JIʼTE 53
Potse ne de tam mye a boung bi Jéova a
Jéova be “Si ŋwègne.” (1 Timotio 1:11, nwt.) É tcheng ge pe ŋwègne neng dzu pé ne vôk. É ŋwègne tchwe ye pe djap tam ne ne hwite, ba ne ne tchye mtam pepoung a. Tchum jiʼte yenge, pe gô yô tchi paʼ pe gô wim tam bô ne taʼ tchi pepoung, ye a gô ghe ge pe ŋwègne—neng poung ba bi Jéova a.
1. Pe gô sè nwe ne ke tchwe ye pe bo tchi potse tsye pe gô ne le tam a ?
O khoung ne ghe la ne ne de tam ? She pô khoung ne tchwe we pou gejye—khé taʼ ŋwaʼgne, djouʼ mjwôpshye, djô taʼ filme, ke gô dé potse ne èntèrnèt le. She pô neng be khoung ne ghe potse tsye a gô ghe ge wap ŋakgne ne yap a, pou a mso pap—paʼ ne tam balôn ke tham gèm a le. Ke pe khoung ne ghe baya ne le, a tcheng ge pe tchente dé ge ywe ye pe tchi ne ne de tam a “poung bi Tchyepô.” (Éféso 5:10) A be mtuôdeng ge pe youʼ ya bô nekele, medou potse tsye pô tchi ne ne de tam a daʼte potse tsye Jéova bô a; paʼ pou guʼ, nwe ghap ba nwe kè a. (Ké Mghôm ghamte 11:5.) Ke gô kwite wôkpe ne tchente tchi potse tsye pe ne de tam a ?
Mso pôkpe pe khoung Jéova, be wap gô kwite wôkpe neng tsegne wôkpe ne tchi potse ne de tam mye a poung a. Paʼ pe ke lagne tchum jiʼte 48 a, “mo ye é ging pou a pô jyenwe a gô ghe jyenwe.” Ne yemouʼ gheng, pe pe tchye medou mtam pou a pô pye wap te khoung mkhète Si a pe, be “pe gô ko ne mnwe.”—Mghôm jyenwe 13:20.
2. Nweke a be mtuôdeng ne tinte deng tam ye pe tchye ne ne de tam a ?
Ba m be ye potse tsye pe ne de tam a poung a, a tcheng ge pe pôm ne tchye tam tèʼ ne gre ya. Te poʼ a, be pe ka fing ne ping gre medou tam ne gre potse tsye a be mtuôdeng a. Bible ha kaktuô pi pe ne tchyete pe “bôpte [môkpe] mtchwe dzu.”—Ké Éféso 5:15, 16.
PING TCHENG NE GÔ DZE
Lagne tchi paʼ o fing ne le mkhète pepoung ne potse tsye o ne de tam a.
3. Waʼ potse ne de tam mye a pôk a
Nweke a tcheng ge pe tchente tchi potse tsye pe ne de tam a ? Yô VIDÉO, neng gômte ne mhente menge.
-
Mkhwa mye pe gladiateur le thou a, pou a she potse ne de tam tyôʼô hwegne ne ke ?
-
Tchum vidéo Danny le lagne ke ne potse ne de tam ?
Ké Roma 12:9, neng gômte ne hente yenge :
-
Khè Bible yeng fing ne kwite o ne tchi ywe ne fye ye a poung a m tchi ge ke ?
She potse tsye Jéova bô a be ma ? Ké Mghôm jyenwe 6:16, 17 ba Galata 5:19-21. Tchwe ye o ming ne ké baya pap a le, ghômte ne hente yenge :
-
Ne potse tsye pou gôm nwe ne tchum mkhè menge a, pou doʼgne djô ma ne tchum potse ne de tam tyôʼô ?
Mhente mye a fing ne kwite o ne le jyenwe tchi taʼ ywe ne de tam a
Hente ne o ge :
-
Ke ? Potse tsye Jéova bô a be tchum o a ?
-
Tchweke ? A bo de tam ye ge gô ne ghe potse tsye a be mtuôdeng téʼ a ?
-
We ? A gô ghe mye tchye medou mtam pou a pô pye wap te khoung Jéova a pe a ?
Ne ne bôm ge ywe tchwepoung ke ŋwak ne pe, a tcheng ge pe tchwe te grô sesuô paʼ pe fing a ne ywe tchwepoung. Ya bô né gre te a pe tcheng ge, pe pe tchwe te grô sesuô ne potse ne de tam mye pe bo djô ge a fing ne pe be a pôk a
4. Wim tam o pepoung
Yô VIDÉO, neng gômte ne hente yenge.
-
Tchum vidéo, fe late bo djô taʼ ywe ye a pôk a pe, daʼge ye nwe le be ke ?
Ké Filipo 1:10, neng gômte ne hente yenge :
-
Khè Bible yenge fing ne kwite wôkpe ne tchi deng tam ye pe gô ne fye, ke ne le tam a le, m tchi ge ke ?
5. Le potse ne de tam mye a poung a
Ba m be ye she potse ne de tam te boung bi Jéova a pe, medou é be si be a tchente boung téʼ. Ké Ékléziaste 8:15 ba Filipo 4:8, neng gômte ne hente yenge :
-
O khoung ma potse ne de tam mye a poung a ?
O fing ne tsu pé ne potse ne de tam ba mye ne fye mye a poung a
SHE PÔ GÔM GE : “A be a ka pôk ne le tam pou a potse tsye pou guʼ, nwe ghap, ba nwe kè be tchum o a pe. Ye ywe mtuôdeng be ne tchyete ghe ma bô.”
-
O gô paʼ ge ke ?
YE NE KHAMTE
Jéova tcheng ge pe tchi potse ne de tam mye a poung, neng be gô ghe ge pe youʼ pepoung a.
O lagne ke ?
-
Mkritè gô waʼ ma mtchi potse ne de tam ?
-
Nweke a tcheng ge pe pôm, ne deng tam ye pe tchye ne ne fye ke ne ne de tam a le ?
-
O bo tcheng ne tchi potse ne de tam mye a boung bi Jéova a ? Nweke ?
YÔ SHE POTSE NE
We né gô tchi ywe ye o gô ne le tam a ?
Yô tchi paʼ o fing ne tchente de mkhète pepoung ne ywe ye o gô ne le tam ke ne fye a le.
“Comment se détendre sainement ?” (La Tour de Garde, 15 octobre 2011)
Tchum tôné “Jʼai même surmonté mes préjugés,” yô nweke taʼ mbè le kwyepgne potse tsye é le ne de tam a.
“La Bible transforme des vies” (La Tour de Garde, 1er février 2010)
Yô tchi paʼ taʼ mema bo de jyenwe de taʼ khète ne filme ye é bo djô, a po daʼte nwe kè a.
Rejetez les divertissements qui contiennent du spiritisme (2:02)
