ƐZUKOALƐDEƐ 53
Kpa Anyelielɛ Ninyɛne Mɔɔ Sɔ Gyihova Anye La
Gyihova le “anyelielɛ Nyamenle.” (1 Timote 1:11) Ɔkulo kɛ yɛ nye die wɔ ɛbɛlabɔlɛ nu. Saa yɛye mekɛ yɛsie ahane yɛfa yɛdie yɛ menle yɛfi gyima nwo a ɔmaa ɔ nye die. Wɔ ɛzukoalɛdeɛ ɛhye anu, yɛbanwu kɛzi yɛbahola yɛava mekɛ mɔɔ yɛfa yɛdie yɛ menle la yɛayɛ ninyɛne mɔɔ maa yɛ nye die na yɛ kunlu dwo yɛ nwo na eza ɔsɔ Gyihova anye la.
1. Saa yɛlɛkpa anyelielɛ ninyɛne a duzu a ɔwɔ kɛ yɛkakye a?
Duzu a ɛyɛ ɛfa ɛdielie ɛ nye a? Bie mɔ kulo kɛ bɛfa bɛ mekɛ ne bɛtɛnla sua nu koonwu—bɛkenga buluku, bɛtie edwɛne, bɛnea vidio anzɛɛ bɛkɔ Yintanɛte zo. Bie mɔ kulo kɛ bɛ nee bɛ gɔnwo mɔ bɔ nu yɛ debie—bɛkɔ akpɔsa, bɛkɔbia azule anzɛɛ bɛdi nwɔhoa bie. Kɛzi yɛkulo ye biala la, ɔwɔ kɛ yɛnea kɛ anyelielɛ ninyɛne mɔɔ yɛkpa la “sɔ Awulae anye.” (Ɛfɛsɛsema 5:10) Ɔhyia kɛ yɛnwu ɛhye ɔluakɛ ninyɛne mɔɔ Gyihova kyi, le kɛ basabasayɛlɛ, adwɔmane ɛbɛla anzɛɛ sunsum ɛtane nyɛleɛ wɔ anyelielɛ ninyɛne dɔɔnwo mɔɔ menli fa dielie bɛ nye la anu. (Kenga Edwɛne 11:5.) Duzu a baboa yɛ yeamaa yɛakpa anyelielɛ ninyɛne nrɛlɛbɛ nu a?
Saa yɛfa menli mɔɔ kulo Gyihova la agɔnwolɛ a, bɛbamaa yɛanyia subane kpalɛ na yɛakpa anyelielɛ ninyɛne mgbalɛ. Kɛ mɔɔ yɛlimoa yɛzukoa la, “sonla mɔɔ nee nrɛlɛbɛvolɛ dua la banwu nrɛlɛbɛ.” Noko saa yɛ nee menli mɔɔ ɛngulo Gyihova ngyinlazo ne mɔ la tu a, “edwɛkɛ bado” yɛ.—Mrɛlɛbulɛ 13:20.
2. Duzu ati a ɔhyia kɛ yɛnea mekɛ dodo mɔɔ yɛfa yɛdielie yɛ nye la ɛ?
Saa anyelielɛ ninyɛne mɔɔ yɛkpa la le kpalɛ bɔbɔ a, ɔwɔ kɛ yɛnea boɛ na yɛanzɛkye mekɛ dɔɔnwo wɔ nwolɛ. Tɛ ye zɔhane a, yɛnrɛnyia mekɛ dɔɔnwo yɛnrɛyɛ ninyɛne mɔɔ hyia kpalɛ la. Baebolo ne ka kile yɛ kɛ ‘yɛva yɛ mekɛ yɛli gyima kpalɛ.’—Kenga Ɛfɛsɛsema 5:15, 16.
SUKOA DƆƆNWO
Sukoa kɛzi ɛbahola wɔazi anyelielɛ ninyɛne nwo kpɔkɛ kpalɛ la.
3. Kpo anyelielɛ ninyɛne mɔɔ ɛnle kpalɛ la
Duzu ati a ɔwɔ kɛ yɛkpa anyelielɛ ninyɛne nrɛlɛbɛ nu a? Ye VIDIO ne, na akee bɛzuzu kpuya ɛhye mɔ anwo.
-
Kɛzi tete Wulomu nwɔhoalilɛ ne mɔ nee anyelielɛ ninyɛne bie mɔ mɔɔ wɔ ɛkɛ ɛnɛ la le ko ɛ?
-
Wɔ vidio ne anu, duzu a Danny nwunle ye wɔ anyelielɛ ninyɛne nwo a?
Kenga Wulomuma 12:9, na akee bɛzuzu kpuya ɛhye anwo:
-
Kɛzi tɛkese ɛhye baboa wɔ yeamaa wɔava debie kpalɛ wɔalielie ɛ nye ɛ?
Ninyɛne mɔɔ Gyihova kyi la bie mɔ a le boni? Kenga Mrɛlɛbulɛ 6:16, 17 yɛɛ Galeehyeama 5:19-21. Ɛkenga tɛkese ko biala ɛwie a, bɛzuzu kpuya ɛhye anwo:
-
Ninyɛne mɔɔ bɛha nwolɛ edwɛkɛ wɔ tɛkese ɛhye mɔ anu la boni a ɛbu zo wɔ anyelielɛ ninyɛne mɔɔ wɔ ɛkɛ ɛnɛ la anu a?
