo sahu sihintthuneyaaya okhala . . .
-
soohiramuseya naari soohireerela
-
ohikhala sootira, sootxampuliwa itthu sintxipale, soowoonela naari moota mukineene onoonihera erutthu.
Ehuhu yakhalayi, Yehova ahaavaha atthu awe malamulo murweela mwa Mose, ekhaikhai weera makristu mahukwaano khentthara malamulo awo mene malamulo awo ennanixuttiha moota Yehova ononelaawe voohima sa wiirattela wahu. Mmusome Olaleya 22:5, avinyaka mutthekule ni epontu enttharelana:
-
Mwaha wa heeni ontthuneyaaya weera nisempe ikuwo naari ohuwa wahu maihi mpaka onavalaveliha osuwela waari weera mulopwana naari muthiyana nave muthiyana anavalaveliha omusuwela waari weera muthiyana?
Mmusome 1 Akorinto 10:32, 33 ni Yohani 2:15, 16, avinyaka mutthekule ni ipontu sinttharelana:
-
Mwaha wa heeni onreeraaya wiikoha ha: ‘Neereke mawarelo aka pooti omuulihiha muru munna naari murokora a mmulokoni mwaka kapena muttetthe kinkhalaaka?’
-
Moota heeni atthu a muttetthe mukhala anyu anwaraaya?
-
Nyuwo munuupuwela weera mukristu onnitthuneya owara moota atthu anwaraaya muttetthe awe? Mwaha wa heeni?
Hiyo pooti othanla ikuwo sa moota-moota ni mawarelo mene-tho muthanleke ikuwo simmuhakalaliha Yehova
ATTHU AKINA ANEERA: “Khontthuneya opwattha etthu akina anuupuwelaaya, miyo kookhalano edireitu yoowara etthu kintthunaaka owara.”
-
Nyuwo munaakhulela eyo? Mwaha wa heeni?
NYAHA SOOTTHUNEYA
Moota ninpakaahu soothanla voohima sa mawarelo ahu onkela woonihera moota nnamuttittimihaahu Yehova ni atthu akina.
Wuuluula
-
Mwaha wa heeni mawarelo ahu anooniheraaya weera tootthuneya wa Yehova?
-
Soolepa heeni sineera sinikhavihere moota woothanla mawarelo ahu?
-
Moota heeni makhalelo ahu enkelaaya ovaha onamoona wooreera naari woonanara voohima sa Yehova?
WEERA MUSUWELE ITTHU SINTXIPALE
Moone moota soowara sanyu sinwooniheraaya atthu woohima sa nyuwo.
Moone mwaha heeni oraaya wootthuneya wuupuwela nihinaaye ompaka tatuwaaxe.
“Eheeni Biblya onihimaawe woohima sa ompaka tatuwaaxe?” (Mwaha va jw.org)
Moone miruku sikhanle sowookhaviherani osuwela ikuwo muntthuneyaanyu owara.
“Niireke Mawarelo Anyu Anninvuwiha Muluku?” (Owehaweha, a Setembro a 2016)
Moone moota muthiyana mmoha aaxuttenraawe mawarelo.
