LESENI 53
Iehova ese Ia Abia Dae Moale Karadia Oi Karaia
Iehova be “moale Diravana.” (1 Timoteo 1:11) Ia ura iseda mauri do ita moalelaia. Dirava ia moale bema gaukara amo ita laga-ani bona moale karadia ita karaia. Inai stadi ai, Iehova ese ia abia dae moale kara namodia ita karaia dalana do ita herevalaia.
1. Moale karadia ita ura abia hidi neganai, dahaka ita laloatao be namo?
Oi laga-ani neganai oi ura dahaka oi karaia? Haida idia ura ruma dekenai idia laga-ani, reana buka idia duahia, miusiki idia kamonai, muvi idia itaia o Intanet idia gaukaralaia. Ma haida idia ura edia turadia ida gau ta idia karaia, reana gabu ta dekenai idia raka lao, sinavai dekenai idia digudigu, o idia gadara hebou. Herevana edena moale karana ita karaia, to gau badana be ita abia hidi gauna be “Lohiabada ese ia abia dae.” (Efeso 5:10) Unai ita lalopararalaia be gau badana, badina hari inai negai moale karadia momo be Iehova ese ia inai henia karadia hegeregere, dagedage, matabodaga, bona meamea idia hahedinaraia. (Salamo 11:5 duahia.) Dahaka ese ita do ia durua moale kara maorodia ita abia hidi totona?
Bema Iehova idia lalokau henia taudia ita bamoa, idia ese ita do idia durua bona moale karadia maorodia do ita abia hidi. Leseni gunana ta ai ita herevalaia bamona, “aonega taudia ida ia raka tauna be do ia aonega.” To, bema Iehova ena taravatu maorodia idia laloa bada lasi taudia ita bamoa, ‘dika do ita davaria.’—Aonega Herevadia 13:20.
2. Dahaka dainai moale karadia dekenai iseda nega ita biagua be mai anina bada?
Ena be ita abia hidi moale karana be namo, to namo lasi nega bada ita haorea unai ita karaia totona. Bema ita naria namonamo lasi, mai anina bada gaudia karaia totona nega be lasi. Baibel ese ita ia hagoadaia iseda “nega do [ita] gaukaralaia namonamo.”—Efeso 5:15, 16.
DIBA MA HAIDA ABIA
Moale karadia dekenai abia hidi namodia karaia dalana do oi dibaia.
3. Moale kara dikadia dadaraia
Dahaka dainai moale karadia namodia ita abia hidi be namo? VIDIO itaia, bona henanadai herevalaia.
-
Edena dala ai hari idia karaia gadara haida be guna Roma dekenai taunimanima o animal ida idia heatu bona idia hamasea gadara haida bamona?
-
Inai vidio dekenai Danny be moale karadia dekenai dahaka ia dibaia?
Roma 12:9 duahia, bena inai henanadai herevalaia:
-
Edena dala ai unai siri ese oi ia durua moale kara maorodia oi abia hidi totona?
Iehova ese ia inai henia gaudia haida be dahaka? Aonega Herevadia 6:16, 17 bona Galatia 5:19-21 duahia. Unai siri ta ta duahia murinai, inai henanadai herevalaia:
-
Unai siri ese idia herevalaia gaudia amo, edena kara be hari idia karaia momo moale karana ta?
Mai aonega ida moale karadia oi abia hidi dalana
Sibona oi nanadaia:
-
Edena bamona? Ia be Iehova ese ia inai henia karana ta, a?
-
Edena negai? Unai moale karana lau karaia dainai, mai anina bada gaudia totona nega be lasi, a?
-
Daika ida? Unai moale karana dekenai nega momo Iehova idia diba lasi taudia lau bamoa, a?
Namona be dika idia havaraia gaudia kahirakahira ita lao lasi. Unai dainai bema ita itaia moale karana ta be ia dika, ita dadaraia be namo
4. Mai aonega ida emu nega oi gaukaralaia
VIDIO itaia, bona henanadai herevalaia.
-
Ena be tadikaka be gau dikana ta ia itaia lasi, to iena hekwakwanai be dahaka?
Filipi 1:10 duahia, bena inai henanadai herevalaia:
-
Edena dala ai inai siri ese ita ia durua moale karadia dekenai nega ita gaukaralaia namonamo totona?
5. Moale kara maorodia abia hidi
Ena be moale karadia haida be Iehova ese ia abia dae lasi, to moale karadia namodia momo idia noho. Hadibaia Tauna 8:15 bona Filipi 4:8 duahia, bena inai henanadai herevalaia:
-
Edena moale karana oi ura henia?
Laga-ani neganai gau idauidau oi moalelaia diba
HAIDA IDIA GWAU: “Dagedage, matabodaga o meamea karadia idia hahedinaraia moale karadia lau abia dae be kerere lasi, gau badana be unai gaudia lau karaia lasi.”
-
Edena bamona do oi haere?
POINT BADANA
Ita moale totona Iehova ia ura moale kara maorodia ita abia hidi.
Riviu
-
Keristani taudia ese edena bamona moale karadia idia dadaraia be namo?
-
Dahaka dainai moale karadia dekenai iseda nega ita biagua be namo?
-
Dahaka dainai oi ura Iehova ese ia abia dae moale karadia oi abia hidi?
REFERENS ITAIA
Daika ese ita totona moale karadia ia abia hidi do ita dibaia.
“Iehova ena Witnes taudia ese Muvi, Buka Bona Ane Haida Idia Taravatua, A?” (Websait atikol)
Laga-ani negadiai moale kara namodia oi abia hidi dalana do oi dibaia.
“Moale Karadia Abia Hidi Namonamo” (Gima Kohorona, October 15, 2011)
Inai sivarai “Ma Haida Inai Henia Kava Karana Lau Hadokoa” lalonai, tau ta be ia karaia moale karadia ia haidaua ena badina do oi dibaia.
“Baibel ese Mauri Ia Haidaua” (Gima Kohorona, February 1, 2010)
Do oi itaia sina ta be lauma dikadia edia siahu ia hahedinaraia muvi ta ia itaia, to abia hidi maorona ia karaia.
Demoni Edia Siahu Idia Hahedinaraia Muvi Ita Dadaraia (2:02)
Reana Inai Danu Oi Ura
Momo Edia Henanadai
Iehova Ena Witnes Taudia be Dahaka Baibel Stadi Kosi Idia Karaia?
Iehova Ena Witnes Taudia ese idia karaia Baibel stadi be davana lasi, bona oi ura henia Baibel oi gaukaralaia diba. Emu ruma bese eiava turadia oi boiria diba stadi lalonai idia helai totona.
