EISOMO LYA 53

Rondaho Eburudani Elikushemelera Yehova

ZANISA

Yehova ni “Katonda aina ebyera.” (1 Timoteo 1:11) Nayenda tugire ebyera kandi tushemelerwe emikalire. Nashemelerwa orwo tulikutekateka akanya ak’okushemelerwa. Omwisomo eli, turayega engeli ey’okukozesa akanya kaitu ak’okwikyaho omu ngeli elinungi mara elikushemera, n’omu kanya ako konene konene kushemeleza Yehova.

1. Nitwetagwa kwijukaki orwo tuli kuronda eburudani?

Omu kanya ak’okwikyaho oyenda kukoraki? Abantu abandi orwo baba bali omuka baikizeho benda kushoma ekitabo, kuhuliliza omuziki, kuleba etelevisheni, anga kutaha omu intaneti. Abandi nibakozesa akanya ako kukuba amabanga na banywanyi babo, kuziha, anga kuzana emizano eya buli ngeli. Kyona kyona eky’orayenda kukora, noyetagwa kwekomeleza nk’okwo norondaho eburudani ‘elikushemelera Omukama.’ (Abaefeso 5:10) Kintu kyomugasho kurondaho eburudani elikugasha aha rw’enshonga eburudani zingi ezilikwendwa muno kany’aka, zikwatirainemu ebintu ebyo Yehova alikutamwa nk’obukatili, emyegendesheleze mibi ekwete angono, anga kufumora n’amasitani. (Shoma Ezaburi 11:5.) Nikihai ekiratujuna kukozesa obumanyi orwo tulikuronda eburudani?

Katuraronda abanywanyi abali kugonza Yehova, nibaija kutwombeka n’okutujuna kuronda eburudani elikugasha. Nk’okwo twayegire omwisomo lya 48, omuntu “ayaikara n’abaina obumanyi agira obumanyi.” Omu butashanangana nekyo, orwo tulikugira emimanyilire y’okwema n’abantu abatali kugonza mateka ga Katonda ‘turabona enaku.’—Emigani 13:20.

2. Kubaki tituli kwetagwa kukozesa akanya kaitu kangi omu burudani?

N’orwo eburudani ezo tulikuronda ziraba nizigasha, nitwetagwa kwekomeleza tutakozesa kanya kangi muno. Aha rw’enshonga ekyo kyakutukora tuburwe akanya kokukora ebintu ebili by’omugasho muno. Ebibulia netugambira eti ‘omwanya tugukoze kurungi muno.’—Shoma Abaefeso 5:15, 16.

MANYURUZA

Yega omanye okwo wakukora oburamuzi obuli burungi obukwete aha burudani.

3. Oyetange eburudani ezitali kugasha

Kubaki nitwetagwa kwekomeleza orwo tulikuronda eburudani? Yolekya EVIDEO, mushube mufumoreho ebibazo ebili kuhonderaho.

EVIDEO: Ninyetagwa Kuronda Eburudani eya Ngeliki? (4:39)

Emizano eya karai eya Roma neshanangana etai n’eburudani nanka eza kany’aka?
Omu video egi, Danny akegaki ekikwete aha burudani?

Shoma Abaroma 12:9, mushube mufumoreho ekibazo eki:

Orujuru oru nirubasa rutai kukujuna kuronda eburudani eli kugasha?

Nibintuki ebyo Yehova alikutamwa? Shoma Emigani 6:16, 17 n’Abagalasia 5:19-21. Orwo muramara kushoma buli eihandiko, mufumoreho ekibazo eki:

Nibintuki ebili kugambwa omu njuru ezi, ebili kuzoka muno omu burudani za kany’aka?

Okwo wakukozesa obumanyi kuronda eburudani

Yebaze oti:

Kiki? Isi, eburudani egi einamu ekintu kyona kyona ekyo Yehova alikutamwa?
Maki? Isi, eburudani egi eratwara akanya akokukora ebintu ebili by’o mugasho muno?
N’ohai? Isi, eburudani egi neija kunkora nywane n’abantu abatali kugonza Yehova?

Tubase kugira emilembe, nitwetagwa kwilira harai muno n’ekintu kyona kyona ekyakututahya omu rushengo. Kityo, nitwetagwa kwelinda eburudani yona yona eyo tuli kubona nk’okwo telikugasha

4. Kozesa akanya kawe omu bumanyi

Yolekya EVIDEO, mushube mufumoreho ekibazo ekili kuhonderaho.

EVIDEO: Nokozesa Otai Akanya Kawe? (2:45)

N’orwo murumuna waitu omu video egi yabaire atalikureba kintu ekitali kugasha, orushengo rukaba ruli nkahai?

Shoma Abafilipi 1:10, mushube mufumoreho ekibazo eki:

Orujuru oru nirubasa kutujuna rutai kuramura akanya ako turakozesa omu burudani?

5. Rondaho eburudani ezili kugasha

N’orwo eburudani nanka zitali kushemelera Yehova, aliho ebintu bingi muno ebili kugasha ebyo twakukora tubase kushemelerwa. Shoma Omwegesa 8:15 na Abafilipi 4:8, mushube mufumoreho ekibazo eki:

Niburudaniki eyolikwenda kushemelerwa?

Nobasa kushemelerwa eburudani ezili kugasha

ABANTU ABANDI NIBAGAMBA BATI: “Talimu kabi kona kona ako kushemelerwa eburudani ezinamu obukatili, emyegendesheleze mibi, anga kufumora n’amasitani kandaba ntali kukora bintu ebyo.”