LESÖN 53
Katöllö Nup Inṙamlōn Nup Töṙamlōn Tī Tö Yāvē
Kūö Yāvē nö tö “ṙamlōn nö Tēv.” (1 Timôtī 1:11 NW) Hòṅ meūkö hī inrē anga-aṅ öi ṙamölōn. Ṙamlōn anga-aṅ yěi kē-ěny ṙētakre haṙamlōnre öi in yip aṅ patīre hēk holre inrē. Hòṅ asuh nup rih kahëken hī inṙamlōn yěi ṙētakvö haṙamlōnre, hòṅ hī ṙamlōn, haṙamlōn Yāvē inrē? Töi mikahtökūöre.
1. Hòṅ asuh nup kanöplōn hī yěi katöllö nup inṙamlōn?
Ōt yip tarik tö kuchikṙô nö vë-ekūö mat līpöre, ngëichkö intönet, hang tinköökö hēk meuk sinimā nöng i patīre. Ōt tö kuchīken nö holröön tö holre nö havöt, nyā hēk nyamtô inrē. Asuh öp ööilōn meh më-eṅ minyam yěm ṙētakvö? Köplōn tö nup töng kahëken meh, ööilōn meh minyam, nö hòṅ “ṙanamölōn ngam mā.” (Efisös 5:10) Pön höng minë tötlöng tömötlö inmeuknyi töngamuh inṙamlōn, minë sin-òkkūö Yāvē. Tö sā më kumsōlö höö, minë tötlöng tö meūkö hēk la-en minlūönö inrē. (Vë-evkūö Salmai 11:5.) Sitih inlahen öi rih min chumkūöṙen öi katöllö nup inṙamlōnre?
Sā nuk haköp hī ngaich in ök lesön 48, ök tö ngö: “Akaha ön ngòh kumröönngöre nö hol röön tö akaha tarik.” Ngamuh pöri inrē, yēḵ hī min yahlö ṙētak öi hanôl yip tarik töt hangenlōn tö minë chööngö Yāvē, ngaich “pala-aiṙen” min ayī-ö. (Inchōḵ-oṙô 13:20) Lökten in öi hòṅ hanôl yip tarik yip tö hangenlōn tö Yāvē, ngaich vailöre min nup mufē hī, lööngö katöllö inrē min ayī-ö tö nup tövai inṙamlōn.
2. Kūö yòh öi hòṅ chumkūöṙen tö ṙôken ṙētakre öi inup inṙamlōnre?
Nup töng sitih inṙamlōn tö meūkö hēk tö hāngö tö hī, pòrô anū-ö nö öt vaich. Sön öi hòṅ chumkūöṙen tö ngam rò-òten re öi in u, hòn öt keuheūt ngam ṙētak hī. Ngaich öt ṙētakvö min öi la-evṙen tö minë tötṙanāngen la-en. Halēnö hī an ngam Paipöl, öi hōtu “haṙënngö ṙētak.”—Vë-evkūö Efisös 5:15, 16.
MIKAHTÖKŪÖRE HĒK
Hòṅ sitih inlahen öm yěm hòṅ lööngö katöllö tö nup inṙamlōn? Töi mikahtökūöre.
3. Ṙūöhöngre tö nup tötlöng inṙamlōn
Kūö yòh öi hòṅ chumkūöṙen katöllö nup lōnre inṙamlōn? Röngnyöm VITIŌ, ngaich kakkö minë intöönö yamih.
-
Sitih inlahen nuk minnyāmö kahëken yik aṅ Rōm nöng hěngren tö në minnyāmö tökēkaṙen töngamuh?
-
In ngam tö hameuknyu vitiō asuh ök haköplö Tënī inlahen ngam inṙamlōn?
Vë-evkūö Rōma 12:9, ngaich kakkö ngih intöönö yamih:
-
Sitih inlahen öng ngih miröökö nö hayööken meh min öm lööngö katöllö tö nup inṙamlōn?
Asuh nup la-en sin-òkkūö Yāvē? Yěm hòṅ mikahtökūöre kò-òren nö vë-evkūö ngam Inchōḵ-oṙô 6:16, 17 hēk Kalatī 5:19-21. Unôichrit ṙô meh öm vë-ekūö minë miröökö, ngaich kētö sanapṙô minë intöönö yamih:
-
Sā ṙô ngam miröökö, asuh nup tö meūkö tö hī in minë inṙamlōn tökēkaṙen töngamuh?