Kɛzi ɛbakpa anyelielɛ ninyɛne nrɛlɛbɛ nu la
Biza ɛ nwo kpuya ɛhye mɔ:
-
Duzu ɔ? Asoo debie mɔɔ Gyihova kyi la wɔ nu?
-
Mekɛ boni? Asoo ɔsɛkye mekɛ mɔɔ mefa meyɛ ninyɛne mɔɔ anwo hyia la?
-
Nwane mɔ ɔ? Asoo ɔmaa mebikye menli mɔɔ ɛngulo Gyihova la anzɛɛ ɔmaa me nee bɛ tu?
Ɔle kpalɛ kɛ yɛtwe yɛ nwo yɛfi esiane nwo bɔkɔɔ. Ɔti ɔwɔ kɛ yɛtwe yɛ nwo yɛfi anyelielɛ debie biala mɔɔ yɛnea a ɔnrɛboa yɛ la anwo
4. Fa wɔ mekɛ di gyima nrɛlɛbɛ nu
Ye VIDIO ne, na akee bɛzuzu kpuya ɛhye anwo.
-
Ɛnee adiema nrenyia ne mɔɔ wɔ vidio ne anu la ɛnnea debie ɛtane ɛdeɛ, noko ɛnee ye ngyegyelɛ a le boni?
Kenga Felepaema 1:10, na akee bɛzuzu kpuya ɛhye anwo:
-
Kɛzi tɛkese ɛhye bahola aboa yɛ yeamaa yɛanwu mekɛ dodo mɔɔ ɔwɔ kɛ yɛfa yɛdielie yɛ nye la ɛ?
5. Kpa anyelielɛ ninyɛne mɔɔ le kpalɛ la
Gyihova anye ɛnlie anyelielɛ ninyɛne bie mɔ anwo, noko ninyɛne dɔɔnwo wɔ ɛkɛ mɔɔ sɔ ɔ nye a. Kenga Nolobɔvo 8:15 yɛɛ Felepaema 4:8, na akee bɛzuzu kpuya ɛhye anwo:
-
Debie kpalɛ boni a ɛfa ɛdielie ɛ nye a?
Ɛbahola wɔava debie kpalɛ wɔalielie ɛ nye
BIE MƆ KA KƐ: “Ɔnle ɛtane kɛ mebava ninyɛne mɔɔ basabasayɛlɛ, ɛbɛlatane anzɛɛ sunsum ɛtane nyɛleɛ wɔ nu la mealielie me nye, mɔɔ hyia la a le kɛ menyɛ ninyɛne zɔhane.”
-
Duzu a ɛbaha a?
EDWƐKƐ TITILI
Gyihova kpondɛ kɛ yɛfa debie kpalɛ yɛdielie yɛ nye.
Ndinu
-
Anyelielɛ ninyɛne boni mɔ a ɔwɔ kɛ Kilisienema kpo a?
-
Duzu ati a ɔwɔ kɛ yɛnea boɛ wɔ mekɛ dodo mɔɔ yɛfa yɛdielie yɛ nye la anwo a?
-
Duzu ati a ɛkulo kɛ ɛkpa anyelielɛ ninyɛne mɔɔ sɔ Gyihova anye a?
KPONDƐ DƆƆNWO
Sukoa ahenle mɔɔ ɔle ye gyima kɛ ɔnea ninyɛne mɔɔ ɛfa ɛdielie ɛ nye la anwo debie.
“Asoo Gyihova Alasevolɛ Tua Vidio, Mbuluku, Anzɛɛ Edwɛne Bie Mɔ?” (Edwɛkɛ mɔɔ wɔ jw.org azo)
Nea kɛzi ɛbahola wɔazi anyelielɛ ninyɛne nwo kpɔkɛ kpalɛ la.
“Asoo Nvasoɛ Wɔ Ninyɛne Mɔɔ Ɛfa Ɛdielie Ɛ Nye La Azo?” (Ɛzinzalɛ Arane, October 1, 2011)
Wɔ anwubielɛ ne mɔɔ se “Mengolale Menlile Menli Nwo Adwenletane Zo Konim” la anu, nea deɛmɔti nrenyia bie gyakyile ninyɛne mɔɔ ɛnee ɔfa ɔdielie ɔ nye la.
Nea kɛzi mame bie zile anyelielɛ ninyɛne mɔɔ sunsum ɛtane nwo edwɛkɛ wɔ nu la anwo kpɔkɛ kpalɛ la.
Koati Anyelielɛ Ninyɛne Mɔɔ Sunsum Ɛtane Nyɛleɛ Wɔ Nu (2:02)
Bie A Eza Ɛ Nye Balie
KPUYA MƆƆ MENLI TA BIZA
Baebolo Ɛzukoalɛ Nwo Ngyehyɛleɛ Boni A Gyihova Alasevolɛ Yɛ A?
Wɔ Baebolo ɛzukoalɛ nwo ngyehyɛleɛ mɔɔ Gyihova Alasevolɛ ɛyɛ mɔɔ ɛndua ɛhwee la anu, ɛbahola wɔava Baebolo ngilebɛbo mɔɔ ɛ nye die nwo wɔali gyima. Saa ɛkulo kɛ ɛto ɛ sa ɛfɛlɛ wɔ abusua ne yɛɛ ɛ gɔnwo mɔ a, ɛbahola wɔayɛ zɔ.
