KALABO 53

Da Ɣɛna Wõini De Ɣaa-Wo Bo De Ɣaa-Ɓaa E Ɣɛ Ga Jehova Yii-Ma

TƐ GÁ

Jehova ɣa ga ‘kuuzu nɛɛ Ɣala.’ (1 Temete 1:11) E wõini kuuzu nɛɛ ɣɛ de ya de yii-ma ɣɛ da ŋeteai zu. Tɔ ga zii-ma ʋaa ani da siɛ siɣina ba ga de loowo, de yii-ma ɣɛ. Kalabogi nii zu da vaazu wɛlɛzu velei da yii-ma ɣɛɛ la siɛgi nii ma da siɣi ba ga de loowo—na ɣa ɣɛɛna de Jehova yii-mai ɣɛ.

1. Zɛɓɛi manɛɛ de pɛɛ ɣibɛ ani da ɣɛna deʋe wosu ga de ɣaa-wo bo ɔɔ de zii-ma-ɣɛɛ wo?

Zɛɓɛi ya ɣɛ wõini e kɛ ani ya ɣɛna loowosu. Nu taniga ta ɣɛ wõini ta ɣɛna loowosu te yɛ ta vɛlɛi la—tiɛ kɔlɔ lodo, tiɛ wuito gui taniga ma, tiɛ wɛlɛ ʋilio ba ɔɔ te li fãga wɔlɔi ma. Nu taniga wɔnɔ ta wõi ga ta te vaitiɛ te yɛ kii-ma te li ga te lafe ɔɔ te ɣaa-wo taniga wo. Nii nɛpɛgi da da ɣisu ga de kɛ ga de yii-ma ɣɛ manɛɛ e “ɣɛ ga de mailiɣii nɛɛ-bɛ ʋaa.” (Ɛfɛsɔitiɛ 5:10) Tɔ ga faa ɓi ga de fai nii ɣaa ɣa ɓɔvɛlaale ɣaa-wo tamaa zaa numaa taniga ta bo ɛ lɛ ga Jehova yii-la ʋaa. Ɣaa-wogi nii taniga zu, ŋapi wɔɔ ʋaa ɣaa ɣɛ su, wɛ̃ɛ-ziɛ bo faa ɔɔ sale yeke kɛɛ ʋaa. (Psalm 11:5 lodo.) Zɛɓɛi ya ɓɔ de va ga de deʋe vagɔ wo e vile velei va da zii-ma-ɣɛɛ wo la?

Taitiɛ wõila te ya Jehova ʋaa ma da te ɣɛɛna ga da ziɛ-pulua ta ɓɔ de va ga de kwɛ̃ɛ ga velei da zii-ma-ɣɛɛ wo la ga e Jehova yii-la. E ɣɛ velei de maa wolia la kalabo 52 zu, “nui ta kele-ɣele nui ta ziɛ, towa ɣele-ɣele.” Kɛ ani taitiɛ da te ɣɛ ga da ziɛ-pulua tɛ lɛ wõini ga Jehova na tɔgitiɛ da “zii zuuli maa zɔlɔwo.”—Proverbs 13:20.

2. Zɛɓɛi e kɛɛ e ga faa ɓi ga de kwɛ̃ɛ siɛ tiigoi da siɣi ba ga de zii-ma-ɣɛɛ wo?

Ani ɓalaa zii-ma-ɣɛɛ de bosu tɔ ga Jehova yii-ma ʋaa, manɛɛ de kwɛ̃ɛ siɛ tiigoi da siɣi ba ga de zii-ma-ɣɛɛ na wo. Ani dɛ lɛ na ɣɛɛni siɛ tamaa lɛ ɣɛɛ de ya ga dɔ faa ɓigitiɛ ɣɛ. Gala Kɔlɔi de lɛnɛgɛ ga “a ɣaa ɓaa ga pelei ɣaazɔ zɔi wa zoo da wo kɛ siɛgi nii ʋaa ma.”—Ɛfɛsɔitiɛ 5:15, 16 lodo.

