LISON 53

Chwazi Anmizman Ki Ka Plè Jéhova

JWÉ

Jéhova ‘ni tjè kontan.ʼ (1 Timòfi 1:11 NWT ) Konsa, i vlé nou ni tjè kontan osi, èk i vlé nou enjwi lavi. Jéhova ka kontan lè nou pwan an ti tan pou pozé, èk pou anmizé kò nou. An lison sala nou kay diskité déotwa bagay nou sa tjenn an lidé lè nou ka anmizé kò nou. Èk osi mannyè nou sa chwazi anmizman ki ka plè Jéhova.

1. Kisa nou ni pou chonjé lè nou ka chwazi anmizman?

Kisa ou enmen fè pou anmizé kòʼw? La ni moun ki simyé wèsté lakay yo, yo pé li an liv, kouté mizik, gadé an pòtwé, ében alé asou intannèt-la. Osi la ni lòt moun ki simyé pasé tan épi jan yo, èk yo ka fè bagay tèl kon jwé spò ében alé bò lanmè-a. Mé chonjé népòt sa nou chwazi pou fè pou anmizé kò nou, nou ni pou fè asiwé sa “ka plè Bondyé.” (Èfésòs 5:10) I enpòtan pou chonjé sa, paski jòdi, an chay bagay moun ka gadé, kouté, ében ka fè pou anmizé kò yo sé bagay Jéhova hayi. Bagay tèl kon, vyolans, imowalité, èk bagay ki ni pou fè épi tjenbwa ében vyé lèspwi. (Li Sam 11:5.) Mé kisa ki kay édé nou fè bon chwa lèʼy vini pou anmizman?

Ében, si nou chwazi moun ki enmen Jéhova pou jan nou, yo kay édé nou fè bon chwa lèʼy vini pou anmizman. Silon sa nou ja apwann, ‘moun-lan ki ka maché épi moun ki ni lasajès kay ni lasajèsʼ. Mé si nou ka toujou pasé tan épi moun ki pa vlé aksèpté wèg Jéhova, nou ‘kay ni an chay pwoblenm.ʼ—Pwovèb 13:20.

2. Pouki i enpòtan pou kontwolé kantité tan-an nou ka pasé an anmizman?

Menm si nou chwazi anmizman ki ka plè Jéhova, nou bizwen pwan pokosyon pou nou pa pasé twòp tan an anmizman. Si nou pa fè sa, pitèt nou pa kay ni asé tan pou fè sé bagay-la ki pli enpòtan. Anfen, Bib-la ka ankouwajé nou pou sèvi tan nou byen. I di nou “tout chans [nou] jwenn fè sa ki bon.”—Li Èfésòs 5:15, 16.

ANNOU APWANN PLI

Apwézan, annou apwann mannyè ou sa fè bon disizyon lèʼy vini pou anmizman.

3. Pa chwazi anmizman ki pa ka plè Bondyé

Pouki nou ni pou pwan pokosyon lè nou ka chwazi anmizman? Annou gadé VIDIYO-A, Ki Kalité Anmizman Mwen Vlé Chwazi? èk apwé nou kay kozé asou sé kwèsyon sala:

VIDIYO: Ki Kalité Anmizman Mwen Vlé Chwazi? (4:39)

Ki mannyè sa moun té ka fè pou anmizé kò yo an Ronm, menm kon adan sé bagay-la moun ka fè pou anmizé kò yo jòdi jou?
An vidiyo-a, kisa Danny té apwann konsèné anmizman?

Annou li Ronm 12:9, èk apwé nou kay kozé asou kwèsyon sala:

Ki mannyè vèwsé sala sa édéʼw chwazi bon anmizman?

Kisa Jéhova hayi? Annou li Pwovèb 6:16, 17 èk Galécha 5:19-21. Apwé nou li chak lévanjil, nou kay kozé asou kwèsyon sala:

Silon sa nou li an sé vèwsé sala, kilès an sé bagay sala ou ka wè asou télévizyon, ou ka tann asou radyo, ében ou ka wè moun ka fè?

Mi Yonndé Kwèsyon Ki Sa Édéʼw Chwazi Bon Anmizman

Mandé kòʼw:

Ès anmizman-an ni bagay Jéhova hayi?
Ès i kay pwan tan-an mwen bizwen pou fè lòt bagay ki pli enpòtan?
Ès i kay fè mwen pasé tan épi moun ki pa enmen Jéhova?

I enpòtan pou nou wèsté lwen danjé. Konsa i enpòtan pou nou widjèkté népòt anmizman ki pa kay plè Bondyé

4. Sèvi tanʼw byen

Annou gadé VIDIYO-A, Kisa Ki Ka Pwan Tout Tanʼw? èk apwé nou kay kozé asou kwèsyon sala:

VIDIYO: Kisa Ki Ka Pwan Tout Tanʼw? (2:45)

Magwé fwè-a an vidiyo-a pa té ka gadé anyen ki mové, kisa ki té pwan tout tanʼy?

Annou li Filipay 1:10, èk apwé nou kay kozé asou kwèsyon sala:

Ki mannyè vèwsé sala sa édé nou désidé ki kantité tan pou pasé an anmizman?

5. Chwazi bon anmizman

Sa vwé la ni an chay bagay moun ka fè pou anmizé kò yo ki pa ka plè Jéhova, mé la ni plizyè bagay nou sa fè ki kay fè tjè Jéhova kontan. Annou li Ékléziyastis 8:15 èk Filipay 4:8, èk apwé nou kay kozé asou kwèsyon sala: