53 YATICHÄWI
Kunanakampis kusistʼtan ukajj Jehová Diosatakjamäñapawa
Jehová Diosajj ‘kusisiri Diosawa’ (1 Timoteo 1:11). Jupajj kusisit jakasiñaswa muni. Trabajotsa yaqha lurañanakatsa samartʼañatak tiempo apstʼassna ukwa munaraki. Aka yatichäwinjja, kunanakampis wali sum kusistʼsna, kunjamsa Jehová Diosajj munki ukarjam kusistʼaraksna uka toqetwa yatjjataskañäni.
1. Kunanakampis kusistʼañäni uk ajllkasajj ¿kuna toqenakatsa amuytʼañasa?
¿Samartʼañatakejj kun lurañas jumar gusttamjja? Yaqheparojj utan quedasis mä libro liyiña, music istʼaña, película uñchʼukiña jan ukajj Internetar mantañaw gusti. Yaqheparusti amigonakapampi pasiytʼir saraña, nadir saraña jan ukajj anatañaw gustaraki. Kunanakamp kusistʼañay gustchistu, ukampis ajllktan uka kusistʼañanakajj “Tatitutak walïskiti janicha” ukwa amuytʼañasa (Efesios 5:10). Uk sum amuytʼañajj wali importantewa. ¿Kunatsa? Kunanakampitï jaqenakajj jilapartejj kusistʼapki ukanakanjja: nuwasiñanaka, qʼañu jucha lurañanaka, layqasiñanakaw utji. Taqe ukanakjja Jehová Diosajj uñisiwa (Salmo 11:5 liytʼäta). ¿Kunas suma amtanakar puriñatak yanaptʼistaspa?
Amigonakasatï Jehová Diosar munasipjjani ukhajja, sum sarnaqañatakiw yanaptʼapjjestani, suma kusistʼañanak ajlliñatakis yanaptʼapjjarakistaniwa. Kunjamtï aka libron 48 yatichäwipan yateqawayktanjja, “khititï yatiñan jaqenakamp sarnaqki ukajja yatiñan jaqeruw tukuni”. Maysa toqetjja, Diosan leyinakapar jan respetiri jaqenakampi chikachasirejja, “jan waliruw purtʼasini” (Proverbios 13:20).
2. ¿Kunatsa qhawqha tiempos kusistʼañäni uk amtañajj importantejja?
Kunanakampis kusistʼtan ukajj walikïskchisa, qhawqha tiempos kusistʼtan uk amuyasiñasawa. Jiwasatï kusistʼañaruk chuym uchsna ukhajja, janiw kunatï jukʼamp importantëki ukatakejj tiempojj utj-jjestaspati. Bibliajja ‘tiempo jan ina chʼusar aptʼasiñatakiw’ chʼamañchtʼistu (Efesios 5:15, 16 liytʼäta).
JUKʼAMP YATJJATAÑÄNI
Kusistʼañanak sum ajlliñatakejj kunsa jumajj lurasma ukwa jichhajj yatjjatañäni.
3. Jan wali kusistʼañanakat jitheqtam
¿Kunatsa kusistʼañanak sum ajlliñasa? VIDEO uñtasajja aka toqetwa parltʼapjjäta:
-
¿Kunjamsa yaqhep kusistʼañanakajj Roma markan nuwasipjjerïkäna ukar uñtasitäspa?
-
¿Kunsa Danny waynitojj anatañanakat yateqäna?
Romanos 12:9 liytʼasajja aka toqetwa parltʼapjjäta:
-
¿Kunjamsa uka textojj kusistʼañanak ajlliñatak yanaptʼistu?
¿Kunanaksa Jehová Diosajj uñisi? Proverbios 6:16, 17 ukat Gálatas 5:19-21 liytʼapjjäta. Ukatjja sapa texto liytʼasajj aka toqetwa parltʼapjjäta:
-
Uka textorjamajja, ¿kunanakampitï jaqenakajj kusistʼapki ukanakan kuna jan walinakas jilapartejj utji?
¿Kunas kusistʼañanak sum ajlliñatakejj yanaptʼistaspa?
