ˈCƖAANDHƐ- 53
Dhɩ -aa zaa ˈplʋ ˈˈjhrii ˈye Zoova ˈtʋn nʋn
Zoova -nɩɛn- “ˈmʋnan Ɲɔnsoa.” (1 Timothée 1:11) Ɔɔ ˈbɔn -a ˈye ˈmʋnan in -nɩn ˈˈdhe -a ˈye ˈkmʋn anˈ trɔnˈ dhi. -Bho -a gwɛ dhbho nʋanˈ -wɛeˈ -a ˈˈdhuo- nɔnˈˈ ˈmʋn -aa sa fɔn ˈˈdhe -aa sa ˈplʋ ˈˈjhrii -za aˈ, ɛɛ nʋɛn Zoova ˈtʋn. -Ka -a ˈyea nʋn -wɛeˈ nɔnˈˈ -aa zaa ˈplʋ ˈˈjhrii ˈyea -aʋ dhɛjɛɛn ˈˈdhrui nʋn ˈˈdhe -a ˈyea Zoova ˈmʋnan in po -ke ɛ, ɛmɛn- -aa mun ˈjhe- ˈnɔn ˈcɩaandhɛ- nɛn ˈdhi.
1. -Bho -aa sa ˈplʋjhriizaadhɩ- ˈbho za aˈ, dhɛwɛ- -a ˈse bho ˈˈmae- dhi -ɛ?
Dhɛwɛ- -man zaa ˈplʋ ˈˈjhrii -ɛ? Ɲʋn -ˈnʋʋn -kman livrʋ ˈdhii -zro -dɩ, -ˈnʋʋn -kman mizikɩ -dheinˈˈ bho -po -dɩ, -ˈnʋʋn an ˈjheɛ fimʋn in -aeˈˈ ʋa muɛn ˈo ɛntɛɛnɛtɩ ˈˈkpe. -Ka ɲʋn -ˈnʋʋn an nʋan ˈplʋ ˈˈjhri -zaa sʋn -mɛn -nɩn, -ʋʋ -nɩn ʋaˈ dhaiˈˈ -ˈˈwe a nan in, ʋa bhla balɔn -aeˈˈ ʋa muɛn -dhreaˈ ˈdhe ˈˈniɔn-. -Ka dhɛ -aa nʋan ˈbho ˈplʋ ˈˈjhrii -zaaˈ ˈjhe ɛ -nɩn ɛnˈ, ɛ ˈye ‘-aaˈ ˈBhlei- ˈtʋn nʋn.’ (Éphésiens 5:10) Ɛɛˈ dhɛ tu -kɔndɩ ˈjɛɛn-, dhɛ nɩan ˈo ɛ, dhɩ Zoova ˈɲɛan ˈmʋn -ɩn nɩan: ˈˈkudhbhaˈ- -e gbaivɔɛn- -e ˈɲnɩnzanˈ -e gupoɛ- ɛ, ɩmɩn- -nɩn ˈplʋjhriizaadhɩ aˈ -da -duuˈˈ ˈdhii ˈzɩan. (Zro Psaume 11:5.) -ˈMɛn dhɛwɛ- ˈye -aʋ sʋn bho po -wɛeˈ -a ˈye ˈo ˈplʋjhriizaadhɩ- ˈjɛɩn -za -a?
-Bho -a ˈbhle dhaiˈˈ -ˈˈwe -ʋʋ kman Zoova aˈ dɩ ɛˈ, ʋa muɛn -nʋn -a ˈye kplɩn ˈjɛɩn ˈbhle ˈˈdhe -a ˈye ˈo ˈplʋjhriizaadhɩ- ˈdhɔɛe -za. -Ka ˈcɩaandhɛ ɛˈ 48 nʋɛn ɛnˈ ˈtmʋn sʋn ɛn, “ɲɔn -ɔ -nɩn ɲʋn nɩan tɔˈ ˈdhi a nan, ɔɔ muɛn tɔˈ ˈdhi -nɩn.” ˈKlaa, ɲɔn -nɩn ɲʋn sea Zoova aˈ ˈtee aˈ dɩ -kman nɩan -da dhueˈ jheejhee ɛ, ɔɔ “muɛn ˈkledɩ ˈjhe-.”—Proverbes 13:20.
2. Dhɛɛdɩ- -a ˈye -aaˈ nɔnˈˈ ɔnˈ ka jhibho- ˈbho ˈplʋ ˈˈjhrii -zaa nanˈ -an?
-Bho dhɛ -aa -zaa ˈplʋ ˈˈjhrii se dɩ ˈˈbun -nɩn -mɔnˈ -dhe ɛˈ, nɔnˈˈ -aa nʋan ˈbho ˈplʋ ˈˈjhrii -zaaˈ a, -a ˈye ɔɔˈ ka jhibho-. -Bho -a se -ˈgwlɩi ˈsroo- ɛˈ, -a ˈse dhɩ kɔandɩ aˈ nʋanˈ anˈ nɔnˈˈ ˈjhe- i. Biiblʋ a poɛ -aʋ ˈkpɩ -a ˈye ‘-aaˈ nɔnˈˈ dhbhoˈˈ -nʋʋn -kajɔɔnka.’—Zro Éphésiens 5:15, 16.
KPA DHƐ I ˈŊWƆƐN ƝAN
-Ka -a ˈyea ˈplʋjhriizaadhɩ- ˈjɛɩn ˈbho -za sʋn nʋn ɛn, ɛmɛn- -aa mun ˈjhe-.
3. -Tɛɛn ˈplʋjhriizaadhɩ- -saɩn bho
-Bho -aa sa ˈplʋjhriizadhɛ- ˈbho za aˈ, dhɛɛdɩ- -a ˈye -ˈgwlɩi ˈsroo- -ɛ? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Ka ˈplʋjhriizaadhɩ- nɩan ˈo Rɔmʋkɔʋn anˈ nɔnˈˈ -nɩn -jɩn nɩan ˈzɩan nʋn gʋɔ- sʋn -ɛn?
-
Dhɛwɛ- Dani ˈŋwɔn in ˈdhe ˈplʋjhriizaadhɩ aˈ dɩ ˈdhi -ɛ?
Zro Romains 12:9, -ˈmɛn aʋ ˈtmʋn ideedɩ- nɩn anˈ dɩ:
-
-Kawɛ Biiblʋ aˈ ˈˈjhriɛ nɛn ˈbhɛɛˈ ɛ ˈye ʋn sʋn bho po -wɛeˈ -ˈye ˈo ˈplʋjhriizaadhɩ- ˈjɛɩn -za -a?
Dhɩwɛ- -ɩan- ɲaan Zoova i -ɛ? Zro Proverbes 6:16, 17 -e Galates 5:19-21. -Bho gwɛ Biiblʋ aˈ ˈˈjhri nɩn ˈdhii -zroaˈ aˈ, -ˈmɛn aʋ ˈtmʋn ideedɩ- nɩn anˈ dɩ:
-
Dhɩ -ɩanˈ dɩ ˈtmʋan ˈdhe Biiblʋ aˈ ˈˈjhri nɩn ˈdhi ɛ, -jɩnwɛ- ɲʋn an ˈjhe ˈzɩan ˈdhe ˈplʋjhriizaadhɩ ˈdhi -ɛ?
-Bho -ˈye ˈo ˈplʋjhriizaadhɛ- -za aˈ...
dee- -manˈ ˈˈjɛ i:
-
Dhɛ -nɩn ˈe ˈplʋjhriizaadhɛ- -ˈnɛn ˈdhi -ɛɛ ɲaan Zoova i?
-
Nɔnˈˈ diɛ- ˈye nʋn ˈbho ˈplʋjhriizaadhɛ- -ˈnɛn bho -aeˈˈ ˈplʋjhriizaadhɛ- -ˈnɛn ɛn nʋɛnˈ ˈman an ˈˈdu dhɩ kɔandɩ ˈˈjhriɛ?
-
Ɲʋnwɛ- ˈplʋjhriizaadhɛ- -ˈnɛn ɛn nʋn -ʋa- ˈkpa ˈman dhaiˈˈ -ˈˈwe -ɛ? Ɛ ɲʋn -kman Zoova aˈ dɩ?
-Bho -a ˈse ˈbɔn -a ˈye ˈkle ˈjhe ɛˈ, -a ˈye dhɛsaʋn- bho -tɛɛn. -ˈMɛn -bho -a ˈse ˈbɔn -aaˈ ˈplʋjhriizaadhɩ- ˈye -aʋ dɩ bho -jha a, -a ˈye -jɩn sea ˈˈjhriinmɔn- bho -tɛɛn -ke.
4. Jhibho- -manˈ nɔnˈˈ ɔnˈ ka
Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛwɛ- ˈdhoudhi -ˈnɔn ɔn nʋn -ɛ se ˈˈjhriinmɔn- -ɔn?
Zro Philippiens 1:10, -ˈmɛn aʋ ˈtmʋn ideedɩ- nɩn anˈ dɩ:
-
Ka Biiblʋ aˈ ˈˈjhriɛ nɛn ˈbhɛɛ ɛ ˈye -aʋ sʋn bho po -wɛeˈ nɔnˈˈ -aa nʋan ˈbho ˈplʋ ˈˈjhrii -zaaˈ a, -a ˈye ɔɔˈ ka jhibho- -ɛ?
5. -Za ˈo ˈplʋjhriizaadhɩ- -ɩn ˈyea ʋn dhɛjɛɛn ˈˈdhru i nʋn ɛn
Ɛ se ˈplʋjhriizaadhɩ aˈ klɛɛ -ɩan- nʋn Zoova ˈtʋn -nɩn. -ˈNɩɩn -nɩn ˈo -ɩan- nʋɔn ˈtʋn. Zro Ecclésiaste 8:15 -e Philippiens 4:8, -ˈmɛn aʋ ˈtmʋn ideedɩ- nɩn anˈ dɩ:
-
ˈPlʋjhriizaadhɩ- -wɛ se dɩ ˈˈbun -tbha ka -nɩn -ɩan- nʋn ʋn ˈtʋn -ɛn?
ƝƲN -ˈNƲƲN ˈNAAN: “ˈPlʋjhriizaadhɩ- ˈdhe ˈdhi ˈˈkudhbhaˈ- -e gbaivɔɛn- -e ˈɲnɩnzanˈ -e gupoɛ- nɩan, ɩanˈ i ˈjheɛ- se dhɛsaʋn -nɩn. ˈKlaa ɛ se ˈman ˈˈjɛ -ɔɔ nʋn ɩanˈ dhɩ tu -nɩn.”
-
Ka -man mun ˈdha -a?
DHƐWƐ- ˈCƖAN-
ˈPlʋjhriizaadhɩ- ˈdhɔɛe -ɩn ˈye -aʋ dhɛjɛɛn ˈdhru i nʋn ɛn, ɩmɩn- Zoova a ˈbɔn -a ˈye ˈo -za.
Dhɛwɛ- -ˈŋwɔn in -ɛn?
-
ˈPlʋjhriizaadhɩ- -wɛ kletiɛn -ˈˈwe ˈye bho -tɛɛn -ɛn?
-
Nɔnˈˈ -aa nʋan ˈbho ˈplʋ ˈˈjhrii -zaaˈ a, dhɛɛdɩ- -a ˈye ɔɔˈ ka -jhibho- -ɛ?
-
Dhɛɛdɩ- -aa ˈbɔn -a ˈye ˈplʋjhriizaadhɩ- -ɩan- nʋan Zoova ˈtʋn ˈbho -za -a?
ˈBƆN DHƖ -ˈNƖƖN ANˈ I ˈŊWƆAN IN
Ɲɔnwɛ- -ˈye -aaˈ ˈplʋjhriizaadhɩ ˈbho -za -a?
Dhɩ ˈbhɛɛa -ɩn ˈyea ʋn sʋn bho po -wɛeˈ -ˈyea ˈo ˈplʋjhriizaadhɩ ˈjɛɩn -za a.
“Comment se détendre sainement?” (La Tour de Garde, 15 octobre 2011)
ˈˈJhu dhueˈ -ɔ zian ɔɔˈ ˈplʋjhriizaadhɩ ˈˈɩ ɔɔˈ -bo. (biographie “J’ai même surmonté mes préjugés”).
“La Bible transforme des vies” (La Tour de Garde, 1er février 2010)
ˈˈƝnuundhouˈ dhueˈ ˈjheɛ -ka gupoɛ- nɩan ˈe fimʋn ʋan ˈjhea i ˈdhi ɛ, dhɛwɛ- ʋn nʋn -ɛn?