FAA LAMAA MAA WOLI

Faa maa woli e vile velei va ya leve la e deʋe vagɔ wo e vile zii-ma-ɣɛɛ va ya bo.

3. Mɛlɛ ɣaa-wo yowũ wo

Zɛɓɛi e kɛɛ manɛɛ de kwɛ̃ɛ ɣaa-wogi nii mazii da bo? ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Ɣaa-Wo Sɛɓɛi Manɛɛ Gè Bo? (4:39)

Ɣaa-wogi nii numaa tɔ bo wɔlɔ-wɔlɔi zu Loomɛ yui zu, kulovɛ ɣɛ le ga ɣaa-wogi niitiɛ zaa numaa ta bo?
Ʋiliogi nii zu zɛɓɛi Danny maa wolini e vile ɣaa-wo faa va?

A Loomɛitiɛ 12:9 Lodo, wo gaa-zaɣa-kɛɛ nii ɣaa wote:

Gala goi nii ɣa ɓɔ e va ɣɛ le e kwɛ̃ɛ ɣaa-wogi ya bo?

Faa taniga ta ga zɛɓɛ Jehova lɛ wõini la? A Proverbs 6:16, 17 ɓɔga Galeesiaitiɛ 5:19-21 lodo. Wa ma maa wũgi lodona, wo gaa-zaɣa-kɛɛ nii ɣaa wote. Wa fele kelei lodona wɔnɔ, wo gaa-zaɣa-kɛɛ nii ɣaa wote:

Niitiɛ Gala goi niitiɛ te yɛpɛi e vile ba ma zɛɓɛ ɣa zaa numaa te wõini ga kɛɛ ʋai?

Zɛɓɛi ya ɓɔ de va ga de deʋe vagɔ wo e vile ɣaa-wogi nii va da bo?

Ɣi-gaa-ziɛ niitiɛ ma:

Faa nɛpɛ ka ɣaa-wogi ɓɔɔ zu ga Jehova lɛ wõini la?
E ɣisu tɔ kɛɛzu faa ɓigitiɛ manɛɛ e kɛ ɛ lɛ zoosu ɔ te ɣɛ?
E ɣisu tɔ kɛɛzu yiɛ lɔtɔ niitiɛ va wõila lɛ te ya Jehova ʋaa ma?

Tɔ ga faa vagɔ ga de maa wooza niitiɛ va ta da ziɛ-pului zu ŋala-ŋala de yɔɔzu da Jehova. Na ɣa e kɛɛ maa lɛ nɛɛni dɔɔ ɣaa-wogi nii ta nɛpɛ bo de kwɛ̃ni ga ɛ lɛ vani de ʋaa ma

4. Faa vagɔ ɣɛ ga siɛgi e e ya

ƲILIOGI nii lɛ ga. Yá wolona, wo gaa-zaɣa-kɛɛ niitiɛ ɣaa wote.

ƲILIOGI: Zɛɓɛi Ɓɔɔ Ya Siɛ Tamaa Ziɣi E Ya? (2:45)

Ʋiliogi nii zu, velei ɓalaa de ɣaa yɔwɔ̃i lɛ ɣɛni wɛlɛzu ŋɛni yowũ va, kɛ e faa vɛɛni ba ɣɛ le?

A Felepaitiɛ 1:10 lodo, wo gaa-zaɣa-kɛɛ nii ɣaa wote:

Gala goi nii ɣa ɓɔ de va ɣɛ le ga de kwɛ̃ɛ siɛ tiigoi da siɣi ba ga de ɣaa-wo?

5. Ɣaa-wogi ɔɔ zii-ma-ɣɛɛ da wõi ga de bo e ɣɛ ga ma vagɔ

Velei ɓalaa ɣaa-wogi taniga te na tɛ lɛ ga Jehova yii-ma ʋaa, da zoo dɛ de ɣaa-wo taniga wo e ga zii-ma ʋaa. A Ecclesiastes 8:15 ɓɔga Felepaitiɛ 4:8 lodo, wo gaa-zaɣa-kɛɛ nii ɣaa wote: