Ku kelee kwa ŋwɛli ku kumaa ɣiri kpaa ku kuŋuŋ leɣa kpɛtɛ a bere sii nyii ŋwɛli kaa kuai. Kwa sia a Ŋala-kɔlɔi ŋɔtɔ̃ya-ŋuŋ-ŋai, kwa pɔri kumaa ɣirii a bere sii kwa ŋwɛlii, ku nii Ziova lii laa. Kwaa lono e pilaŋ dɔ̃ya-ŋuŋ-ŋai ŋi taŋa dia.

1. Tɔ̃ya-ŋuŋ-ŋa kɛɛ leŋ ɓe da kpɔŋ kua a gɛɛ ku mɛni-kpɛtɛɛ-ŋa kɛ a pa kumaa ɣiri pere ma?

Maa nɛ̃ɛi ku kumaa ɣiri ‘a ɓaa-kɛ-maa da tare pere,’ ku ŋɔnɔ kɔ a gɛɛ kumaa seɣe e kɛ a ŋwaa a tãi kelee nyii pai nɛi a gɛɛ kukaa a “Ɣala-ɓela.” (1 Temete 2:​9, 10) Kwaa naa mɛni maa-kɔri e pilaŋ dɔ̃ya-ŋuŋ naaŋ ŋi ma: (1) Maa nɛ̃ɛi ku kumaa ɣiri a “ɓaa-kɛ-maa pere.” Tãi ta, yaa gaa goyaŋ-ŋai su a gɛɛ Ziova ŋɔnuai da dimaa ɣiri a pere sii takpɛni-ŋa, kɛɛ, kumaa ɣiri pere da kuŋuŋ kpɛtɛ pere a ɓaa-kɛ-maa lɛ Kuɣalai mɛni ma a tãi kelee. (2) Nuu maa ɣiriɛ a “ɓaa-kɛ-maa pere” sukulai ɓa kufe kumaa ɣiri a bere sii nyii pai kili-ŋa-sia nyɔmɔɔ tooi nua kili-ŋa kpaa nyii pai nua ŋɛi kɛi kua. (3) Kwa tua a “tare” pere kwa wala kumaa ɣiri a maa-ɣiri sii nina kelee a pa ŋeniɛi sui. (4) Maa nɛ̃ɛi kumaa ɣiri pere e nɛ a tãi kelee a gɛɛ kukaa a “Ɣala-ɓela,” nyaŋ kwa dɔ̃ya Ɣalai fɛlii​—1 Kɔleŋtiɛŋ 10:​31.

2. Le ɓe kumaa ɣiri pere a pɔri gɛi a kuɓaraŋ korai-ɓela?

Berei maŋ kwa pɔri kumaa ɣirii la a bere sii kwa ŋwɛlii, maa nɛ̃ɛi ku kukili-ŋa sia e pilaŋ mɛnii ma kumaa ɣiri pere a gɛ a nuai. Kwa kɔ a gɛɛ kufe nuu ta lii too polu, kɛɛ maa nɛ̃ɛi “ku kukɔlɛ-ma-ɓelai lii laa a gɛɛ mɛni lɛlɛɛ e pa dipɔ dikponoi e kpanaŋ.”​—Lomaŋ 15:​1, 2 lono.

3. Kumaa ɣiri pere a pɔri nua lii kulai leŋ a gɛɛ di Ziova fɛli?

Berei maŋ kwa kɔ la a tãi kelee a gɛɛ ku kumaa ɣiri a nɛlɛɛi, tãi titi kwa kɔ la a gɛɛ ku kumaa ɣiri a nɛlɛɛi ɓa kwa kɛ lii kukoyaŋ-ŋai su kpaa kwa kɛ lii ŋala-woo-ɓo tii su. Kufe ŋwɛlii a gɛɛ kumaa ɣiri pere e nua ŋɛi kula duŋ lɛlɛɛi ma. Kɛlɛ, kwa ŋwɛlii kumaa ɣiri pere e gɛ nua di diwoli tɔɔ duŋ lɛlɛɛi ma, ku “Ɣala ŋɔsɛŋ-lɛɛi maa ɣiri mɛni sii kelee su.”​—Taitɔ 2:​10.

