TƆM KƖKPƐLƖKƖTƲ 53
Lɩzɩ aleɣya wena akɛdɩɣnɩ Yehowa yɔ
Yehowa kɛ «Ɛsɔ koboyaɣ tʋ.» (1 Timootee 1:11) Ɛsɔɔlaa se ɖɩwɛɛ koboyaɣ taa nɛ ɖɩnɩɩ wezuu leleŋ. Ɛnaɣ se ɖɩñɩnɩɣ alɩwaatʋ nɛ ɖɩmʋʋ helim lɛ, ɛ-taa lakɩ leleŋ. Tɔm kɩkpɛlɩkɩtʋ tʋnɛ tɩ-taa ɖɩkaɣ naʋ ɛzɩma ɖɩpɩzɩɣ nɛ ɖɩlabɩnɩ helim mʋʋ alɩwaatʋ tʋmɩyɛ camɩyɛ nɛ pɩha-ɖʋ taa leleŋ nɛ pɩkɛdɩnɩ ɖɔɖɔ Yehowa yɔ.
1. Alɩwaatʋ ndʋ ɖɩlɩzɩɣ aleɣya wena ɖɩlakɩ yɔ, ɛbɛ yɔɔ pɩwɛɛ se ɖɩtɔzɩ?
Ɛbɛ ŋsɔɔlaa se ŋla alɩwaatʋ ndʋ ŋmʋʋ helim yɔ? Nabɛyɛ sɔɔlaa se pacaɣ ɖɩɣa, pakalɩ takayaɣ nakɛyɛ, pewelisi minziiki, pɔcɔnɩ filim nakʋyʋ yaa powolo intɛrnɛɛtɩ yɔɔ. Lalaa ñɔsɔɔlaa se pa nɛ pa-taabalaa pɛkpɛndɩ nɛ pala aleɣya naayɛ ɛzɩ pʋŋ taa yɛlʋʋ, lɩm yaʋ yaa game tɔʋ mbʋ yɔ. Paa ɛbɛ ɖɩsɔɔlɩ labʋ yɔ, pɩwɛɛ se ɖɩñaɣ pana nɛ pɩkɛnɩ mbʋ «pɩkɛdɩnɩ Kɩbaɣlʋ yɔ.» (Efɛɛzɩ mba 5:10) Tɔm tʋnɛ tɩcɛyaa mbʋ pʋyɔɔ yɔ aleɣya wena ɛyaa sɔɔlɩ labʋ yɔ a-taa sakɩyɛ sandɩɣ mbʋ Yehowa paɖɩɣ yɔ; ɛzɩ puuyaɣ lakasɩ, kʋzʋʋ kɩdɛkɛdʋʋ nɛ feziŋ kɩdɛkɛdɩŋ yaʋ mbʋ yɔ. (Kalɩ Keɣa 11:5.) Ɛbɛ pɩzɩɣ pɩsɩnɩ-ɖʋ nɛ ɖɩlɩzɩ aleɣya wena amʋnaa yɔ?
Ye ɖɩwɛnɩ taabalaa mba pɔsɔɔlɩ Yehowa yɔ, pɛwɛɣnɩ ɖoŋ kɩbaŋ ɖɔ-yɔɔ nɛ pasɩnɩ-ɖʋ nɛ ɖɩlɩzɩ aleɣya kɩbana. Ɛzɩ ɖɩtɛm naʋ tɔm kɩkpɛlɩkɩtʋ ndʋ tɩɖɛwa yɔ tɩ-taa yɔ, «weyi ɛ nɛ lɔŋsɩnɖaa pɔɖɔŋ yɔ, ɛkaɣ pɩsʋʋ lɔŋsɩnɖʋ.» Ɛlɛ ye ɛyʋ ɛɖʋʋ taabalɩyɛ nɛ ɛyaa mba paañaŋ Ɛsɔ paɣtʋ yɔ, «pɩkaɣ-ɩ kɔnʋʋ kaɖɛ.»—Aduwa 13:20.
2. Ɛbɛ yɔɔ pɩcɛyaa se ɖɩlabɩnɩ alɩwaatʋ tʋmɩyɛ camɩyɛ aleɣya nʋmɔʋ taa?
Paa aleɣya wena ɖɩlakɩ yɔ amʋnaa yɔ, pɩfɛyɩ se ɖiyele nɛ akɩlɩ-ɖʋ mʋʋ alɩwaatʋ. Pɩtɩkɛ mbʋ yɔ, ɖɩɩkaɣ hiɣu alɩwaatʋ sakɩyɛ nɛ ɖɩlabɩnɩ tʋma wena a-tɔm kɩlɩ cɛyʋʋ yɔ. Bibl seɣtiɣ-ɖʋ se ‘ɖɩlabɩnɩ ɖa-alɩwaatʋ tʋmɩyɛ camɩyɛ.’—Kalɩ Efɛɛzɩ mba 5:15, 16.
TAZƖ NƐ PILIMI
Tazɩ nɛ ŋna ɛzɩma ŋpɩzɩɣ nɛ ŋkpaɣ lɩmaɣza kɩbana aleɣya hɔɔlʋʋ taa yɔ.
3. Se aleɣya wena atɩmʋna yɔ
Ɛbɛ yɔɔ pɩwɛɛ se ɖɩlɩzɩ aleɣya wena ɖɩlakɩ yɔ camɩyɛ? Ɩcɔnɩ VIDEO, nɛ pʋwayɩ lɛ ɩtazɩ tɔm ndʋ tɩkɔŋ yɔ tɩ-taa.
-
Nɔɔ kʋɖʋmaɣ ŋga wɛ aleɣya wena caanaʋ taa Roma mba lakaɣ yɔ nɛ aleɣya wena ɛyaa lakɩ sɔnɔ yɔ a-hɛkʋ taa?
-
Ɛbɛ Danny kpɛlɩkɩ aleɣya yɔɔ?
Ɩkalɩ Roma mba 12:9, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma mayaɣ kanɛ kasɩɣnɩ-ŋ se ŋlɩzɩ aleɣya wena amʋnaa yɔ?
Ɛbɛ nɛ ɛbɛ Yehowa paɖɩɣ? Ɩkalɩ Aduwa 6:16, 17 nɛ Galaatii mba 5:19-21. Ɩkalɩɣ paa mayaɣ ŋga nɛ pɩtɛ lɛ, ɩtazɩ tɔm tʋnɛ tɩ-taa:
-
Wondu ndʋ tɩ-tɔm pɔyɔɔdɩ masɩ sɩnɛ sɩ-taa yɔ, tɩ-taa ndʋ ɖɩnaɣ aleɣya taa sɔnɔ ɖoŋ ɖoŋ?
Pʋcɔ nɛ ŋlɩzɩ aleɣya naayɛ lɛ . . .
Pɔzɩ ña-tɩ se:
-
Ɛbɛ? Mbʋ Yehowa paɖɩɣ yɔ pɩ-taa nabʋyʋ wɛ aleɣya ana a-taa?
-
Ɛzɩmtaa? Aleɣya ana aɖɩkɩ-m nʋmɔʋ se mantaapɩzɩ nɛ mala tʋma wena a-tɔm cɛyaa yɔ?
-
Anɩ? Aleɣya ana ayeki se mɔñɔtʋʋnɩ mba patɩsɔɔlɩ Yehowa yɔ ɖoŋ ɖoŋ?
Pɩsa nɛ ɖɩkandɩyɩ ɖa-tɩ yɔɔ lɛ, pɩpɔzʋʋ se ɖiposi ɖa-tɩ siŋŋ nɛ mbʋ pɩpɩzɩɣ nɛ pɩkɔnɩ-ɖʋ kaɖɛ yɔ. Pʋyɔɔ pɩwɛɛ se ɖiposi ɖa-tɩ nɛ aleɣya wena ɖɩnawa se apɩzɩɣ nɛ akɔnɩ-ɖʋ kaɖɛ yɔ.
4. Labɩnɩ ña-alɩwaatʋ tʋmɩyɛ camɩyɛ
Ɩcɔnɩ VIDEO, nɛ pʋwayɩ lɛ ɩtazɩ tɔm tʋnɛ tɩ-taa:
-
Koobu abalɩñɩnʋ weyi ɖɩna video taa yɔ, ɛtaalakɩ aleɣya wena atɩmʋna yɔ; ɛlɛ ɛkpakaɣ alɩwaatʋ sakɩyɛ nɛ ɛlakɩnɩ-yɛ. Kaɖɛ nɖɩ pɩkɔnɩ-ɩ?
Ɩkalɩ Filiipi mba 1:10, nɛ pʋwayɩ lɛ ɩtazɩ tɔm tʋnɛ tɩ-taa:
-
Ɛzɩma mayaɣ kanɛ kasɩɣnɩ-ɖʋ se ɖɩtɩlɩ alɩwaatʋ ɛzɩma pɩwɛɛ se ɖɩkpaɣ nɛ ɖɩlabɩnɩ aleɣya yɔ?
