LESONA 53
Filifili Faafiafiaga e Faafiafiaina ai Ieova
O Ieova o “le Atua fiafia.” (1 Timoteo 1:11) E finagalo o ia ina ia tatou fiafia ma olioli i le olaga. E fiafia lona finagalo pe a tatou faatulaga se taimi e mālōlō ai mai i galuega, ina ia fiafia ai. I lenei lesona, o le a tatou iloa ai pe faapefea ona tatou faaaogā taimi o mālōlōga, ina ia maua ai le fiafia ma le faamalieina, ae i le taimi e tasi o loo faafiafiaina ai Ieova.
1. O le ā e tatau ona tatou manatua pe a filifilia faafiafiaga?
O ā mea e te fiafia e fai i ou taimi avanoa? O nisi e fiafia e faaaogā o latou taimi avanoa e mālōlō ai i le fale e faitau ai se tusi, faalogologo ai i musika, matamata se ata, pe alu ai i luga o le Initaneti. Ae o nisi e fiafia e faaaogā lenā taimi ma a latou uō, e ō ai e aʻe mauga, tāʻeele i le sami, pe fai foʻi se taaloga. E tusa lava po o ā faafiafiaga e tatou te filifilia, ae ia faamautinoa o ni faafiafiaga “e fiafia i ai le Alii.” (Efeso 5:10) E tāua tele lo tatou malamalama i lenei mataupu, ona o le tele o faafiafiaga lauiloa, o loo aofia ai mea e inosia e Ieova e pei o faiga sauā, o amioga lē mamā taufeusuaʻiga, po o faiga faaagaga. (Faitau le Salamo 11:5.) O le ā la e fesoasoani iā i tatou e faia ai filifiliga atamai i faafiafiaga?
Pe a tatou filifilia ni uō e alolofa iā Ieova, o le a iai ni aafiaga iā i tatou ma a tatou filifiliga i faafiafiaga. E pei ona tatou aʻoaʻoina i se lesona ua mavae, “o lē e savali ma tagata atamamai, e atamai ai o ia.” Ae o lē e faifaimea faatasi e lē aunoa ma tagata e lē ola i tapulaa a le Atua, “e leaga ai lava o ia.”—Faataoto 13:20.
2. Aiseā e tāua ai le pulea o le taimi e faaalu i faafiafiaga?
E tusa lava pe tatou te filifilia ni faafiafiaga talafeagai, ae tatau ona faaeteete i le tele o le taimi e faaalu ai. Auā pe afai tatou te lē faaeteete, o le a lē lava ai le taimi mo isi mea e sili ona tāua. Ua fautua mai le Tusi Paia ina ia “faaaogā tatau [o tatou] taimi.”—Faitau le Efeso 5:15, 16.
SAʻILIʻILI ATILI
Mātau pe faapefea ona e faia filifiliga lelei e faatatau i faafiafiaga.
3. ʻAlofia faafiafiaga lē talafeagai
Aiseā e tatau ai ona filifili ma le faaeteete a tatou faafiafiaga? Faaali le VITIŌ, ona talanoa lea i fesili nei:
-
E faapefea ona tutusa taaloga sauā anamua ma faafiafiaga i aso nei?
-
I le vitiō, o le ā na aʻoaʻoina e Danny e faatatau i faafiafiaga?
Faitau le Roma 12:9, ona talanoa lea i le fesili lenei:
-
E faapefea i lenei mau ona aafia ai lau filifiliga i faafiafiaga?
O ā nisi mea e inosia e Ieova? Faitau le Faataoto 6:16, 17 ma le Kalatia 5:19-21. Ia faitau mau taʻitasi, ma talanoa i le fesili lenei:
-
O ā mea o loo taʻua i nei fuaiupu ua taatele i faafiafiaga i aso nei?
Auala e filifili ai ma le atamai faafiafiaga
Ia fesili ifo:
-
O le ā? Po o aofia ai i lenei faafiafiaga se mea e inosia e Ieova?
-
O le ā le taimi? Po o aafia ai le taimi e tatau ona faaalu i isi mea e sili ona tāua?
-
O ai? Po o oʻu vavalalata atu ai ma faaalu le tele o le taimi ma tagata e lē alolofa iā Ieova?
E sili atu ona malupuipuia le taumamao ese mai i lamatiaga. O le māfuaaga lenā e tatau ai ona tatou taumamao mai i faafiafiaga, e tatou te ono manatu e lē lelei mo i tatou
4. Faaaogā tatau lou taimi
Faaali le VITIŌ, ona talanoa lea i le fesili lenei:
-
I le vitiō, e ui e leʻi matamata le uso i ni faafiafiaga lē talafeagai, ae na faapefea ona aafia o ia i le auala na faaaogā ai ona taimi avanoa?
Faitau le Filipi 1:10, ona talanoa lea i le fesili lenei:
-
E faapefea ona fesoasoani lenei mau iā i tatou, e filifili ai le tele o le taimi e faaalu i tafaoga ma mālōlōga?
5. Filifili faafiafiaga talafeagai
E ui o isi faafiafiaga e lē faafiafiaina ai Ieova, ae o loo tele pea isi mea e mafai ona tatou olioli ai, ma faafiafiaina ai o ia. Faitau le Failauga 8:15 ma le Filipi 4:8, ona talanoa lea i le fesili lenei:
-
O ā faafiafiaga talafeagai e te fiafia i ai?
UA FAAPEA MAI NISI: “E lē afāina faafiafiaga o loo iai faiga sauā, amioga lē mamā, po o faiga faaagaga, pe afai ou te lē o faia na mea.”
-
O le ā sou manatu?
AOTELEGA
E finagalo Ieova ia tatou filifilia faafiafiaga talafeagai, ma maua ai le fiafia.
Fesili Autalu
-
O ā faafiafiaga e tatau ona ʻalofia e Kerisiano?
-
Aiseā e tatau ai ona tatou faaeteete i le tele o le taimi e faaalu i faafiafiaga?
-
Aiseā e te manaʻo ai e filifilia faafiafiaga e faafiafiaina ai Ieova?
MANATU FAAOPOOPO
Iloilo po o ai e tatau ona filifilia a tatou faafiafiaga.
“Pe e Iai ni Ata Vitiō, Tusi po o Pese e Faasā e Molimau a Ieova?” (Mataupu i le jw.org)
Mātau pe e faapefea ona e faia ni filifiliga lelei e faatatau i faafiafiaga ma tafaoga.
“Po o Aogā Au Faafiafiaga?” (Le Olomatamata, Oketopa 15, 2011)
I le tala “Sa Ou Manumalo i Loʻu ʻInoʻino,” vaai pe aiseā na suia ai e se tamāloa faafiafiaga na ia filifilia.
“E Mafai e le Tusi Paia Ona Suia Olaga” (Le Olomatamata, Fepuari 1, 2010)
Mātau le auala na faia ai e se tinā se filifiliga atamai i faafiafiaga o loo faaalia ai faiga faaagaga.