NSUNZO 53

Kasakula Mavego Animwagalaliha Yehova

Orumiha dhovuruwana obe Vidiyu dhisakuliwe na Elogeloya

Yehova, “Mulugu wowagalala.” (1 Timóteo 1:11) Iyene onfuna wi iyo nagalale vina nijevo egumi. Onoziveliwa nigatamelaga mudhidhi wovuma. Mwari mwa nsunzo ntti, ninele wona marhe ananikamihedhe ojavo mudhidhi wehu wa ovuma—nihidduwalaga omwagalaliha Yehova.

1. Txini enfwanyelihu wubuwela nigasakulaga mavego?

Txini enziveliwa weyo okosa mudhidhi wa ovuma? Attu ena ansakula okala vatakulu—bagengesa manivuru, ovuruwana jibo, wona mafilimi obe ovolowa mwinternetini. Ena kanziveliwetxa okala vatakulu—anosakula wedda, odhowa wabelela obe ojugari na amarho awa. Mavego-mavegovi ansakulihu, ninofwanyela okana ebaribari akala “anomuzivela Nabuya.” (Éfeso 5:10) Jamakamaka wubuwela dhawene sabwani dhilobo dhinji dhinsakula attu wi avegegena sisile dhinidda Yehova, ninga kani, mararuwo na ologa na muya dhabure. (Kengesa Masalmo 11:5.) Txini enanikamihedhe osakula deretu mavego ehu?

Nigasakula amarho animukwela Yehova, ninele okana mandano aderetu vina ninele osakula deretu mavego ehu. Ninga monelihu nsunzo 48, “Nigedda n’aziwitxi ninopura ononelamo wawa.” Mwa mpaddi mwina nigakalaga mudhidhi mwinjene na attu ahinimukwela Yehova “ninorava obure wawa.”—Gano 13:20.

2. Ekalelini yamakamaka wag’anela mudhidhi onlabiyedhihu na mavego?

Masiki osakula wehu wa mavego okale waderetu, ninofwanyela okala pasope wi nihinongetxe mudhidhi na mavegoya. Enodhaga opadduwa iyo ohikana mudhidhi wa okosa dhilobo dhamakamaka. Bibilia ononikokomeza wi ‘Ninofwanyela olabihedha deretu mudhidhi wehu.’—Kengesa Éfeso 5:15, 16.

KASUNZAVI

Koona enawukamihedhe okosa dhogana dhapama mwaha wa mavego.

3. Karabela dhilobo dhinimusilidha Yehova

Ninfwanyelelani osakula deretu mavego ehu? Karumiha VIDIYU, mugamala mutanaalele mavuzo aba.

VIDIYU: Ddisakule Mavego Gani? (4:39)

Mavego akosiwa wale o Roma anladdana dhavi na mavego a masaka abano?
Mvidiyuni, txini esunzile Daniel sabwa ya mavego?

Kengesa Roma 12:9, mugamala mutanaalele nivuzo ntti:

Nlebo ntti nimpatta dhavi mukalelo onsakuliwe mavego awo?

Dhilobo gani dhinidda Yehova? Kengesa Gano 6:16, 17 na Galásia 5:19-21. Mugamala wengesa malebo aba mutanaalele nivuzo ntti:

Dhilobo gani dhilogiwe mmaversuni mpu dhinonetxa weyo masaka abano?

Onawodhe dhavi osakula deretu mavego awo

Karoma otanaalela:

Txini? Dhinvegana miyo dhinowiwanana na esile dhinidda Yehova?
Mudhidhi gani? Dhinogudulana na mabasa a makamaka?
Bani? Dhinoddittukulela omaga mandano na attu ahinimukwela Yehova?

Yamakamakaya ja okala wolapelana na dhilobo dhowopiha. Noona akala ninowaganyedha mavegoya okala abure, yaderetuya jottiya momaguva

4. Kalabihedha deretu mudhidhi wawo

Karumiha VIDIYU, mugamala mutanaalele nivuzo ntti.

VIDIYU: O Que É Que Está a Controlar o Seu Tempo? (2:45)

Masiki mbali mvidiyuni ahonaga yabure na dhakosiye, olabihedha mudhidhi waye wa ofuru ompattile dhavi?

Kengesa Filipi 1:10, mugamala mutanaalele nivuzo ntti:

Nlebo ntti, ninanikamihedhe dhavi ogana mudhidhi onakalihu mmavegoni?

5. Kafwaseyela osakula mavego awo

Ebaribari wi mavego mena anomusilidha Yehova, mbwenye dhikalawo dhilobo dhinji dhinakosihu wi nivegegena. Kengesa Kohelét 8:15 na Filipi 4:8, mugamala mutanaalele nivuzo ntti:

Mavego gani anziveliwetxa weyo?

Dhihikalawo dhilobo dhinji dhaderetu dhinfwanyelela iyo osakula wi nivegena

ATTU ENA ANLOGA WI: “Kawuli makani wona filimi obe wengesa nivuru ninloga dha opanga, mararuwo vina ologa na muya dhabure. Ya makamakaya kuhikosa dhilobodha esi.”