 MƐNI TAMAA MAA-KƆRI

4. Kumaa ɣiri pere a ɓaa-kɛ-maa lɛ Ziova mɛni ma

Le ɓa mɛni-ŋuŋ maa nɛ̃ɛi ku kumaa ɣiri la a nɛlɛɛ? Ŋule-wooi 47:2 lono, gɛ ni ka lono e pilaŋ mare-kɛɛ-ŋai ŋi dia:

• Le mɛni-kpɛtɛɛ-ŋa ɓe kwa pai gɛi kwa gɔlɔŋ a gɛɛ kumaa ɣiri pere a pɔri Ziova laa karai?

• I laai la maa nɛ̃ɛi ku kukili-ŋa sia e pilaŋ kumaa ɣiri pere ma kwa kɛ lii goyaŋ-ŋai su kpaa kwa kɛ lii ŋala-woo-ɓo tii su? Le mɛni ma?

 5. Berei kwa pɔri mɛni-kpɛtɛɛ lɛlɛɛ-ŋa kɛi la a pa kumaa ɣiri pere ma

VILOI su kaa.

A nɛ̃ɛ maŋ zeɣei kwa doo kuai sɔ̃ɔ fe kɛtɛ ni, maa nɛ̃ɛi e kɛ a ŋwaa, nɛlɛɛ ɓɛi kukaa naai mɛni ma. 1 Kɔleŋtiɛŋ 10:​24 da 1 Temete 2:​9, 10 lono. Naa polu ma, ka lono e pilaŋ mɛnii ma gɛ kufe pai ŋwɛlii ku seɣe-ŋa kɛɛ ŋi too kua . . .

• seɣe nyii maa liɓiɛ kpaa ve lɛlɛ ni.

• seɣe nyii a kukpono soŋ a ŋanaai, kukpono lɛ seɣe kpaa seɣe nyii a kili-ŋa-sia nyɔmɔɔ too nua kili-ŋai.

Berei maŋ Korai-ɓela dife la dɔŋ Ziova e dɛɛ Mosɛ pɔ mui, kɛɛ da Ziova ŋɔkili-ŋa-siai kɔlɔŋ dɔŋ-ŋai ŋi sarai. Dutɛrɔnome 22:5 lono, gɛ ni ka lono e pilaŋ mare-kɛɛ ŋi ma:

• Le mɛni ɓe maa fe nɛ̃ɛ ni la ku kumaa ɣiri a pere sii nyii pai gɛi a gbanaŋɔɔ a gɛɛ nua di gɔlɔŋ a kɛ kukaa a nɛni kpaa kpakolo?

1 Kɔleŋtiɛŋ 10:​32, 33 da 1 Zɔŋ 2:​15, 16 lono, gɛ ni ka lono e pilaŋ mare-kɛɛ-ŋai ŋi dia:

• Le mɛni ɓe maa nɛ̃ɛi kukɛ a ku kpaaŋɔɔ la a kɛ kumaa ɣiri pere a pai kukolii su-ɓela kpaa korai-toli-kpɔŋ su-ɓela taŋa lii tooi polu?

• Maa-ɣiri da ŋuŋ-leɣa kpɛtɛ pere sii kɛɛ leŋ ɓe ŋwɛli kaa nua tamaa dia ɓɛi ikaa naai?

• I laai la maa-ɣiri sii-ŋai ti kelee lɛlɛɛi Korai-ɓela mɛni ma? Le mɛni ma?

 MƐNI-ŊUŊ-ŊAI YAA MAA-KƆRII

Kwa mɛni-kpɛtɛɛ lɛlɛɛ-ŋa kɛ e pilaŋ kumaa ɣiri pere da ku kɛ pere ma, kwa ɓaa-kɛ-maa lɛ Ziova mɛni ma da nua takpɛni-ŋa.

Gili-too-ŋa mare-kɛɛ-ŋai

• Le mɛni ɓe Ziova a kumaa ɣiri pere kaa la a mɛni-kpanaŋ?

• Tɔ̃ya-ŋuŋ-ŋa kɛɛ leŋ ɓe a kpɔŋ kua, kwa kɛ mɛni-kpɛtɛɛ-ŋa kɛi e pilaŋ kumaa ɣiri pere ma?

• Le ɓe kumaa ɣiri pere a gɛ a nua dikili-ŋa-siai e pilaŋ dɔ̃ya Ɣala fɛliɛ ma?