FARKARKOR 53
Komam Kaku Insama Hiburan Koḇena Nafrur fa Yahwe Imarisen
Marasrisen koḇaḇir ro kosnesna nama roi Manseren Allah byuk nairi. (Pengkhotbah 3:12, 13) Yahwe imarisen insama kosmai marasrisen ro kenem koḇena. Imarisen fa komnai ro fararur koḇena ma kobuk swaf fa komnaisu. Ro farkarkor ine, nari kawos moḇsa kobuk swaf anya fa kofrur roi ḇeyun marisen ḇe ko ma ḇeyun marisen ḇe Yahwe I kako.
1. Rosai koswarepen kaku rofyor kokinfir hiburan na?
Rosai na wafrur ro swaf wamnaisu ya? Sia simarisen skain ro rum bo sfarfyare, srower musik, smam felem, ḇaido sifnak Internet na. Sia wer simarisen syadi sekayamyam kuker bati sesya fa simbran farma, sra simasasi, ḇaido sifnak bola. Rosai monda komarisen fa kofrur na, komam kaku insama hiburan koḇena nafrur fa Manseren Allah imarisen. (Efesus 5:10) Rosai ḇefnai fa komam kaku roi anine? Kukro hiburan ḇebor na naser roi Yahwe imewer na raris mamamun, fararur farḇuk, ḇaido nya fasfes kuker rur ḇeḇarḇor sya. (Kowasya Mazmur 11:5.) Inja rosai na ḇefnoḇek ko fa kokinfir pyum hiburan na?
Koḇebati kuker snonggaku ḇeswar Yahwe I kada, na sifnoḇek ko fa kokinfir hiburan ḇepyum na. Raris kofarkor kwar ro farkarkor 48 aniyafa, kofawi ”snonggaku ḇembran kuker snonggaku ḇefawinanem nari fyawinanem”. Imbape koḇebati kuker snonggaku ḇeso Yahwe marisen Ḇyena ḇa, nari kosmai ”roi ḇemun”.—Amsal 13:20.
2. Rosai ḇefnai fa komam pyum oras kobuk faro hiburan na?
Imbude hiburan kokinfir na napyum, rarirya mboi fandun fa kosasor ko insama oras koḇena nabro awer faro hiburan anna. Komam pyum ḇa ido, nari kona oras nabor kuf ḇa faro roi ḇefandun syadi na. Refo danunepen ko fa komam pyum oras koḇena.—Kowasya Efesus 5:15, 16.
SWEWAR KAKU WER
Nari kawos nyan fa kwinfir pyum hiburan na.
3. Pampum hiburan ḇeḇye ḇa na
Rosai ḇefnai fa kokinfir pyum hiburan na? Komam VIDIO, raimnai kawos fakfuken suine:
-
Moḇsa hiburan ḇero baboine namnis ra farfnak gladiator ḇero Romawi ḇepon naiwara?
-
Ro vidio insanja, rosai Danny fyarkor ḇekur hiburan na?
Kowasya Roma 12:9, raimnai kawos fakfuken ine:
-
Rariso wos ḇero mnuk ine ifnoḇek Au fa kwinfir pyum hiburan na?
Rosai monda Yahwe imewer na? Kowasya Amsal 6:16, 17 ma Galatia 5:19-21, raimnai kawos fakfuken ine:
-
Raris mnuk-mnuk nane, rosai komam ro hiburan ḇebor ḇero baboine na?
Nyan fa kwinfir pyum hiburan na
Kwara roi nane:
-
Rosairi? Hiburan anna naser roi Yahwe imewer na ke?
-
Fafisu risai? Hiburan anna nafnai ra yana swaf wer ḇa faro roi ḇefandun syadi na ke?
-
Mansei? Hiburan anna nafrur fa yaḇebati fanam kuker snonggaku ḇeswar Yahwe I ḇa ke?
Kun oto ido, na kosewar fa koḇinggwanbur roi na ḇemun ko ḇae. Rarirya kako, na kosewar fa kobinggwanbur hiburan na ḇeyun roi ḇeḇye ḇa ḇe ko
4. Fasos pyum oras Bena
Komam VIDIO, raimnai kawos fakfuken ine:
-
Mambesrar ḇero vidio insandi myam roi ḇeḇye ḇa naisya ḇa, ḇape samswen rosai ismai ya?
Kowasya Filipi 1:10, raimnai kawos fakfuken ine:
-
Rariso mnuk ine ifnoḇek ko fa kap ḇepon oras kobuk faro hiburan na?
5. Kwinfir hiburan ḇepyum na
Hiburan ono Yahwe imarisen na ḇa, ḇape hiburan ḇepyum na naisya kaker. Kowasya Pengkhotbah 8:15 ma Filipi 4:8, raimnai kawos fakfuken ine:
-
Hiburan ḇepyum ḇerariso wamarisen ya?
Hiburan ḇepyum na naisya nabor fa kokinfir na
SIA SOḆE: ”Felem ḇefasnai mamun, fararur farḇuk, ḇaido manwen na, kofrur kaku na mande, imboi komam monda na sasar oḇa.”
-
Rosai nari wakofen ya?
FARKARKOR ḆYENA
Yahwe imarisen insama kokinfir hiburan ḇepyum ma ḇefrur marisen.
Waswarepen Kaḇer
-
Hiburan ḇerariso fandun fa kopampum na?
-
Rosai ḇefnai fa komam pyum insama kobuk oras koḇena fa nabro awer faro hiburan na?
-
Rosai ḇefnai fa wamarisen kwinfir pyum hiburan ḇefrur fa Yahwe imarisen?
SWEWAR NABOR WER
Mansei nari ḇekinfir pyan hiburan faro ko?
”Saksi-Saksi Yahwe Soḇe Komam Awer Felem, Syap, ḇaido Korower Dow Ono Ke?” (Fasfas ro situs jw.org)
Wawasya roi ḇefrur fa snon oso fyadwer hiburan kyinfir na, ro fawar ”Yayin Snonggaku Ḇese Wer Ḇa”.
Mam roi sna oso ifrur ya rofyor myam felem ḇefasnai roi ḇena fasfes kuker rur ḇeḇarḇor sya.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