5. Lɩzɩ aleɣya wena amʋnaa yɔ
Paa aleɣya naayɛ ɩɩkɛdɩɣnɩ Yehowa yɔ, aleɣya wena amʋnaa nɛ apɩzɩɣ nɛ aha-ɖʋ taa leleŋ yɔ aɖɔ sakɩyɛ. Ɩkalɩ Eklezɩyasɩtɩ 8:15 nɛ Filiipi mba 4:8, nɛ pʋwayɩ lɛ, ɩtazɩ tɔm tʋnɛ tɩ-taa:
-
Aleɣya kɩbana wena ŋsɔɔlɩ labʋ?
Aleɣya wena amʋnaa nɛ ŋpɩzɩɣ nɛ ŋlabɩ-yɛ yɔ, aɖɔwa.
NABƐYƐ YƆƆDƲƲ SE: «Pɩtɩwɛɛkɩ pʋyʋ se mɔncɔnɩ aleɣya wena a-taa palakɩ puuyaɣ lakasɩ, kʋzʋʋ kɩdɛkɛdʋʋ yaa feziŋ kɩdɛkɛdɩŋ yaʋ lakasɩ ye ma-maɣmaɣ maalakɩ lakasɩ nzɩ yɔ.»
-
Suwe ŋpɩzɩɣ nɛ ŋcosi?
TOBI LƐ
Yehowa sɔɔlaa se ɖɩlɩzɩ aleɣya wena awɛ ɖeu yɔ nɛ ɖɩlabɩ-yɛ nɛ taa leleŋ.
Tɔm taa tazʋʋ
-
Aleɣya wena pɩwɛɛ se Krɩstʋ mba ise?
-
Ɛbɛ yɔɔ pɩwɛɛ se ɖɩɖʋ ɖa-tɩ kamasɩ pɩlɩɩnɩ alɩwaatʋ ndʋ ɖɩkpakɩɣ nɛ ɖɩlakɩnɩ aleɣya yɔ tɩ-yɔɔ?
-
Ɛbɛ yɔɔ ŋsɔɔlaa se ŋlɩzɩ aleɣya wena akɛdɩɣnɩ Yehowa yɔ?
WONDU LƐƐTƲ
Kalɩ nɛ ŋna weyi pɩwɛɛ se ɛlɩzɩ aleɣya wena ɖɩsɔɔlɩ labʋ yɔ.
Kalɩ nɛ ŋna ɛzɩma ŋpɩzɩɣ nɛ ŋkpaɣ lɩmaɣza pɩlɩɩnɩ aleɣya labʋ yɔɔ yɔ.
«Comment se détendre sainement?» (La Tour de Garde, 15 octobre 2011)
Kalɩ tɔm ñʋʋ «J’ai même surmonté mes préjugés» nɛ ŋna mbʋ pʋyɔɔ abalʋ nɔɔyʋ lɛɣzɩ aleɣya wena ɛlakaɣ yɔ.
«La Bible transforme des vies» (La Tour de Garde, 1er février 2010)
Cɔnɩ video nɛ ŋna ɛzɩma ɖoyo nɔɔyʋ kpaɣ lɩmaɣza camɩyɛ pɩlɩɩnɩ aleɣya wena a-taa palakɩ feziŋ kɩdɛkɛdɩŋ yaʋ lakasɩ yɔ.
Se aleɣya wena a-taa wɛ feziŋ kɩdɛkɛdɩŋ yaʋ lakasɩ yɔ (2:02)
Kalɩ ɖɔɖɔ....
TƆM NDƲ ƐYAA PƆZƲƲ ÐOŊ ÐOŊ ÐƆ-YƆƆ YƆ
Ɛbɛ Bibl kpɛlɩkʋʋ kɛnaa?
Ŋpɩzɩɣ ŋlabɩnɩ tʋmɩyɛ paa Bibl ŋgʋ alɩwaatʋ ndʋ ña nɛ Yehowa Aseɣɖe Tɩnaa ɩkpɛlɩkɩɣ Bibl yɔ. Ŋpɩzɩɣ ŋyaa ñɔ-hɔʋ taa mba tɩŋa yaa ña-taabalaa mba ŋsɔɔlaa yɔ se pɔkɔɔ nɛ ña nɛ wɛ ɩkpɛlɩkɩ Bibl.