Akham jisktʼasim:
-
¿Uka kusistʼañajj kunanaktï Jehová Diosajj uñiski ukanakaniti?
-
¿Kunatï importantëki ukanakatti tiempo apaqetu?
-
¿Jehová Diosar jan munasipki uka jaqenakampit chikachasëjja?
Jan walir jan purtʼasiñatakejja, uka jan walit jayaruw jitheqtañasa. Ukhamasti mä kusistʼäwitï jan walir purtʼasiyirjamäni ukhajja, jayaruw jitheqtañasa.
4. Jan ina chʼusar tiempo aptʼasimti
VIDEO uñtasajja aka toqetwa parltʼapjjäta:
-
Videon uñtktan uka jilatajj janis kuna jan walsa lurkchïnjja, ¿kunjamsa ina chʼusar tiempo aptʼasitapajj jan waltʼayaskäna?
Filipenses 1:10 liytʼasajja aka toqetwa parltʼapjjäta:
-
Kuna lurañatï wal gustkistu ukatakejj qhawqha tiempsa apstʼasiñäni uk amtañatakejja, ¿kunjamsa uka textojj yanaptʼistu?
5. Kunatï walïki ukanakamp kusistʼam
Jehová Diosarojj yaqhep kusistʼañanakajj janiw gustkiti, ukampis yaqhepajj jupatak walikïskarakiwa, jiwasajj ukanakampiw kusistʼsna. Eclesiastés 8:15 ukat Filipenses 4:8 liytʼasajja aka toqetwa parltʼapjjäta:
-
¿Kuna suma kusistʼañanakampis jumajj kusistʼirïta?
Jiwasanakajj suma kusistʼañanakampiw kusistʼsna.
YAQHEPANAKAJJ AKHAM SAPJJEWA: “Nuwasiñanakani, qʼañu jucha lurañanakani, layqasiñanakani jan ukajj yaqha ukhamanakani kusistʼañanakampejj maynejj kusistʼaskaspawa. Antisas ukanak lurañakiw jan walïkiti” sasa.
-
¿Jumajj uka toqet kamsasmasa?
¿KUNSA YATEQAWAYTAN?
Jehová Diosajj suma kusistʼañanak ajlliñaswa muni, ukanakamp kusistʼañaswa munaraki.
Amtañataki
-
¿Cristianonakatakejj kawkïr kusistʼañanakas jan walïki?
-
¿Kunatsa qhawqha tiempos kusistʼañäni uka toqet amuytʼasiñasa?
-
Jehová Diosatakejj walikïski uka kusistʼañanakjja, ¿kunatsa jumajj ajlliñ munta?
JUKʼAMP YATJJATAÑAMATAKI
Kunanakampis kusistʼañäni uk khitis amtañapa uk yatjjatam.
Kunjamsa jumajj suma kusistʼañanak ajllisma uka toqet yatjjatam.
“Askïki ukampi kusisipjjañäni” (Yatiyañataki octubre 15, 2011)
Mä chachajj kunatsa yaqhep kusistʼañanak jaytañ amtäna uk yatiñatakejja, “Yaqhanakar uñisiñjja jaytawayjjtwa” sat cheqanwa liytʼasma.
“Bibliat yatjjatasaw nayra jakäwinakapjja jaytawayapjje” (Yatiyañataki julio-septiembre, 2010)
Layqasiñanakani jan ukajj yaqha ukhamanakani kusistʼañanak jaytañjja, kunatsa mä warmejj amtäna uk videon uñtam.
Layqasiñanakani jan ukajj yaqha ukhamanakani kusistʼañanakat jitheqtam (2:02)
Akanakajj inas gustarakiristam
KUNANAKSA JUKʼAMP JISKTʼASIPJJE
¿Kunjamsa Jehová Diosan Testigonakapajj Bibliat yatichapjje?
Jehová Diosan Testigonakapajj gratisakiw Bibliat yatichapjje, kawknïr Bibliampis yateqañ munta ukajj jumatäjjewa. Jumamp chika yateqapjjañapatakejja, taqpach familiamaruw invittʼasma, amistadanakamarus invittʼarakismawa.
