Kadika mutu widi na phil’andi keta tila vuatila ayi keta tila bongisila zitsuki. Betu landakana zitsikudukusu zi Bibila, bumutu bueto mabumonika kuidi batu mu phila yinyangidika Yehova. Tutadila ndambu zitsikudukusu beni.

1. Zitsikudukusu mbi zilenda kutusadisa mu diambu di tuzaba sobula phila yi vuatila?

Tufueti sobula “phuatulu yimboti mu kukikulula ayi mu lukinzu,” ayi simbidila bumutu bumboti bo bulembo monisa ti ‘tuidi bakuikama kuidi Nzambi.’ (1 Timote 2:9, 10) Tutadila zitsikudukusu zio zidi mu ziverse beni: 1) Phuatulu’eto yifueti ba “yimboti.” Banga phila tueta bumuena, mu dikanda di Yehova muidi ayi mintindu mi phila mu phila mi phuatulu, vayi minledi mieto ayi phil’eto yi bongisila zitsuki bieta zitisa Nzambi nio tueta sambila. 2) “Kukikulula” kueta tusadisa tuvuata mu phila yo yimmanga lueka voti benda thalu yi batu kuidi betu. 3) Vuata “mu lukinzu” kueta tusadisa tubika ba mimvika mi zimoda ayi tomba vuata kima kioso kio kibimini. 4) Bumutu bueto bo bueti monika, bufueti monisa ti ‘tuidi bakuikama kuidi Nzambi,’ yawu yikuiza monisa ti tueta sambila Nzambi yikiedika.—1 Kolinto 10:31.

2. Bumutu bueto bo bueta monika mambu mbi bueta tula kuidi bakhomba zieto ba babakala ayi ba baketo?

Tuidi na kiphuanza kisobula minledi mio tumvuata vayi tufueti yindula phila yo tukuiza monikina mbi yikuiza tudi kuidi batu bankaka. Tueta tula ngolo mu kondo tesa mutu sakuba ‘ayi tueta vanga mambu mo manyangidika badieto mu diambu di mamboti mawu muingi tubakindisa.’—Tanga Loma 15:1, 2.

3. Phila mbi bumutu bueto bo bueta monika bulenda tumina batu bankaka baba phuila yi landakana tsambudulu’eto?

Tueta tula ngolo tuvuata mboti vayi tueta luta butudila mu thangu tulembo kutakana mu zikhutukunu zieto voti mu thangu tulembo samuna. Minledi mieto mibika luta benda thalu kuidi betu veka viokila nsamu wo tulembo nati kuidi batu. Tutidi ti phuatulu’eto yibenda batu mu kiedika ayi ‘phuatulo’eto phe yiluta tula kitoko mu malongi ma Nzambi.’—Tito 2:10.

 TUVISA MBOTI MBOTI

4. Enati bumutu bueto bo bueta monika buidi bumboti mabu zitisa Yehova

Mbi bieta luta tula ti tutadilanga bumboti mboti bumutu bueto bo bueta monika? Tanga Minkunga 47:2 ayi vana mimvutu mu biuvu biabi:

• Bo tueta monikisa Yehova, diambu mbi dilenda tula mu phil’eto yi vuatila?

• Mu ngeyo, bufueni kuandi tuyindula phila yo bumutu bueto bo bueta monika bukuiza monikina mu thangu tuidi mu zikhutunu voti mu thangu tulembo samuna? Bila mbi tubidi buawu?

 5. Zitsikudukusu zio zilenda tusadisa tuzaba sobula minledi mio tumvuata

Tala VIDEO.

Buba ti minledi mieto thalu mbi midi, dilutidi mfunu miba mimboti ayi mifuanakana mu kisalu kio tueta sala. Tanga 1 Kolinto 10:24 ayi 1 Timote 2:9, 10. Ayi tutubila bi bila bio bikututuma tumanga minledi . . .

• mikambu fuana voti mimvindu.

• minkanga nitu, mimmonisa binama binitu voti mio midi sexy.

Minsiku mi Mose misi tadila ko bakristu vayi mieta tumonisa mbueno yi Yehova. Tanga 5 Mose 22:5 ayi vana mvutu mu kiuvu kiaki:

• Bila mbi tufueti mangina minledi mioso voti mbongosolo yoso yi zitsuki yo yintula ti babakala ayi baketo badedakana?

Tanga 1 Kolinto 10:32, 33 ayi 1 Yowani 2:15, 16 ayi vana mimvutu mu biuvu biabi:

• Bila mbi tufueti tudila ngolo bumutu bueto bo bueta monika bubika tesa sakuba kuidi batu bo beta vuanda yeto va kimosi voti kuidi bakhomba zieto ba kimvuka?

• Mvuatu wuphila mbi weta luta monika ko wukala?

• Mu ngeyo ziphila beni zina zivuatila zifueni kuandi kuidi mukristu? Bila mbi?

 MU BUKHUFI

Thangu tuntula ngolo mu ba na bumutu bo bueta monika bumboti, tueta zitisa Yehova ayi tueta monisa ti tueta vana batu bankaka luzitu.

Phutukulu

• Bila mbi minledi mio tueta vuata ayi phila yo tueta monikina, kuididi mfunu va ntuala Yehova?

• Tanga ndambu zitsikudukusu zio zilenda kutusadisa mu diambu di tubaka zinzengolo zimboti mu diambu ditedi phila yo tummonikina kuidi batu bankaka.

• Diambu mbi bumutu bueto bo bueta monika dilenda tula mu phila yoyi batu bankaka beta tadila tsambudulu’eto?