PƐ MƐDÃPIA 53
Geliwɔ̃ Kɛɛ Lɛ E Zihova Zodaa Kũ I Zɔ̃ɔ̃ Ka
Zihova lɛ “Wala geliazɛ ka.” (1 Temɔte 1:11, NWT) Laa naa ko kɛ gelizɛ ko kɛɓe yi. Lɛɛ a zoda ye kɔaa luo do si kɔaa ko fĩĩdɔ to kɔaa geli kɛɛ ka. Koo lo zi lɛ ko bɛi ko fĩĩdɔ luo daa yɛɓo pie kɛ ko a nyɔnɔ si ko zoda zi pie, ɛ̃ɛ̃ lɛ e Zihova bɛ̃ɛ̃ zoda nɔ kilia gɛ̃ɛ pɛ mɛdãpia e kea yi.
1. Mɛɛ wɔ̃ lɛ laa mɔ ko ko yɛlɛtaa yi ye kɔaa kɛ ko zɔ̃ɔ̃ sipia geliwɔ̃ kɛɛ kaa ka?
Mɛɛ wɔ̃ lɛ i naa a kɛɛ ka, ye ɓaa kɛ i fĩĩdɔpiaa ka? Mia do oo naa o wa fĩĩdɔ luoa kɛ o pie kalemɔ waa kii gee, waa o too dɔ tã mɔ, waa vilo gɛ̃, ɛ̃ɛ̃ waa lo ɓɛɛla kɛpia lɛ e fããlaa mɔ. Mia bunuzɛ bɛ̃ɛ̃ oo naa wa o ɓɛɛmia o kɛ o kie ba, waa lo dɔnɔkala soo taa si, yiila kɛɛa si, ɛ̃ɛ̃ waa bɔɔ mɛ. Geliwɔ̃ nɔɔfe lɛ ko kũ ko zɔ̃ɔ̃ kaa, laa mɔ e kɛ “wɔ̃ lɛ e ko Daami zodaa” ka. (Ifisɔ̃ 5:10) Lɛ kpanazɛ ko wɔ̃ e kea yima, ɓii geliwɔ̃ lɛ mia o kũ o zɔ̃ɔ̃ kaa, lɛ wɔ̃ ni lɛ Zihova lɛɛ́ naa kaa ka, a do lɛ e kelɛ gana wɔ̃, nɛi wa manaazɛɛ, ɛ̃ɛ̃ gɛɛyɔɔ kɛwɔ̃. (Sãã 11:5 gee.) Mɛ e lo gbũu ko mɔ ko wɔ̃ lɛ lɛ kpeĩa kũ ko zɔ̃ɔ̃ ka ko geliwɔ̃ kɛɛ yi?
Ye kɔaa ɓɛɛla kɛ mia lɛ o lɔkɛ Zihova kaa piea, oo bɛi gbũu ko mɔ ko wɔ̃ lɛ lɛ kpeĩa kũ ko zɔ̃ɔ̃ ka ko geliwɔ̃ kɛɛ yi. Lɛ zi kɔa mɛdã a ka pɛ mɛdãpia ye e diea yia, “mi lɛ wa gikã mi o taakiepie kɛɛ lɛɛ kɛ gikã mi ka.” Kɛɛ ye kɔaa kɛ ɓɛɛla kɛpia mia lɛ oó lɔkɛ Wala zi yiikɔ kaa piea, “lɛɛ lo kɛɛ yɔɔ” ko mɔ.—Pɔlɔvɛɛ 13:20.
2. Mɛ e kɛ lɛ lɛ kpanazɛ ko ko yɛlɛ kɛ luo lɛ ko si ko geli kɛ a kaa pie?
E kɛ bɛ̃ɛ̃ lɛ geliwɔ̃ ko kũ ko zɔ̃ɔ̃ kaa ye wa yɔɔ, laa mɔ ko ko yɛlɛ kɛ ko die pie yekɛ ko luo kaa mɔ. Ye ye wa kilia, luo lɛɛ́ lo kɛɛ ko kɛlɛ ko wɔ̃ lɛ lɛ kpanazɛɛ kɛ a ka. Baaboa laa gee ko lɛɛ, “ka yɛɓo yie kɛ luo lɛ e ka kɛlɛɛ pie.”—Ifisɔ̃ 5:15, 16 gee.
A PIE FOO
Zi i bɛi wɔ̃ kpeĩ yaá i ge ɓa kɛ e gbɛ̃a ɓa geliwɔ̃ kɛɛ mɔɔ mɛdã.
3. I kɔɓo geliwɔ̃ yɔɔ kɛɛ ba
Mɛ e kɛ lɛ laa mɔ ko ko zɔ̃ɔ̃ si geliwɔ̃ kɛɛ ɓa gikã ka? Ko VILOA gɛ̃, ɛ̃ɛ̃ kɛ ko wɛĩlɔɔ ni lɛ o to a piea yiɓo.
-
Ga-gele lɛ mia o kɛ mɔ a gɔ̃pia Woloua, zi kpɛɛ lɛ a loo laa geliwɔ̃ o kɛ pɛnɛɛ pie?
-
Viloa yia, mɛɛ wɔ̃ lɛ Dɛnɛ a mɛdã e gbɛ̃a geliwɔ̃ kɛɛ mɔ?
Ko Woloma 12:9 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ a lonipia e kea e bɛi gbũua i mɔ kɛɛ i geliwɔ̃ kpeĩ kũ i zɔ̃ɔ̃ ka?