Hòṅ sitih inlahen öm yěm hòṅ katöllö nup tölöng inṙamlōn?
Hatöönöre:
-
Tö sitih inlahen öng ngih inṙamlōn? Ōt öp sin-òkkūö Yāvē nö in e?
-
Iṙòkhangen öp min ṙētak chu? Ōttit ṙētak öich min la-evṙen tö nup tötṙanāngen la-en?
-
Achīö yip hanôl chu min? Yahlö inlahen öich min hanôl yip töt hangenlōn tö Yāvē?
Asā tölngö kanò-òṅ hī, hòṅ ṙūöhöngre ayī-ö tö nup pinlāngen. Ngatī nup inṙamlōn yěn pala-aiṙen tī min tö hī, ngaich hòṅ ṙūöhöngre ayī-ö tö u
4. Un mëichngö ṙētakre
Röngnyöm VITIŌ, ngaich kakkö ngih intöönö yamih.
-
Kô-en nun minë maheuk ngam prötör nö öt uroh nö tövaich, ngam inlahen ngam ṙētak ò pöri nö yëngen, sitih inlahen ang nö ngaich?
Vë-evkūö Filipī 1:10, ngaich kakkö ngih intöönö yamih:
-
Sitih inlahen öng ngih miröökö nö hayööken hī, hòṅ hī öt yahlö ṙētak, öi in minë inṙamlōn?
5. Katöllö nup tölöng hēk tövai inṙamlōn
Ōt nup muh inṙamlōn töt ööilōn Yāvē. Ōtren pöri nup inṙamlōn töt vaich nö uroh nö imat Yāvē, mihôiṅ öm haṙamlōnre in u. Vë-evkūö Mumkahten 8:15 hēk Filipī 4:8, ngaich kakkö ngih intöönö yamih:
-
Asuh nup tölöng hēk tövai inṙamlōn kahëken meh, yěm hòṅ haṙamlōnre?
Mihôiṅ man katöllö nup tövai inṙamlōn, nup tö ṙamlōn tī inrē tö hī
ṘÔ YIP TAHËNG: “Höng anū-ö nun kòl tö hameuknyu inṙamlōn töngamuh. Tö sā ngam kinsōlö, minë tötlöng nyat hēk la-en minlūönö, kôngen chin chū-ö höng mameūkö u, öt asīnken u öich uroh.”
-
Sitih ṙô öm min më-eṅ?
MINË HAKÖP HĪ NGAICH
Lōnu Yāvē tö hī öi katöllö nup tövai inṙamlōn, nup tö ṙamlōn tī inrē tö hī.
Sitih ṙô öm min më-eṅ?
-
Nup yòh nup inṙamlōn tötkô nö kahëken ngòh tökô-en Kristīön?
-
Kūö yòh öi hòṅ chumkūöṙen tö rò-òtenre yēḵ hī hòṅ haṙamlōnre?
-
Kūö yòh öm hòṅ katöllö nup inṙamlōn nup tö ṙamölōn tī Yāvē?
NGËICHKÖ NË INRĒ
Achīö öp min tö mihôiṅ nö katöllö nup kuilōn hī inṙamlōn? Töi mikahtökūöre.
Yěm ṙētakvö öm kumchikngenre, asuh öp tö hòṅ kanöplōn meh? Töi mikahtökūöre.
“Tölöng Ön Minë Inṙamlōn Meh?” (Chūökamahati-HI, Òktopör 15, 2011)
In ngam istorī “Hö-ö Chin Ngaich Tut Inlahen Holre,” sitih inlahen anga-aṅ nö halööktitre pön lööngö katöllö tö ngam inṙamlōn.
“Vailöre Tinrīken Tīm Paipöl” (Chūökamahati-E, Förvörī 1, 2010)
Ṙònghöichṙen ngam yöngnyīö nö meuk TV, hameuknyu ngaich minë sinimā inlahen Sī-ö nö el ngam TV minë tötkô nö meūkö. Sitih inlahen ang ngam yöngnyīö nö lööngö katöllö.
Ṙūöhöngre Tö Nup Inṙamlōn Mahameuknyö Inlahen Ngam Sī-ö (2:02)
