TOƁƁERE 53
Suɓee fijindaaruuji welayɗi Yahuwah Alla
Yahuwah ko « Alla weltiiɗo » (1 Timotee 1:11, NWT). Himo faalaa yo en wonu weltiiɓe e heɓen ngurndan welɗan. O weltoto si en waɗii saa’i fii fijugol e fii fowtagol. E nder ndee toɓɓere, en yi’ay honno huutorten saa’i men on fii fijugol e fowtagol ko moƴƴani en e ko weltinta Yahuwah Alla.
1. Ko honɗun haanuɗen annditude si hiɗen suɓaade fijindaaru ?
Ko honɗun yiɗuɗon waɗugol si hiɗon fijude maa si hiɗon fowtaade ? Woɓɓe no yiɗi wonugol ka maɓɓe fii janngugol, heɗagol gimi, ndaarugol filmu maa ndaarugol piiji ka enternet. Woɓɓe goo kadi, no yiɗi haylodagol e weldiɓɓe mun ɓen, fubbagol maa fijidugol e maɓɓe. Kala ko suɓiɗen, hiɗen haani fellitude ɗun ko « ko welata Joomiraaɗo on » (Efeesi 5:10). No hitti ka faamen ɗun ɓay no woodi noone fijindaaruuji ko wondi e piiji ɗi Yahuwah Alla yiɗaa wano hunƴeendi, jinaa, mbileyaagal maa ɲanneyaagal (janngee Zabuura 11:5, VPFJ). Ko honɗun wallata en suɓagol moƴƴa no fijirten non ?
Si weldiɓɓe men ɓen no yiɗi Yahuwah Alla, ɓe battinay en no moƴƴiri e ɗun wallay en suɓagol fijindaaruuji moƴƴuɗi. Ka toɓɓere 48, en jannguno : « Wondugol e faamuɓe no okka faamu ». Ko wano non kadi, si en jokkondirii e yimɓe ɓe yiɗaa sariyaaji Yahuwah Alla ɗin, ɗun « masinbinay » (Tindi 13:20, VPFJ).
2. Fii honɗun no hitti wattangol yila e saa’i mo fijeten on ?
Hay si fijindaaru men ndun no wela Yahuwah Alla, hiɗen haani wattande yila fii wota en feƴƴin saa’i ɗuuɗuɗo e mun. Si wonaa ɗun, en heɓataa saa’i fii piiji ɓurnɗi hittude ɗin. Deftere Alla nden wi’i « wota [en] accu fajuhun woo feƴƴira [en] » (janngee Efeesi 5:15, 16).
LUGGINEE
Anndee no fewjirton no moƴƴiri fii fijindaaru mon ndun.
3. Wikkee fijindaaruuji wonduɗi e bone
Fii honɗun wattanten yila e suɓagol fijindaaruuji men ɗin ? Fijinee VIDIO on e yewton fii lanndaale jokkituɗe ɗen.
-
Ko honno fijindaaruuji ɗin hannde nanndiri e piiro ko waɗaynoo e nder Roomu ɓaawo ɗoo ?
-
E nder vidio on, ko honɗun Danny janngi fii fijindaaru ?
Janngee Roomu 12:9 e yewton fii ngal lanndal :
-
Ko honno oo aaya wallirta on suɓagol fijindaaru ?
Ko piiji honɗi Yahuwah Alla aɲi ? Janngee Tindi 6:16, 17 (VPFJ) e Galaasi 5:19-21. Ɓawto janngugol kala lowre, yewtee fii ngal lanndal :
-
Ko piiji honɗi haalaaɗi fii mun e nder ɗee aayeeje ɗoo yi’oton hannde e nder fijindaaru ?
Ko honno suɓortoɗon fijindaaruuji mon ɗin no moƴƴiri ?
Lanndee hoore mon :
-
Ko honɗun ? No wondi e piiji ɗi Yahuwah Alla aɲi ?
-
Ko saa’i hommbo ? Ɗun haɗay lan waɗugol piiji ɓuri hittude ɗin ?
-
Ko hommbo ? Ɗun waɗay mi feƴƴindina saa’i soono woo e yimɓe ɓe yiɗaa Yahuwah Alla ?
Fii danndugol hoore men, hiɗen haani woɗɗaade kala bone. Ko ɗun waɗi, hiɗen haani woɗɗaade fijindaaruuji ɗi sikkuɗen moƴƴanaa en.
4. Huutoree saa’i mon on no moƴƴiri
Fijinee VIDIO on e yewton fii lanndal jokkitungal ngal.
-
Fii kala musiɗɗo on ka nder vidio hari alaa ndaarude ko wondi e bone, ko honno huutorgol saa’i makko on battiniri mo ?
Janngee Filipii 1:10 e yewton fii ngal lanndal :
-
Ko honno oo aaya wallirta en fewjugol beru saa’i mo feƴƴinten e fijindaaru ?
5. Suɓee fijindaaruuji moƴƴi
Fii kala no woodi fijindaaruuji ɗi welataa Yahuwah Alla, kono no woodi fijindaaruuji buy moƴƴuɗi. Janngee Waajotooɗo on 8:15 e Filipii 4:8 e yewton fii ngal lanndal :
-
Ko fijindaaruuji moƴƴi honɗi yiɗuɗon ?
Hiɗon waawi heɓude fijindaaruuji moƴƴi ko weltinta on.
WOƁƁE GOO NO WI’A : « Bone woo alaa e fijindaaruuji hollayɗi hunƴeendi, jinaa, mbileyaagal maa ɲanneyaagal si tawii mi alaa e waɗude ɗun. »
-
Ko honɗun wi’oton ?
RAWNOODE
Yahuwah Alla no faalaa yo en suɓo fijindaaruuji moƴƴuɗi welayɗi en.
Ndartannde
-
Ko fijindaaruuji honnɗi almasiiyaaɓe ɓen haani wikkaade ?
-
Fii honɗun hiɗen haani wattande yila e saa’i mo feƴƴinten on fii fijindaaru ?
-
Fii honɗun hiɗon faalaa suɓaade fijindaaruuji welayɗi en e weltinayɗi Yahuwah Alla ?
TASKEE
Anndee ko hommbo haani suɓaade fijindaaruuji men ɗin.
« Seedeeɓe Yahuwah ɓen no toŋi filmuuji, ɗefte maa gimi goo ? » (Winndannde ka jw.org)
Anndee no fewjirton no moƴƴiri fii fijindaaru e fowtagol.
« Fijindaaru mon ndun no wondi e nafa ? » (Suudu Aynirdu ndun, 15 ottoombur 2011)
E nder taariika on « Mi fooluno ɓurnindiral », anndee no gorko waylirnoo suɓagol fijindaaruuji makko ɗin.
« Deftere Alla nden no wayla ngurndan » (Suudu Aynirdu ndun, 1 feeburuyee 2010)
Ndaaree no neeneejo fewjiri no moƴƴiri e nder ko o ndaarata filmu holluɗo ɲanneyaagal.
