IRUẸMWI 53

Gha Ya E Jehova Sọyẹnmwẹ Vbe Odẹ Ne U Ya Rọkhọ Egbe

KPẸRE

E Jehova keghi re “Osa nọ sọyẹnmwẹ.” (1 Timoti 1:11, NW) Ọ hoo ne ima gha ghọghọ, ne ima vbe gha sọyẹnmwẹ arrọọ. Ọ keghi sẹ ọre ọyẹnmwẹ, vbe ima gha zẹ ẹghẹ kọ ya rọkhọ egbe. Vbe iruẹmwi na, ma gha ziro yan vbene ima khian ya gha sọyẹnmwẹ ẹghẹ ihẹwẹ ọghe ima hẹ, vbe odẹ nọ gha ya ẹko rhiẹnrhiẹn e Jehova.

1. Vbọ khẹke ne ima kọ ye orhiọn vbe ima gha khian rọkhọ egbe?

De odẹ ne uwẹ ya rọkhọ egbe? Emwa eso keghi rọkhọ egbe vbe owa iran, iran sẹtin gha tie ebe, iran sẹtin gha danmwehọ ihuan, iran sẹtin gha ghee ikueta, iran sẹtin vbe gha loo intanẹt. Eso vbe deba avbe ọse iran ku iku isasegbe, iran sẹtin ya owẹ khian gha rrie ehe nọ rree, ya gha ghee evbayi ughughan, iran sẹtin ya khuẹ vbe ẹzẹ, iran sẹtin vbe gbe gem. Ọ khẹke ne odẹ ke odẹ ne ima ya sọyẹnmwẹ egbe gha re “nọ yẹẹ Nọyaẹnmwa.” (Ẹfisọs 5:10) Ọna wa kakabọ ru ekpataki, rhunmwuda, odẹ ne emwa nibun ghi ya sọyẹnmwẹ egbe keghi sọnnọ e Jehova, nibun vbọ keghi re ọghe igbinna oguo, alama oghẹ kevbe orhiọn dan na gu mu obọ. (Tie Psalm 11:5.) Vbọ khian ru iyobọ ne ima ya gha ru azẹ nọ maan vbe odẹ ne ima ya rọkhọ egbe?

Ma ghaa gu emwa ni hoẹmwẹ e Jehova ru ọse, iran gha sẹtin ru iyobọ ne ima ya gha sọyẹnmwẹ egbe vbe odẹ nọ yẹẹ e Jehova. Zẹvbe ne ima ka ruẹ ọre vbe ebe na, ọmwa nọ ‘gu umẹwaẹn mu obọ, gha vbe do khian umẹwaẹn.’ Sokpan ma ghaa gu emwa nẹi lele ilele ọghe Jehova mu obọ vbe ẹghẹ hia, ‘ọni ọre ọghe ima fo.’—Itan 13:20.

2. Vbọzẹ nọ na khẹke ne ima gha begbe vbe nọ dekaẹn ẹghẹ ne ima loo ya sọyẹnmwẹ egbe?

Odẹ ne ima ya rọkhọ egbe sẹtin gha yẹẹ e Jehova, sokpan ọ khẹke ne ima gha begbe, ne ima ghẹ gha loo ẹghẹ nọ kpọlọ gbe yọ. Deghẹ ima ma begbe, ma i ghi miẹn ẹghẹ nọ sẹ omwa ya gha ru emwi ni gele ru ekpataki. E Baibol rhie igiọdu ne ima, ne ima gha “loo [ẹghẹ ima] ẹsẹse.”—Tie Ẹfisọs 5:15, 16.

GUALỌ OTỌ RE SAYỌ

Gia ziro yan vbene u gha ya sẹtin gha ru azẹ nọ maan hẹ, vbe odẹ ne u ya rọkhọ egbe.

3. Lẹẹ ne irọkhegbe nẹi maan

Vbọzẹ nọ na khẹke ne ima gha begbe vbe odẹ ne ima ya rọkhọ egbe? Kpee VIDIO na, iyeke ọni, uwa ghi ziro yan inọta ni lelẹe.

E VIDIO: De Odẹ Nọ Khẹke Ne I Ya Gha Sọyẹnmwẹ Egbe? (4:39)

De vbene iku isasegbe ne emwa ya gha sọyẹnmwẹ egbe vbe otọ e Rom nẹdẹ, ya khọ odẹ eso ne emwa ya sọyẹnmwẹ egbe vbe ẹdẹnẹrẹ?
Vbe vidio na, de emwi ne Danny ruẹ re vbekpa odẹ na ya rọkhọ egbe?

Tie Rom 12:9, iyeke ọni, uwa ghi ziro yan inọta na:

De vbene ako na, khian ya ru iyobọ nuẹn hẹ, ya gha rọkhọ egbe vbe odẹ nọ khẹke?

De emwi eso ni sọnnọ e Jehova? Tie Itan 6:16-18 kevbe Galatia 5:19-21. Uwa gha tie dọmwadẹ ako na nẹ, uwa ghi ziro yan inọta na:

De emwi eso na ya unu kaẹn vbe avbe ako ọghe Baibol na, nọ wa kpọ vbe odẹ ne emwa ya rọkhọ egbe vbe ẹdẹnẹrẹ?

Evbọ gha ru iyobọ nuẹn ya gha rọkhọ egbe vbe odẹ nọ maan

Nọ egbuẹ:

Odẹ ne I ya rọkhọ egbe sọnnọ e Jehova vbe odẹ ke odẹ ra?
Ẹghẹ ne I ya rọkhọ egbe, rhie mwẹ ẹghẹ nọ te khẹke ne I loo ye emwi ni ru ekpataki ra?
Odẹ ne I ya rọkhọ egbe ya mwẹ sikẹ emwa ni ma hoẹmwẹ e Jehova ra?

Ọ ma khẹke ne ima zẹdẹ sikẹ emwi ke emwi nọ gha sẹtin zẹ ẹbe. Rhunmwuda ọni, emwi ẹwaẹn nọ, deghẹ ima na wa lẹẹ ne irọkhegbe ne ima ghee re wẹẹ, ọ mwẹ vbene ọ ye hẹ

4. Gha loo ẹghẹ ruẹ ẹse

Kpee VIDIO na, iyeke ọni, uwa ghi ziro yan inọta nọ lelẹe.

E VIDIO: De Emwi Ne Uwẹ Loo Ẹghẹ Yi? (2:45)

Agharhemiẹn wẹẹ, ọtẹn ne ima miẹn vbe vidio na, ma gha ghee ughe dan, de emwi nọ ma gi ẹre bẹghe odẹ?

Tie Filipai 1:10, iyeke ọni, uwa ghi ziro yan inọta na:

De vbene ako na gha ya ru iyobọ ne ima, ne ima ghẹ gha loo ẹghẹ nọ kpọlọ gbe ye irọkhegbe?

5. Gi odẹ ne u ya rọkhọ egbe gha re nọ maan

Odẹ eso ne emwa ya rọkhọ egbe sọnnọ e Jehova, sokpan odẹ nibun vbe rrọọ na ya rọkhọ egbe nẹi sọnnọ ọnrẹn. Tie Asan-Ibo 8:15 kevbe Filipai 4:8, iyeke ọni, uwa ghi ziro yan inọta na:

De irọkhegbe nọ maan, ne uwẹ sọyẹnmwẹ ọnrẹn?

U gha sẹtin gha sọyẹnmwẹ egbe vbe odẹ nọ khẹke

EMWA ESO KEGHI KHA WẸẸ: “Ẹi re emwi dan deghẹ I na gha ghee ughe ọghe igbinna oguo, alama oghẹ, ra orhiọn dan na gu mu obọ, ugbẹnvbe a miẹn wẹẹ, I i ru emwi ne I ghee.”

Vbua khian tama ọmwa vberriọ?

OLIKA ẸMWẸ

E Jehova hoo ne ima gha sọyẹnmwẹ egbe vbe odẹ nọ maan.

Ogbewerriẹ

De aro irọkhegbe nọ khẹke ne Ivbiotu e Kristi lẹẹ na?
Vbọzẹ nọ na khẹke ne ima gha begbe vbekpa ẹghẹ ne ima loo ye irọkhegbe?
Vbọzẹ nọ na khẹke ne u gha rọkhọ egbe vbe odẹ nọ gha ya ẹko rhiẹnrhiẹn e Jehova?

Ẹdẹ na ruẹ iruẹmwi na fo:

Emwi Ne U Gha Ru

Loo ẹkpẹti nọ mwẹ uhunmwuta na, “ Evbọ Gha Ru Iyobọ Nuẹn Ya Gha Rọkhọ Egbe Vbe Odẹ Nọ Maan,” ya mu ukpa mu uwerhẹn ghee ẹre, deghẹ irọkhegbe ne u sọyẹnmwẹ ọnrẹn gele maan.

Emwi Ọvbehe Ne U Gha Ru:

Emwi Ọvbehe Ne U Gha Ru