Mɛɛ wɔ̃ ni lɛ Zihova laá naa ka? Ko Pɔlɔvɛɛ 6:16, 17 wa Gɛlesia 5:19-21 gee. Ye kɔaa nyɛ Baabo wekpo nia geepia doo dooa, koo lo wɛĩlɔɔ e kea yiɓoo:
-
Wɔ̃ ni lɛ wa gee a lonipia nia yia ye kpɛɛ lɛ ɓa gɛ̃ geliwɔ̃ yi pɛnɛɛ?
Zi i bɛi i zɔ̃ɔ̃ siia geliwɔ̃ kɛɛ yi gikã kaa
I yɛlɛtaa wɛĩlɔɔ e kea yi:
-
Mɛɛ wɔ̃? Kea wɔ̃ do lɛ geliwɔ̃ kɛɛ e kea yi lɛ Zihova lɛɛ́ naa a kaa?
-
Luo kpɛɛ? Kea lɛɛ luo lɛ laa mɔ m wɔ̃ kpanazɛ kɛ a kaa si?
-
Deĩ? Kea laa kɛ maa gãã mia lɛ oó lɔkɛ Zihova kaa ka kɔɛ?
Ye wa sɛ ko sɔɔ goo yɔɔ la. Pɛ e kɛ lɛ laa mɔ ko ko yiɓo geliwɔ̃ nɔɔfe lɛ ye wa sɛɛ mɔ balea lɛ
4. Yɛɓo yie kɛ luo e i kɛlɛɛ pie
Ko VILOA gɛ̃, ɛ̃ɛ̃ kɛ ko wɛĩlɔɔ e toa piea yiɓo.
-
Ye bɛ̃ɛ̃ lɛ pɛ ko leegea e kɛ a gɛ̃pia viloa yia lɛɛ́ gbaa kɛ yɔɔ, zi kpɛɛ lɛ la fĩĩdɔ luoa da yɛɓo pie kɔɔ pie e toa mɔ?
Ko Felepĩã 1:10 gee, ɛ̃ɛ̃ kɛ ko wɛĩlɔɔ e kea yiɓo:
-
Zi kpɛɛ lɛ Baabo lonipia e kea e bɛi gbũua ko mɔ kɛ ko luo lɛ ko bɛi a sii geliwɔ̃ kɛɛ wɛĩa dɔ?
5. Geliwɔ̃ lɛ lɛ kpeĩa kũ i zɔ̃ɔ̃ ka
Ye bɛ̃ɛ̃ lɛ geliwɔ̃ do lɛ yi lɛ lɛɛ́ Zihova zodaa, geliwɔ̃ bunuzɛ lɛ ɓe lɛ e a zodaa. Ko Ikilisiase 8:15 wa Felepĩã 4:8 gee, ɛ̃ɛ̃ kɛ ko wɛĩlɔɔ e kea yiɓo:
-
Geliwɔ̃ kpeĩ kpɛɛ lɛ i naa ka?
Ii bɛi geli wa kpɛɛyɛ wɔ̃ lɛ lɛ kpeĩa nyɔnɔ sii
MIA DO OO GEE: “Geliwɔ̃ kɛɛ lɛ gana wɔ̃, nɛi wa manaazɛɛ, ɛ̃ɛ̃ gɛɛyɔɔ kɛwɔ̃ laa yia gɛ̃ɛ wa yɔɔ, ye nɔ ma wá o do nɔɔfe kɛpiaa ka.”
-
Ii loa gee kpɛ?
WƆ̃Ɔ WŨ
Zihova laa naa ko geliwɔ̃ lɛ lɛ kpeĩa kũ ko zɔ̃ɔ̃ ka ɛ̃ɛ̃ ko nyɔnɔ si.
Zovuo Wɔ̃
-
Geliwɔ̃ kpɛɛ lɛ laa mɔ Tokɛlɛipiemia o o yiɓo a mɔ?
-
Mɛ e kɛ lɛ laa mɔ ko ko yɛlɛ kɛ ko die pie e gbɛ̃a luo lɛ ko si kɔaa geli kɛaa mɔ?
-
Mɛ e kɛ lɛ ɓa naa i geliwɔ̃ lɛ e Zihova zodaa kũ i zɔ̃ɔ̃ ka?
I NYIƐ KPƆ
Mi laa mɔ e ko zɔ̃ɔ̃ si geliwɔ̃ yia gɛ̃.
“Kea Zihova La Kelavɔ Oó Wee Vilo wa Kii ɛ̃ɛ̃ Tã Do Mɔɔ Wɔ̃ Mɔ?” (Lɛ jw.org la)
Zi i bɛi wɔ̃ kpeĩ yaa i ge e gbɛ̃a geliwɔ̃ kɛɛ wa i fĩĩdɔ luo mɔɔ gɛ̃.
“Kea Ɓa Geliwɔ̃ Kɛɛ Lɛɛ Gbũ I Mɔ?” (Wɔ̃lagɛ̃kamaa, Walawala 15, 2011)
Pɛ e kɛ lɛ gɔ̃ doo e geliwɔ̃ lɛ a kũ e zɔ̃ɔ̃ kaa mɛvɔɔ gɛ̃ wɔ̃ e kea yi, “M M Kɔɓo Gbaa Miaɓomiaba Kɛɛ Yi.”
“Baaboa Lɛɛ Mia Wa Kɛɓe Mɛvɔɔ” (Wɔ̃lagɛ̃kamaa, Vuulie 1, 2010)
Zi lɛ nɛyelee doo e gikã kpeĩ kɛ a ka e gbɛ̃a geliwɔ̃ kɛɛ lɛ gɛɛyɔɔ kɛwɔ̃ lɛ a yia mɔɔ gɛ̃.
